Keshe, 12 qazan kúni Qyzylorda qalasynyń 195 jyldyǵyna arnalǵan mereıtoı barysynda «AralAzovAgroMash» BK JShS kásipornynda qurastyrylyp shyǵarylǵan birnshi «IMT Baikonur-549» traktorynyń tusaýy kesildi. Bul týraly oblys ákiminiń baspasóz qyzmetinen habarlady.
«Ústimizdegi jyldan bastap Serbııa eliniń Belgrad traktor zaýytymen birlese traktor qurastyrý jumystary qolǵa alynǵan bolatyn. Ol úshin Qyzylordaǵa 15 dana traktordyń jabdyqtary jetkizildi. Tusaýkeserge Serbııa Respýblıkasynan kelgen arnaıy delegasııa quramynda Serbııa memleketiniń Qazaqstandaǵy ýaqytsha ókili Branıslav Radoıchıch jáne Belgrad «IMT AD» traktor zaýytynyń bas dırektory Zoran Radoslavlıevıch boldy. Sheteldik delegasııany oblys basshysy Qyrymbek Kósherbaev, qala meri Nurlybek Nálibaev jáne «Baıqońyr» ÁÁK» UK AQ tóraıymy Janat Samat bastaǵan top qarsy aldy», - delingen habarlamada.
Jobanyń jetekshisi Ashat Súleımenov oblys ákimine kúrishti destelep orý jatkasyn jáne shóp taılaǵysh mashınasynyń qurastyrý jobasymen tanystyrdy, alǵashqy qurastyrylǵan traktordy kórsetti.
О́z retinde, Syr eliniń basshysy Qyzylordada jınalǵan nómiri birinshi «Baikonur IMT-549» traktordyń kiltin «AgroHoldıng Baıqońyr» JShS dırektoryna tabystady. Al Ashat Súleımenov oblys ákimi Qyrymbek Kósherbaevqa alǵashqy qurastyrylyp shyǵarylǵan traktordyń nómiri kórsetilgen estelik belgini (shıldıkti) tapsyrdy. Tusaýkeser sońynda oblys ákimi kásiporyn ujymynyń eńbekterine tabys tilep, aldaǵy ýaqytta damı berýlerine tilektestigin bildirdi.
Serik Qulymbaı.
