Ortalyqty oblys ákimi Mahambet Dosmuhambetov pen Atyraý oblysy Bıler keńesiniń tóraǵasy Habbas Hısmetýllın saltanatty túrde ashty.
Joba Qazaqstan Respýblıkasy Joǵarǵy Sotynyń áleýmettik osal toptarǵa, sondaı-aq jeke jáne zańdy tulǵalarǵa zańdyq keńes, quqyqtyq jáne medıatıvtik kómek kórsetýdi kózdeıtin «Tatýlasý: sotqa deıin, sotta» baǵdarlamasy aıasynda júzege asyrylǵan.
Atyraý oblysynyń ákimi M.Dosmuhambetov saltanatty is-sharada ortalyqtyń ashylýy óńir turǵyndary úshin aıtýly oqıǵa ekenin atap, daýlardy sottan tys retteý ınstıtýtyn damytý týraly Elbasy Joldaýyndaǵy mindetter men Prezıdent tapsyrmalaryn eske saldy.
«Ortalyqtyń jumysyna úlken jetistik tileımin, bul jer kelýshilerge daýdy tez jáne beıbit jolmen sheship, azamattardyń týyndaǵan máselelerdi sheshýde mádenıetin kóterip, moraldyq jáne materıaldyq shyǵyndardy azaıtyp, qoǵamdaǵy daýlasýshylyq deńgeıin tómendetýge múmkindik beredi dep oılaımyn», - dedi ákim.
Oblystyq sot tóraǵasy B.Jumaǵulov óz sózinde is-sharanyń sımvoldyq máni bar ekenin aıta kele «Jaqynda Memleket basshysy APK-ke ózgerister men tolyqtyrýlar engizý týraly Zańǵa qol qoıdy, al onyń negizgi jańashyldyqtardyń biri medıasııa ınstıtýty mehanızmderin keńeıtý. Atalǵan Zań jaqyn arada qoldanysqa engiziledi. Sondyqtan biz búgin atqaryp jatqan ister zańnama tujyrymdamasyn tabysty iske asyrýǵa septigin tıgizedi», - dep senim bildirdi B.Jumaǵulov.
Sonymen qatar tóraǵa azamattarǵa ózara baılanysty qyzmetter kórsetetin Ortalyq jumysyn tanystyrdy. Onda keńes berýden bastap, daýdyń sanatyn anyqtaý, tatýlastyrý rásimderin júrgizý, kelisim jasaqtaýǵa deıingi qyzmetter qarastyrylǵan.
Ortalyqta medıatorlar, bıler, advokattar, prokýrorlar, psıhologtar, notarıýstar men beznes ombýdsmen ókilderi azamattarǵa qyzmet kórsetedi.
Ortalyq qajetti tehnıkalyq quraldarmen jabdyqtalǵan. Azamattarǵa qajetti barlyq jaǵdaı jasalǵan. Munda kelýshiler tıisinshe zańdy kómek alyp, medıatıvtik rásimderdiń erekshelikteri men artyqshylyqtary týraly bile alady, janjaldy sheshý jáne kelisý boıynsha kelissózder júrgizedi.
