Jýyrda Aqtóbe oblystyq sotynyń tóraǵasy Erlan Aıtjanov pen Aqtóbe oblystyq sotynyń azamattyq jáne ákimshilik ister jónindegi apellıasııalyq sot alqasynyń tóraǵasy Nursapa Prımashev Shalqar aýdandyq sotyna jınalǵan azamattardy alǵash ret «onlaın» rejiminde qabyldady.
Jýyrda Aqtóbe oblystyq sotynyń tóraǵasy Erlan Aıtjanov pen Aqtóbe oblystyq sotynyń azamattyq jáne ákimshilik ister jónindegi apellıasııalyq sot alqasynyń tóraǵasy Nursapa Prımashev Shalqar aýdandyq sotyna jınalǵan azamattardy alǵash ret «onlaın» rejiminde qabyldady.
Azamattarmen qarym-qatynas jasaýdyń jyldam ári yńǵaıly tásili – joǵary tehnologııanyń úlken jetistigi. Bul jetistiktiń Shalqar aýdanynyń azamattaryna jol shyǵyndaryn únemdep, tikeleı oblystyq sot tóraǵasymen baılanysqa shyǵyp, kókeıkesti suraqtaryn qoıyp, sot jumysy jónindegi pikirlerin aıtýyna múmkindik týǵyzǵanyn aıta ketken oryndy. Jınaqtalǵan birqatar máselelerdi jedel ári sapaly sheshýge múmkindik bergen bul qadam turǵyndarǵa da erekshe áser etti.
Kezdesýge kelgenderdiń biri – Shalqar qalasynyń turǵyny, jeke kásipker Raıkúl Jolasheva boldy. Ol Shalqar aýdandyq sotynyń shyǵarǵan sheshimine qaramastan, «Damý» qorynyń kepildikke qoıylǵan jyljymaıtyn múliktiń qujattaryn bermeı júrgendigine qatysty suraý salǵan edi. О́ńirdiń taǵy bir turǵyny – esh jerde jumys istemeıtin Zeınegúl Qudaıbergenova. Azamatsha qaıtys bolǵan kúıeýi qolhatpen satqan avtokólikti qazirgi ıesiniń óz atyna aýdarý úshin kómek suraǵanyn, sonyń jolyn bilgisi keletinin jetkizdi. Kezdesý barysynda eki turǵynǵa da zań keńesteri berilip, quqyqtyq kómek jasaldy.
Baılanysqa shyǵýshylar arasynda sot júıesi qyzmetkerlerine tilek arnaǵandar da az bolmady. Máselen, Shalqar aýdandyq ardagerler qoǵamynyń tóraǵasy Orazbaı Ádilbaev aqsaqal: «Elimizdiń sot júıesi adamnyń, azamattyń múddesin qorǵaıtyn, buzyqty túzep, aqylsyzdy tezge salatyn, tek shyndyqqa súıenetin bilikti mamandar toby dep esepteımin. Qazirgi ýaqytta halyq ádildikke, durys qazylyqqa, shyndyqqa erekshe muqtaj. Sondyqtan osy rejimniń jumysyn óz deńgeıinde júrgizip, halyqtyń rııasyz yqylasyna bólene berińizder», degen ystyq yqylasyn bildirgen.
«Onlaın» rejimindegi qabyldaýda osyndaı ekijaqty ádemi dıalog quryldy. Kókeıde júrgen biraz másele jóninde naqty túsinik, aqparat alyndy. Bul, árıne, sot jumysynyń jarııalylyǵyn arttyryp, azamattardyń ádil sotqa degen senimin kótereri sózsiz. Osy sharada soǵan kózimiz anyq jetti. Oǵan qatysqan azamattar óz rızashylyqtaryn bildirip, aldaǵy ýaqytta da osyndaı qabyldaýlar ótkizip tursa degen ótinishterin jetkizip jatty. Solardyń biri Ilıa Rezvanov degen azamat bul sharanyń ýaqyt rýhyna saı, ozyq is degen pikirin aıtty.
Jalpy, «onlaın» baılanysqa shyqqan Shalqar qalasy turǵyndarynyń aıtýynsha, Shalqar aýdandyq soty ózge óńirlerden ozyq tur. Máselen, munda aýdandyq sottyń arnaıy saıty týraly da aıtyldy. Onda bul qurylymnyń jumysyna qatysty aqparattar eki tilde únemi berilip, jańartylyp otyrady.
Jaqsy is jalǵasyn tabatyn bolsa, halyq senimi budan ári bekı túsetinine senim mol.
Tursyn QOShAEVA,
Shalqar aýdandyq sotynyń
keńse meńgerýshisi.
Aqtóbe oblysy.
