QULDYRAŃDAP KELGEN QULYNDAR

Zaman zapyrany kimdi aıaǵan. Tileýiń oń, tilegiń durys bolsa, odan qutylýǵa bolady eken. Qazaqtyń altyn qursaǵyna úsh ǵasyr boıy baılanǵan zalaly kóp sol zapyrandy tań bolyp atqan táýelsizdik eritip, bodandyqtan qutqaryp, eldik irgeni bekitip, tórtkúl dúnıege jurtymyzdy tanytty. Bul el ekonomıkasyn ornyqtyryp, el ıesiniń eńsesin kóterip, bir kezderi tarydaı shashylǵan qandas qazaqty topyraǵynda tabystyrýǵa da keń jol ashty. Shashyratyp jibersek sharasyz kúıde qalady, odan keıin zymııan oı júzege asady degen aram pıǵyl­dyń ádibi sógilip, “júz ulttyń labora­torııa­sy” degen saıasattyń betperdesi túrilip, egemendigimizge ıe bolyp, eńsemizdi tiktep es jıǵan tusta Elbasy Nursultan Nazarbaev telim-telim bo­lyp ketken halqyn ata jurtynda tabystyrý maq­satynda “Shetelde tura­tyn qandastardy qoldaý­dyń baǵdarlamasy týra­ly” Jarlyq shyǵardy. Prezı­dent­tiń bul Jarly­ǵy buryn sozsa qol, aı­qaı­lasa daýys jetpeıtin qandastar­dyń atamekende bir kisiniń balasyndaı, bir qoldyń salasyndaı bo­lyp, bereke-birlikte, yn­ty­­maq-tirlikte kún keshýi­ne, barys-kelisi­ne mol múm­kindik berdi. Osy qun­dy qujat negizinde Bilim jáne ǵylym mı­nıstr­ligine qarasty “Da­ryn” ortalyǵy Otany­myz­da alǵash ret “Qazaqstan – ata jurtym, qasıetim – ana tilim” atty shetel­der­de turyp jatqan baýyr­lastardyń ul-qyzyna ar­nal­ǵan qazaq tili men áde­bıet páninen halyq­ara­lyq dárejedegi olım­pıada ót­kizýdi qolǵa aldy. “Úlken­niń birine bergenshe, balanyń myńyna ber” dep bastaǵan shara­ny mınıstrlik te qoldap, barlyq múmkindikti jasady. Sóıtip, alǵashqy olımpıada 2004 jyly elordamyz Astanada boldy. Qarǵadaıynan qara tutqan eli bar, taban tirese turatyn jeri bar ekenin alǵash ret sezingen alpys ul-qyz qasıetti qazaq jerine keldi. Atamekenim bar, qarsy alatyn jurtym bar eken, dedi olar. Júrek lúpili, jan-jylýy shyqqan tegine tartyp turǵanyna sol joly kýá bolyp, kóńil shirkin, tolqı turyp, kókjıegin keńitken edi. Tórtkúl dúnıege barlaı kóz salsań, etnostar arasynda ózge jerge kindik qany tamyp, birneshe urpaq aýysqanmen túp-tamyry bolyp esepteletin ata jurtynyń qandaı isine de jarap, syn saǵatta jumyla ketip, sózin sóılep, joǵyn túgendep, baryn áspettep qarjylaı qarasyp, tipti óte qajet dep tapsa, atbasyn tirep qyzmetin kórsetip jatatyndar az ba? Bir zamandary tolysa kelip, qazaqtan da sondaı uran bolar ul-qyz shyqpaıdy dep kim aıta alady. Ol úshin urpaqty oıata alsaq sanasyna ulty týraly sáýle túsire alsaq, bolǵany. Sol kezde ǵana qanattanady, qaıratyna minedi. Jasyǵan kóńili jadyrap, basylǵan kóńili kóteriledi. Mine, osy ozat oıdan bastaý alǵan ıgilikti is jeti jyldan beri jalǵasyn taýyp, alys-jaqyn shetel­­der­de turyp jatqan bes júzden asa urpaǵy­myz Otanymen tabysyp, tanysty. Qara tabany ata-babalarynyń kindik qany tamǵan qara topyraqty basty. Biz árkez sol ul-qyzdyń tolǵanysy men tebirenisine kýá bolyp júrgen jaıymyz bar. Dúnıejúzi qazaqtarynyń alǵashqy quryltaıyna kelgen baýyrlary­myzdyń jan tolqýyn jıi aıtyp júremiz. Al sol qandastarymyzdyń ul-qyzy “Bizdiń bul dúnıede bir ǵana Otanymyz bar, ol – táýelsiz Qazaqstan” degen Elbasynyń sózin tý etip kóterip, “Atameken aınalaıyn, dep keldim, Kútip alar bar ma aǵaıyn dep keldim. Bar ekensiń shýaǵyndaı kóktemniń!” – dep 2004 jyly jyr joldaryn tókken Altaıdan kelgen 11 synyp oqýshysy Erqulan Nurtazanov qazir Eýrazııa Ulttyq ýnıversıtetin úzdik bitirip, Otanyna qyzmet etip júr. Ultqa, urpaqqa qyzmet etý jónindegi ádemi bastamany shyn nıetpen qoldap qana qoımaı: “Ana tili men ata jurtyn boı tumardaı qasterlep, bilektiń kúshimen, naızanyń ushymen halqyn, urpaǵyn oılaǵan babalardyń muraǵa qaldyrǵan keń baıtaq jerine qosh keldińizder!” degen tilegin birinshi olım­pıa­dada bildirip, jeńimpazdar­dyń ata jur­tynda oqýyna alǵash ret múmkindik jasaǵan azamat, sol kezdegi Bilim jáne ǵylym mınıstri Jaqsybek Qulekeev bolǵanyn aıta ketsek artyq bolmas. Sol úrdis kúni búginge deıin ult bolashaǵyn oılaǵan jaqsy men jaısańdardyń demeýimen altyn arqaýyn úzbeı, jalǵasyn taýyp, ár jyl saıyn ondaǵan talapker elimizdiń bedeldi bilim ordalarynda oqyp, táýelsizdiktiń baıandy bolýyna úlesimizdi qosamyz degen taýdaı úmitterin úkilep júr. Kótergen tildiń týyn shette júrip Qazaq úshin jeti kıeli san. Aqtaban shuby­ryn­dyny kórmese de, jasyryn qysym­nan bytyra tıgen torǵaıdaı byt-shyt bolǵan qandastarymyzdyń urpaǵyna qamqorlyq jasaý nıetinde uıymdastyry­lyp kele jatqan dástúrli olımpıada bıyl Oral qalasynda ótti. “О́z tilimen sóılesken, óz tilimen jazǵan jurt­tyń ulttyǵy esh ýaqytta... joǵalmaıdy. Ult­tyń saqtalýyna da, joǵalýyna da sebep bola­tyn nárseniń eń qýattysy – tili. Sózi joǵal­ǵan jurttyń ózi de joǵalady. О́z ultyna basqa jurtty qosamyn degender áýeli sol jurttyń tilin azdyrýǵa tyrysady”, – dep qadap aıtqan Ahmet Baıtursynulynyń ataly sózine adaldyq tanytyp júrgen, qazaq tili men ádebıetine arnalǵan olımpıadaǵa úlken úmitpen kelgen jetkin­shekterimizdi Jaıyqty jaǵalaı qonǵan el azamattary – bir kezderi siltegen syryqtan, qulashtaǵan quryq­tan jasqanyp, jer aýyp ketken baýyrlardyń quldyrańdap jetken qulyndary dep qushaq jaıa qarsy alyp, tórden oryn berip, atam qazaqtyń alty jasar bala alystan kelse alpys jastaǵy aqsaqal qarsy alǵan degen qaǵıdasyn buljytpaı oryndady. Kisilik degen osy bolar. Búgingi zamanǵa saı sáni men saltanaty kelisip turǵan oblystyq drama teatryndaǵy ashylý rásimi de ádemi ótti. Qazaq dalasy­nyń kıesi de, ıesi de osy kisi degendeı, aqjaý­lyq­ty ana sahnanyń bir qyrynda turyp halqy­myz­dyń arǵy-bergi tarıhyn tarazy basynda teńdep, Asan qaıǵy, Abylaı han, Syrym, Qabanbaı, Bógenbaı, Mahambet, Abaı, Áıteke, Tóle, Qazybek, Qurmanǵazy, Shoqan, Jam­byl, keshegi Jeltoqsanda myna sumdyqty kórgenshe meniń surapyl soǵysta ólgenim artyq edi dep silkinip shyqqan, onyń aldyn­da, keńes­tik dáýir qansha jerden alqymnan alyp, jelkeden túıip tursa da: “Men – qazaqpyn myń ólip, myń tirilgen” dep atoı­lap shyq­qan arqaly aqyn Juban (Mol­daǵalıev) beı­ne­lerin alma-kezek kór­setip, ata-qonysyń mynaý bolsa, arqa súıer ata-babań osylar dep uqtyrdy. Árqaısysynyń aýzyna batyr­lyq, eldik týraly sóz salyp sóılet­kende kimniń de bolsa rýhy oıanbaı qalmady. О́zine qaraı sózi, isine qaraı tulǵasy dep alyp­tary­myz ben arystarymyz birinen keıin biri kóz aldyńnan ótkende shetten kelgen ul-qyz oryndarynan ushyp turyp, qur­met kórsetip jatty. Ata jurtym dep kel­gen olar bul kórinisti kórgende qyran­­daı túlep, keı­bireý­leriniń janar­laryna jas keldi. Osyn­daı uly tulǵalardyń urpaǵy bolý qandaı baqyt, shirkin, olardy biz ómir súrip jatqan elderdegi zamandas­tarymyz tanyp, bilse ǵoı, degen sózderdi de qulaǵymyz shalyp qaldy. Halyqaralyq “Qazaq tili” qoǵamynyń prezıdenti, akademık, qazylar alqasynyń tóraǵasy О́mirzaq Aıtbaıuly qazaǵym, halqym, emirenip qarsy alar elim bar dep kelgen quldyrańdaǵan qulyndarym, sender bizge arqa súıeseńder, biz senderdi qýat kóre­miz, sender meniń nemeremsińder, syrt­ta júrseńder de qazaq tiliniń týyn kóterip, tuǵyryn jyqpaı aıalaǵan ul-qyzdarym, ulandarym, dep tebirengende zal toly jurt dýyldata qol soǵyp, qurmet kórsetti. Alǵashqy synaq oqýshylardyń bilimin qazylar alqasy belgilegen bes taqyryptyń ishinen birin tańdap, shyǵarma jazady. Bul synaq arqyly olardyń tildi bilýin, boıyn­daǵy talaby men talantyn, eline degen nıetin anyqtaý bolatyn. Máskeý qalasyn­daǵy №2 mektep oqýshysy Karına Mamyr­baevanyń birinshi sózi “Men – qazaqpyn­nan” bastalyp­ty. 11 jastaǵy qyz anasy Svetanyń orys ekenin, atasy men ájesi Qazaq elinde turaty­nyn alǵa tartady. “Men qazaq tilin súıemin” deıdi. Taǵy bir máskeý­lik Mádına Tursyn­baeva ata-anasy qazaq topyraǵynda, ózi Máskeýde týǵanyn aıtady. “Máskeýde bári oryssha sóıleıdi. Al men qazaqsha bilýdi maqsat ettim. Eger men qazaq­sha sóıleı bilmesem, men qazaq degen atyma kir keltire­min” deıdi ol. Mońǵolııalyq 4 synyp oqýshy­sy Qanat Elishan: “О́tken jyly jazda Astanada boldym, keremet eken. Shirkin, sol Astanada oqysam, armanym bol­mas edi”, deıdi. “Men Reseıde turamyn, meniń janym qazaq jerine tartady. Men – qazaq qyzymyn. О́z halqymdy, týǵan tilimdi maqtan etemin. Týǵan tilim – qazaq tili, anamnyń aq súti ol. Shashyn órip qoıǵan sulý qyz, peshke pisirgen nan, dastarqan qan­daı!” – dep tamsanady Samara qalasy­nan kelgen 9-shy synyp oqýshysy Mól­dir Sultanova. Máskeýlik 10 synyp oqýshy­sy Ásel Baısaqalova Baýyrjan Momyshuly týraly shyǵarmasynda batyr ózderine árkez rýh berip, maqtan bolyp júrgenin aıta kelip, qazaqtyń ulylyǵyna basyn ıip, “Taqyr jerge shóp shyqpaıdy. Batyr da, aqyn da negizi bar jerden shyǵady. Negizi bar el, ol – qazaq eli. Sol qazaq eliniń qas batyry – Baýyrjan!” dep oı túıedi de: “Atanyń aıtqan barlyq sózi meniń júregime jiger quıyp, moınyma tumar tarıh bolyp taǵyldy”, – deıdi. Mońǵolııa, Qytaı, О́zbekstannan kelgen oqýshylardyń jazǵan shyǵarmalary janyńdy jadyratady. Mysaly, mońǵolııa­lyq 11 synyp oqýshysy Raıma Áýeshan Ǵ.Músirepov­tiń “Qazaq soldatyndaǵy” Qaırosh beınesin kitap jelisine súıene otyryp, ádemi taldap, sońyn Baýyrjan Momyshulynyń “Batyrlyq – ol Qudaıdyń bere salǵan syıy emes, Otan aldyndaǵy perzenttik boryshyńdy soǵysta aqtap shyǵý”, – degen sózimen túıin jasaıdy. Sol sekildi О́zbekstannyń Tashkent oblysynan kel­gen 11 synyp oqýshysy Raıhan Egemberdıeva: “Meniń ana tilim – óte kór­kem til, sol kórkem tildi paıdalana almaǵan adam, menińshe, naǵyz paqyr jan. Namysy ólgen, ultynan jerigen pende”, – deıdi. Bul ashy sóz, biraq aqıqat ta joq emes. Ol taǵy birde: “Qazir kóptegen jastar tilimizdi shubarlap bitti. Tipti olardyń arasynda úlken aǵa-apalar da bar. Turpaıy sóı­leıdi. Sol kezde meniń oıyma K.Paýstov­skııdiń “Týǵan tiline jany ashymaǵan adam – jándik” degen sózi oralatyny bar. Ana tilim sen úshin kúres – bolashaq úshin kúres, ult úshin kúres”, – dep shamyrqanady. Aýyzsha emtıhanda da eline shólirkep, ańsap kelgen balalar bilimderimen qatar, ónerlerin de kórsetti. Aralarynan dom­byra­men án aıtyp, Qytaı men Fransııadan kelgender qosylyp “Qara jorǵany” bıledi. Bir aptaǵa sozylǵan bilim saıysynda júlde­ger dep tanylǵandar men qatysýshy­larǵa syı-sııapat kórsetý joǵary dárejede ótti. Tapsyrý saltanatynda gran-prıdi jeńip alǵan Raıhan Egemberdıeva (О́zbekstan) “Bul sondaı ólke, topyraǵynan altyn ónedi, bul sondaı ólke, qysta da jer kógere­di, bul sondaı ólke, sál kórmeseń saǵyndy­ryp turady, bul sondaı ólke, qaırat-kúsh tasyp-tógedi. Men О́zbekstanda tursam da óz tilimdi, dilimdi eshteńege aýystyrmaımyn. Alla qaıda júrsek te ózi jar bolyp, tilimiz ben dinimizdi saqtap, izgilik pen yntymaqqa den qoıyp kelemiz. Nur ıslamǵa qýat berip, ultymyzdyń uıytqysy bolyp, Qazaq elin álemge tanyt­qan Nursultan aǵaǵa rızalyǵy­myz sheksiz. О́zbek dalasyndaǵy qazaq tili kúreskerleriniń biri bolyp júrgen Raıhan degen qyzdaryńyz men bolamyn!” dese, birinshi dárejeli dıplomdy qanjyǵasyna baılaǵan Sháký Erdos (Mońǵolııa) “Men – qazaqpyn qanym­men, súıegimmen. Sán-saltanat, saltym­dy súıemin men. Baq ornatam basyna molanyń da, Muragermin oǵan da, ıemin men. Taǵdyr meni mırastan aryltpasyn, Toqtatpasyn, tostyrtyp saryltpasyn. Uzyn bolyp aıaqqa oralmasyn, Tusaý bolyp aldymdy taryltpa­syn”, – dep ıyǵyn tik ustap, ushatyn qyrandaı qomdandy. Ekinshi dárejeli dıp­lom­nyń ıegeri Raıma Áýeshan (Mońǵolııa) Ábdilda Tájibaevtyń “Týǵan tilim tirligimniń aıǵaǵy, Tilim barda aıtylar syr oıdaǵy. О́sse tilim, men de birge ósemin, О́shse tilim, men de birge óshemin”, – degen óleńin asqaqtata aıtsa, taǵy bir jeńimpaz Alma Bolat Sultanmahmut Toraı­ǵyrovtyń “Alash urany”, “Alash marshy” óleńderinen “Alash týy astynda, Kún sóngenshe sónbeımiz. Endi eshkimniń Alashty qorlaýyna bermeımiz”, “Arǵy atam – er túrik, Biz – qazaq elimiz. Samal taý, shalqar kól, Saryarqa jerimiz. Jasaǵan jar bolyp, Qazaqtyń eline. Jasaǵan saqtasyn Alashtyń ordasyn”, – dep otyrǵan jurtty dúr silkindirdi. Jetinshi halyqaralyq olımpıadaǵa kelgen jetpis oqýshynyń bári de bilimderine qaraı ártúrli dárejedegi dıplomdar, maqtaý qaǵazdar alyp, nomınasııalar boıynsha mara­pattaldy. Batys Qazaqstan oblysy ákimi­niń orynbasary Serik Súleımen olım­pıadanyń jabylý rásiminde álemniń ár óńiri­nen kelgen oqýshylardyń alǵyrlyǵyna, tildi qurmettep, Otandy súıýdiń jaqsy úlgisin kórsetkenine tánti bolǵanyn jetkiz­di. Ásirese, aqıyq aqyn Qadyr Myrza Áli­niń sózine jazylǵan Eskendir Hasanǵalıev­tiń “Atameken” áni aıtylǵanda, oqýshylar­dyń tikesinen tik turyp, áýenge qosylyp ketkenine dán rıza bolǵanyn, bul olardyń ult qundylyǵyn áspetteýi ǵoı dese, qazaq­tyń aıtýly aqyn qyzy Aqushtap Baqty­geree­va rýhy myqty ul-qyzdyń janyp turǵan minsiz minezderine rızalyq bildirip, óziniń sońǵy jyldary jaryq kórgen jyr-jınaqtaryna qoltańba qoıyp tapsyrǵanda, oǵan ıe bolǵan ul-qyz shetinen iltıpat bildirip jatty. Raıhan Egemberdıeva biz baılyq izdep kelmedik, rýhymyzdy kótereıik, tilimizdi qurmetteıik, ómir boıy tórimizden oryn alatyn osyndaı jyr kitabyn alaıyq dep kelip edik. Degenimizge jettik, qazaǵym alǵa, álem jurtynyń ishinde osylaısha bıikten kórine berińder, dep asqaq rýhymen ún qatty. Jas qyzdyń bul sózine kóńili tolǵan aqyn apamyz, men alǵashynda bul qandaı olımpıada dep júretin edim, sóıtsem elge kerek iri is eken shetinen. Patrıot, boı­laryn ulttyq rýh kerne­gen ul men qyzdy Otany­na tartyp jatyr ekensiń­der. Buǵan uıytqy bolǵan Bilim jáne ǵylym mı­nıstri men “Daryn” orta­ly­ǵyna, onyń basshysy T.Bıtýovaǵa alǵysym shek­siz, dedi. Al oblystyq bilim basqarmasynyń bastyǵy S.Beısembaeva elim, tilim, ata jurtym degen kileń bir saıyp­qyran ul-qyzdyń bir apta ishindegi úlgisin beınetas­paǵa túsirip aldyq. Oblys mektepterine taratyp, oqý­shylarǵa kórsetetin bolamyz, – deıdi sóz qa­­di­rin, Otan qasıetin tereń uqqan qandas oqýshylar týraly aǵynan jarylyp. Parıjden kelgen bes balanyń anasy Bıylǵy olımpıadaǵa álemniń onǵa tarta memle­ketinen kelgen oqýshy­lardyń jetekshilerimen sóıleskenimizde, biraz qıyn-túıin máselelerge kóz jetkizdik. Osy olım­pıada bastalǵaly jeti jyl ishinde alǵash elde qalǵan jastar qazir otbasyn quryp, aldy ómirge urpaq ákeldi. Bul elimizdegi halyq sanyn art­tyrýǵa, ulttyq demo­grafııany molaıtýǵa septigin tıgizeri sózsiz. Jalpy, bul olım­pıa­danyń basty maqsaty, talanttylardy tartýmen qatar, halyq sanynyń artýyna múmkindik jasaý. Osy arada jerimiz keń bolǵanymen, halqymyz­dyń az ekenin, tipti keı jaǵdaıda bala sanynyń azaıyp bara jatqanyn myna dáıekterdi kel­tirsek, ańǵararymyz anyq. Otanymyzda 5 mıllıon otbasy bar desek, sonyń ishinde 2-3-4 adamnan turatyn otbasylar sany 70 paıyz, bes adamnan artyq otbasylar 26 paıyz, 10 adamnan artyq otbasylar 1 paıyzdy ǵana quraıdy eken. Bul oılanýǵa turatyn másele. Biz olımpıadaǵa oqýshylardy alyp kelgen ata-analarmen de tildesken edik. Solardyń biri – Parıjden kelgen Janat Uıshal. Ol úsh qyz, eki uldyń anasy eken. Ata jurtynda alǵash ret bolýy. Qazaq tili men ádebıet páninen olımpıada ótedi degendi estip, eki balasyn alyp kelipti. Bir zamandary ákem aıtyp otyratyn. Bizdiń tabanymyz qazaqtyń topyraǵyna tımes, sender baratyn kún týady dep. Mine, sol kún týdy. Biz Eýropada ómir súrip jatqan qazaqtar Qazaq eli dese, jar qulaǵymyz jastyqqa tımeı otyrady. Ushaqtan túskende kóz aldyma birinshi kelgen Alataý boldy. Sol sáttegi janarymnan aqqan jasty kórseńiz ǵoı dese, Túrkistan Savasan aqsaqal ótken jyly da bolǵanyn, sodan keıin Eýropaǵa eldi taný boıynsha jumys istep jatqanyn, jıyrmaǵa tarta saıt ashqanyn, mysaly Abaı degen saıty 17 bólimnen turatynyn, onda Abaı óleńi, Abaıdyń qarasózi, Abaıdyń ánderi bolyp, jalǵasyp kete beretinin, “Qazaq”, “Dombyra”, t.b saıttardy qazir tórtkúl dúnıede mıllıondaǵan adamnan kórip jatqanyn, endigi jerde “Jaıyq” degen saıt ashyp, Batys Qazaqstandy álemge tanytýdy maqsat etip otyrǵanyn alǵa tartty. Máskeýlik balalardy bastap kelgen Gúlmaı Hamedenova qazir onda ómir súrip jatqan ult ókilderiniń urpaǵyn qazaq tili men salt-dástúrine baýlyp júrgenin jetkizse, Omby oblysynan kelgen ult janashyry Altynaı Júnisova óńirde istelip jatqan jumystardy atady, Túmen oblysynan kelgen Zıpa Qasymova bolsa bizdiń tilimiz eki mem­leketke de qajetsiz bolyp turǵan sekildi. Sebebi, Reseı de, Qazaq elindegi azamattar da kóp kóńil aýdara bermeıdi. О́zimizshe tirlik jasap, jeksenbilik mektepter ashyp, urpaǵymyzdyń tilinen aıyrylyp qalmaý jaǵyn qarastyryp kelemiz. Bul tirligimizdiń qanshaǵa deıin sozylatyny belgisiz. Qalaı desek te, keıingi urpaq osy qalypta kete berse, tilinen kóz jazyp qalary kúmánsiz, dedi sharasyzdyq tanytyp. Jalpy, alys sheteldi bylaı qoıǵanda, TMD óńirindegi memleketterdiń ózinde qazaq mektebiniń aıasy tarylyp kele jatyr. Máselen, irgeles Qyrǵyzstanda bilim uıasy múlde joq bolsa, О́zbekstan latyn qarpine kóshkeli beri qazaq mektepteri birte-birte qysqarý ústinde. Mundaı jaǵdaıda alystaǵy aǵaıynnyń ul-qyzynyń bolashaq taǵdyry, tili týraly árqaısymyz “Ana tilin armansyz boıǵa sińirińizder, óıtkeni, babalarymyzdyń ǵumyr tájirıbesi, dúnıetanymy, minez-qulqy, ózindik bolmys-bitimi osy tilde qat­taýly jatyr. Tilge degen kózqaras – shyn­dap kelgende, elge degen kózqaras. Qıyn kezeńderde ultty qojyratpaýdyń qýatty qarýy bolǵan qazaq tili búgingi azat ómiri­mizde de ultty tutastandyrýdyń tegeýrindi tetigi bolýǵa tıis” degen Elbasy sózin árkez oı-sanamyzdan shyǵarmaı, júzege asyrsaq urpaq ta, til de dittegen jerimizden kórinip, mártebesi bıikteı beredi. Osyndaı maqsatqa negizdelgen “Qazaqstan – ata jurtym, qasıetim – ana tilim” atty qazaq tili men ádebıeti páni boıynsha ótkizilip kele jat­qan halyqaralyq olımpıada aldaǵy jyly da jalǵasyn taba beredi degen úmittemiz. Eger ıgilikti iske Otanymyzdyń kez kelgen azamaty oń qabaq tanytyp, izgi nıet kórsetse, biraz jyldardan keıin elimizdiń irgesin bekitýge óz úlesin qosatyn ondaǵan emes, júzdegen urpaqtyń eline kelip, altyn dińgek bolatynyna ımanymyz kámil. Súleımen MÁMET, Temir QUSAIYN.