Qalalyq memlekettik arhıvtiń dırektory Meıram Bektembaevtyń aıtýynsha, búgingi tańda qundy tarıhı qujattardy sıfrly formatqa kóshirý isi qarqyndy júrip jatyr.
– Elordanyń arhıvinde osyǵan deıin 3 mln-nan astam qujat sıfrlandy, baǵaly tarıhı derekkózderdiń barlyǵyn mekemeniń saıtynan kórýge bolady. Pandemııa kezinde arhıv derekterine qyzyǵýshylar úshin derektermen esh aqysyz onlaın tanysýǵa múmkindik jasadyq, – deıdi Meıram Bektembaev.
Qalalyq arhıv búgingi tańda óz qyzmetkerleriniń sanatyn kóterip, biliktiligin arttyrýǵa, áleýmettik jaǵdaıyn da jaqsartýǵa barynsha kóńil bólýde. Joǵary bilikti arhıv mamandary sol arqyly muraǵat qoryndaǵy qundy derekterdi zertteý isinde jetistikterge jete alady. Qorda áli de jetkilikti dárejede zerttelmegen dúnıeler az emes. Qujattardyń kópshiligi latyn grafıkasymen, arabtyń órme jazýymen órnektelgen, olardyń túpki maǵynasy áli de bolsa ashylǵan joq. Sol sebepti qalalyq arhıv basshysy ǵalymdardy izdenis barysynda arhıv derekterin barynsha keńirek paıdalanýǵa shaqyrdy. Onyń ústine, qujattardyń bárin qazir muraǵatta shań jutpaı-aq, onlaın formatta alýǵa bolady.
Bıyl II Dúnıejúzilik soǵystyń aıaqtalǵanyna 75 jyl tolǵany halyqaralyq aýqymda atalyp ótkeni belgili. Qazaqstandyqtardyń uly jeńiske qosqan úlesi, maıdannyń aldyńǵy shebine shaqyrtylǵandar týraly, tyldaǵy iri ónerkásip oryndaryna shaqyrtylǵandar týraly KSRO Qorǵanys mınıstrliginiń derekteri qalalyq arhıvtiń saıtynda jarııalandy. Maıdandaǵy erligi úshin jáne tyldaǵy eren eńbegi úshin túrli dárejedegi marapattarǵa ıe bolǵandarǵa qatysty barlyq derekpen de osy saıt arqyly tanysýǵa bolady.
Jalpy, qalalyq arhıv qorynda 1915 jyldan bastap kúni búginge deıingi aralyqty qamtıtyn 350 myńnan astam qundy qujat bar eken. Qordy baıyta túsý úshin ár salaǵa qatysty 332 derekkóz jasalǵan, derekterdi jınaý isine mádenıet pen óner salasyndaǵy, jýrnalıstıkadaǵy beldi mamandar, qalamgerler, ǵylym qaıratkerleri, elordanyń damýyna súbeli úles qosqan tanymal tulǵalar, ardagerler tartylǵanyn aıta ketý kerek.
Maksım Gorkıı: «О́tkendi bilmeıinshe, búginiń men erteńińniń mán-maǵynasyn túsiný múmkin emes» degen eken. Bas qalanyń búginin saralap, erteńin aıqynyraq baǵamdaýda qalalyq arhıvtegi qundy qujattardyń róli zor ekeni anyq.
