Qoǵam • 20 Maýsym, 2020

Nur-Sultanda koronavırýs testin óńdeıtin zerthanalar qýaty artady

13 ret kórsetildi

Dúısenbide, 22 maýsym kúni qalada qosymsha eki júz tósek-oryn qoıylady jáne basqa da mekemeler stasıonarǵa qaıta beıimdeledi, - dep habarlaıdy elorda ákimdiginiń resmı saıty.

Búgin Nur-Sultan qalasynyń ákimi Altaı Kólginov qalalyq jáne jeke menshik emhanalar men aýrýhanalardyń bas dárigerlerimen, sondaı-aq zerthanalar men dárihanalardyń basshylarymen onlaın-konferensııa ótkizdi. Onyń aıtýynsha, qazirgi tańda eń bastysy – qosymsha tósek-oryn sanyn ýaqytyly qoıyp, medısınalyq dári-dármekter men qural-jabdyqtar qoryn tolyqtyrý.

"Zerthanalar kelesi aptadan bastap, qýattylyǵyn arttyrady. Máselen, "Invivo" zerthanasy test kólemin táýligine bir myńnan eki myńǵa deıin kóbeıtedi. "Olımp" adam sanynyń kóptiginen jáne júıeni óńdeý úshin jumysyn seısenbide bastaıdy, olar da jumys áleýetin arttyrady. Bul basqa zerthanalarǵa qatysty. Testileý rejıminde mobıldi zerthanalardyń jumysyn iske qosamyz. Bul – táýligine taǵy 1 myń test. PTR-testterdi qabyldaý jáne nátıjelerdi óńdeý úshin bir top medısınalyq qyzmetkerler úıretildi. Osy baǵyttaǵy jumysty jalǵastyramyz", – dep jazdy A. Kólginov óz ınstagram paraqshasynda.

Sondaı-aq onyń aıtýynsha, dúısenbi kúni qosymsha 200 tósek-oryn qoıylady, basqa da mekemeler stasıonarǵa qaıta beıimdeledi.

"Travmatologııa jáne ortopedııa ǴZI, Ulttyq ǵylymı medısınalyq ortalyq, Green Clinic sııaqty respýblıkalyq klınıkalarmen KT ótkizý múmkindigin bekitý týraly kelisimge qol qoıdyq. Bul pnevmonııany erte kezeńde anyqtaýǵa múmkindik beredi. Sonymen qatar qosymsha kompıýterlik tomografııa men ókpeni jasandy jeldetý apparattaryn satyp alamyz", – dedi ákim. Onyń aıtýynsha, eger buryn jedel járdemge myńnan astam ótinish kelip tússe, qazir 4 myńǵa deıin jetken.

"Bul jedel járdem men medısına qyzmetkerleriniń zor júktemesi. Jedel járdem stansııasy bazasynda ashylǵan koll-ortalyq júktemeni azaıtýǵa múmkindik beredi. Mundaı koll-ortalyqtar barlyq emhanalarda bolady, osy baǵyttaǵy jumys kúsheıtiledi. Telemedısınany paıdalaný tájirıbesi jalǵasyp jatyr. Koronavırýstyń sımptomsyz tasymaldaýshylaryn emdeý úshin medısına qyzmetkerleri beıneqońyraý jáne basqa baılanys arnalary arqyly densaýlyqty qadaǵalaıdy jáne ınfeksııanyń sımptomsyz tasymaldaýshylaryna barlyq máseleler boıynsha keńes beredi. Pasıentterde sımptomdar paıda bolǵan jaǵdaıda aýrýhanaǵa jatqyzady", – dep atap ótti A.Kólginov.

Bul rette ol dárihanalarǵa qajetti dári-dármekter ýaqtyly ákelinýi tıis ekenine nazar aýdardy.

"О́z tarapymyzdan barlyq qoldaý kórsetýge daıynbyz. Barlyǵymen jeke jumys jasaýǵa ázirmiz", – dep túıindedi qala ákimi.

Esterińizge sala keteıik, 20-21 maýsymda adam ómirine asa qajet dárihanalar men azyq- túlik dúkenderi sekildi obektilerden (jumys kestesi saǵat 10-nan 17-ge deıin) basqa, barlyq kásiporyndardyń jumysy jáne qoǵamdyq kólik qozǵalysy toqtatyldy. Sondaı-aq barlyq qoǵamdyq oryndar: saıabaqtar, baqtar, jaǵalaýlar, jaǵajaılar jáne basqa da adamdar kóp jınalatyn oryndar jabylady.

Nur-Sultanda aýqymdy dezınfeksııa júrip jatyr. Adamdar kóp jınalatyn oryndarda dezınfeksııalaý jaıaý da, arnaıy mashınalarmen búrký arqyly da júrgiziledi.


Sońǵy jańalyqtar

Uqsas jańalyqtar