Máskeýde uzaqqa sozylǵan naýqastan keıin jasy 77-ge kelgen shaǵynda Keńes Odaǵynyń Bas hatshysy Leonıd Ilıch Brejnevtiń kúıeý balasy Iýrıı Chýrbanov qaıtys boldy. Bul týraly «Ýtro.Rý» habarlady.
Iýrıı Chýrbanov óziniń kezekti týǵan kúnine týra bir aı ýaqyt qalǵanda, 7 qazan kúni ómirden ótti. Al jerleý rásimi 10 qazan kúni boldy. Onyń denesi astananyń Mıtıno qorymyna qoıyldy.
«Chýrbanovty jerleýde boldym. Mıtıno qorymy. 77-sine deıin bir aı jetpeı qaldy. Qalaı degende de, ol bir kezeńniń tulǵasy. Jany jánnat bolsyn!» , - dep jazypty óziniń mıkroblogyna Gosdýmanyń depýtaty Aleksand Hınshteın. Onyń sózine qaraǵanda, marqumdy eske alýǵa 20-ǵa jetpeıtin adam kelgen. «Ol bılik basynda turǵanda «dostary» aınalasynda órip júretin edi. Aıanyshty, biraq, ókinishke oraı, tıptik qubylys», - degendi qosty ol.
«Piter.tv» habarlaǵandaı, Chýrbanov 2005 jáne 2008 jyldary eki ret ınsýlt alǵan. Osydan keıin sal bolyp jatyp qalǵan.
Iýrıı Chýrbanov 1936 jyly 11 qarashada Máskeý qalasynda týǵan. Kásiptik-tehnıkalyq ýchılısheni bitirgennen keıin «Znamıa trýda» avıasııalyq toraptar zaýytynda qurastyrýshy-slesar bolyp jumys istedi. Keıin kásiporyn komsomol uıymynyń hatshysy bolyp saılandy. 1964 jyly M.V.Lomonosov atyndaǵy MGÝ-dyń zań fakýltetin bitirdi.
1967 jyly KSRO Ishki ister mınıstrliginiń eńbek túzeý mekemeleri bas basqarmasynyń saıası bólimi bastyǵynyń orynbasary boldy. 1971 jyly mınıstrliktiń ishki ister áskerleri saıası basqarmasy bastyǵynyń orynbasary qyzmetine joǵarylasa, taǵy tórt jyldan keıin bastyǵy laýazymyn aldy.
Iý.Chýrbanov 1977 jyly KSRO Ishki ister mınıstriniń orynbasary dárejesine jetti. Bul qyzmetti 1980 jylǵa deıin atqardy. Sosyn KSRO Ishki ister mınıstrligi Ishki ister áskerleri bas basqarmasy bastyǵynyń birinshi orynbasary jáne orynbasary boldy.
Chýrbanov 1987 jyly О́zbekstanda 1970-1980-shi jyldary oryn alǵan ekonomıkalyq jáne jemqorlyq sıpatyndaǵy qylmystyq isterdi tekserý barysynda qamaýǵa alyndy. Ol túrmeden tek 1993 jyly ǵana bosap shyqty.
Iýrıı Chýrbanov úsh ret úılendi. 1971 jyly ekinshi márte úıli bolyp, G.Brejnevamen qosyldy. Al Galına Leonıdovna úshin bul úshinshi ret nekege turý edi. 1990 jyly Chýrbanov túrmede jatqan kezde Brejnevtiń qyzy onymen ajyrasyp, dúnıe-múlikti bólisip aldy. Chýrbanov úshinshi márte 1994 jyly úılendi.
Sáken Maılybaı.
