Memleket basshysy Nursultan Nazarbaev belgili memleket jáne qoǵam qaıratkeri, Qazaqstan Respýblıkasy Parlamenti Májilisiniń depýtaty Oral Muhamedjanovtyń qaıtys bolýyna baılanysty týystary men jaqyndaryna kóńil aıtý jedelhatyn joldady. Bul týraly Aqorda.kz habarlady.
Jedelhatta Oral Baıǵonysulynyń iskerlik jáne uıymdastyrýshylyq qabiletimen jastaı kózge túsip, basqarý organdarynda túrli jaýapty qyzmetter atqaryp, mol tájirıbe jınaqtaǵany atap ótilgen.
«Qazaqstan Táýelsizdik alǵan alǵashqy kúnnen Prezıdent Ákimshiliginde jáne Úkimet apparatynda bólimder basqaryp, Parlament Májilisiniń depýtaty, keıin Palata Tóraǵasy bola júrip, óziniń mol bilimi men búkil qajyr-qaıratyn týǵan elimizdi kórkeıtýge, onyń quqyqtyq-zańnamalyq bazasyn qalyptastyryp, nyǵaıtýǵa jumsady. Qaı qyzmette júrse de aqjarqyn minezimen, adamgershilik qasıetterimen áriptesteriniń arasynda árdaıym zor abyroı men bedelge ıe boldy. Onyń eńbegi joǵary memlekettik nagradalarmen atap ótildi», – delingen jedelhatta.
Nursultan Nazarbaev O.Muhamedjanovtyń esimi men Qazaqstannyń damýyna qosqan úlesin halqymyz umytpaıtynyn atap ótken.
