Qazir №2 oblystyq aýrýhanada koronavırýs ınfeksııasyna shaldyqqan pasıentterge arnalǵan 180 ınfeksııalyq tósek bar. Munda 162 naýqas em qabyldap jatyr. Stasıonardaǵy tósektik orynnyń 90 paıyzy bos emes. Aýrýhanadaǵy 100 oryn ottekti konsolmen qamtamasyz etilgen. Sondaı-aq ókpeni jasandy jeldetetin 12 apparat bar.
Oblystyq densaýlyq saqtaý basqarmasynyń basshysy Nurlybek Qabdyqaparovtyń aıtýynsha, qosymsha 90 tósektik ınfeksııalyq stasıonar salý josparlanyp otyr. Demeýshiler 30 ókpeni jasandy jeldetý jáne 100 oksıgenasııa apparatyn satyp alyp bermek. Al Qurmanǵazy aýdanyna kompıýterlik tomografııa apparaty alynady.
– Ortalyqtandyrylǵan ottegi júıesi joq jerlerge ottegi konsentratoryn ornatý kerek. Eger ottegisiz jumys isteıtin konsentrattar bolsa, ony da satyp alý qajet. Mundaı apparattardy birinshi kezekte muqtaj stasıonarlarǵa jiberińizder, – dedi mınıstr.
Sondaı-aq A.Soı jedel medısınalyq járdem stansasynyń 103 dıspetcherlik qyzmetimen, jedel járdem qońyraýyn qabyldaý, pasıentterdiń jaǵdaıynyń aýyrlyǵyna baılanysty qońyraýlardy suryptaý jumysymen tanysty. Bul stansada 42 jedel járdem brıgadasy medısınalyq kómek kórsetedi. Stansada táýligine shamamen 1100-1200 shaqyrý qabyldanady. Júkteme eki esege artqan.
Oblystyq jedel medısınalyq járdem stansasynyń bazasynda óńir turǵyndaryna konsýltasııalyq kómek kórsetý maqsatynda 103, 109 jáne 112 nómirleri boıynsha táýlik boıy call-ortalyǵy jumys jasaýda. Munda medısına qyzmetkerleri kúnine ortasha eseppen alǵanda 240 ótinishke jaýap beredi. Al mobıldi brıgada bir táýlikte 35 qońyraýǵa qyzmet kórsetedi. Mamandar respıratorlyq aýrý boıynsha shaqyrǵandardan PTR-test kómegimen COVID-19 ınfeksııasyna analız alady. Pasıentti qarap, satýrasııasyn ólsheıdi. Osyǵan oraı, mınıstr mobıldi ámbebap brıgadanyń jumysyn kúsheıtýdi, ambýlatorııalyq dári-dármekpen qamtamasyz etý úshin dárilik zattardy ýaqtyly jetkizýdi, sonymen qatar tapsyrdy.
A.Soı onlaın-rejimde oblystyq densaýlyq saqtaý basqarmasynyń basshysymen óńirdegi epıdemııalyq jaǵdaıǵa qatysty birqatar máseleni talqylady. Atap aıtqanda, ken oryndarynda indettiń órshýiniń aldyn alý, jaǵdaıy aýyr pasıentterdi shuǵyl emdeýdiń ádisin ázirleý, medısına mamandarynyń jetispeýshiligi máselesin sheshý syndy problemalar qozǵaldy.
– Koronataksıge basa nazar aýdarý kerek. Bul iske salony taza kez kelgen taksı aralasa alady. Eger emhanada kólik jetispeı jatsa, bul jergilikti ákimdik kómektespeıdi degen sóz, – dedi mınıstr.
ATYRAÝ
