Atqarylyp jatqan jumystar týraly energetıka mınıstri Nurlan Noǵaev, ındýstrııa jáne ınfraqurylymdyq damý mınıstri Beıbit Atamqulov, "Samuryq-Qazyna" UÁQ" AQ basqarma tóraǵasy Ahmetjan Esimov baıandady.
2019-2020 jj. jylytý kezeńi shtattyq rejımde ótti. 24 tehnologııalyq buzýshylyq tirkeldi, bul ótken maýsymnan 33 jaǵdaıǵa az. Barlyq tehnologııalyq buzýshylyq normatıvtik merzimde joıyldy. Jylý jelileriniń temperatýralyq kestesin saqtamaǵan 48 jaǵdaı tirkeldi, bul ótken jylmen salystyrǵanda 20%-ǵa az.
Aldaǵy kúzgi-qysqy maýsymǵa daıyndyq aıasynda elimizde 8 energetıkalyq blokty, 59 qazandyq pen 44 týrbınany jóndeý, sondaı-aq kommýnaldyq-turmystyq sektor men halyq úshin naryqta kómirdiń bolýyn qamtamasyz etý kózdelgen.
Úkimet basshysy óńirlerdiń ákimdikterine aldaǵy jylytý maýsymyna sapaly daıyndyq sharalaryn kúsheıtýdi, barlyq josparlanǵan jóndeý jumystaryn ýaqytyly aıaqtaýdy jáne turǵyn úı-kommýnaldyq sharýashylyq, densaýlyq saqtaý jáne áleýmettik salanyń barlyq nysanynyń jylytý maýsymyna daıyndyǵyn qamtamasyz etýdi tapsyrdy
"Turǵyndardy kómirdiń qajetti kólemimen, JEO men qazandyqtardy otynmen aldyn ala qamtamasyz etý jumystaryn uıymdastyrý kerek. Kómir baǵasyn erekshe baqylaýǵa alyp, otynnyń, ásirese, turǵyndar úshin kómir baǵasynyń negizsiz ósýine jol bermeý sharalaryn qabyldaý kerek", — dedi A. Mamın.
Ákimdikterge bıylǵy 1 naýryzǵa deıin jınalǵan kommýnaldyq qyzmetter úshin tutynýshylardyń debıtorlyq bereshegin tómendetý boıynsha sharalar qabyldaý, derbes jylytý júıelerin turǵyn úı jáne qoǵamdyq úı-jaılardan tys jerlerge shyǵarýdy qamtamasyz etý, ıesiz elektr jelilerin anyqtaý jáne balansqa qabyldaýdy jalǵastyrý, sondaı-aq kommýnaldyq jelilerdi energııa berýshi uıymdardyń teńgerimine berýdi qolǵa alý tapsyryldy.
Energetıka, Indýstrııa jáne ınfraqurylymdyq damý mınıstrlikterine aldaǵy jylytý maýsymyna daıyndyq barysyna pármendi baqylaý men monıtorıng júrgizýdi qamtamasyz etý tapsyryldy.
