Elordanyń medısınalyq mekemelerine 363 jas maman, onyń ishinde 226 ıntern, 113 rezıdent, 18 bakalavr, 5 magıstrant jáne bir doktorantýra túlegi jumysqa ornalastyryldy. Jas mamandar qalalyq aýrýhanalar, emhanalar, dıspanserler men qalalyq jedel járdem stansııasyna jumysqa ornalasady.
Qazirgi ýaqytta jas mamandardyń 43-i qalalyq juqpaly aýrýlar ortalyǵy men "Ramada Plazadaǵy" provızorlyq stasıonarda orta jáne kishi medısına qyzmetkerleri (maman sertıfıkaty joq) retinde jumys jasaýda.
"Men elordalyq jańa juqpaly aýrýlar aýrýhanasynda meıirbıke bolyp isteımin. Bizdiń dárigerlerdiń qatty kúızelgenin kórip otyrmyz. Sondyqtan, osy qıyn kúnderde biz jumysqa shyǵyp, koronavırýs ınfeksııasymen aýyratyn naýqastarǵa kómektesýdemiz. Biz dárigerlerdiń basshylyǵymen ártúrli prosedýralyq tapsyrmalardy oryndaımyz. Biz dári tamyzǵysh qoıyp, ekpe jasap, naýqastardyń jaǵdaıyn qadaǵalaımyz", deıdi jas maman Jandos Nasybaev.
Sonymen qatar Nur-Sultanda medısına ýnıversıteti men kolledjiniń 200-den astam túlegi pandemııa jaǵdaıynda jumys isteýge oqytyldy. Dárigerler jas áriptesterimen tájirıbelerimen bólisti. Qazirgi ýaqytta olardyń barlyǵy jumysqa alynǵan jáne COVID-19-ben kúresýge atsalysýda.
"Búginde barlyq medısına qyzmetkeri koronavırýs ınfeksııasymen kúreste aldyńǵy qatarda. Jas mamandar, stýdentter de shette qalmaı, bizdiń dárigerlerge belsendi kómektesýde. Tájirıbelik sabaqtyń aıasynda olar koronavırýs ınfeksııasymen aýyratyn naýqastarǵa kómek kórsetý úshin qalanyń medısınalyq mekemelerine barady. Jalpy, medısına ýnıversıteti men kolledjiniń 500-den astam túlegi COVID-19-ben kúresýge atsalysady", dedi Nur-Sultan qalalyq densaýlyq saqtaý basqarmasy basshysynyń mindetin atqarýshy Álııa Rústemova.
Ár medısına uıymynda jas mamandarǵa keńes beretin aǵa maman bar. Barlyq mamandar qajetti jeke qorǵanys quraldarymen qamtamasyz etiledi.
