Búgin qalalyq máslıhat depýtaty Mıras Shekenov, Nur-Sultan ákimdiginiń "Astana - adaldyq alańy" jobalyq keńsesiniń ókilderi, Nur Otan partııasynyń qalalyq fılıaly, sybaılas jemqorlyqqa qarsy is-qımyl agenttiginiń departamenti, sondaı-aq qalalyq jastar saıasaty basqarmasynyń eriktilerinen turatyn arnaıy monıtorıng toby dári-dármek baǵasynyń negizsiz qymbattaýy, sondaı-aq reseptsiz satylýy depekteri boıynsha dárihanalarǵa kezekti monıtorıng júrgizdi.
"Dárihanalardy dári-dármekpen qamtamasyz etý jaqsarýda. Biraq suranysqa ıe birqatar dári-dármekter boıynsha máseleler bar. Kóptegen provızorlar men farmasevtterdiń shaǵymdary boıynsha kóterme jetkizýshiler men dıstrıbıýtorlar birqatar dári-dármekti shekti baǵasynan qymbatqa satýda. Sondyqtan, biz kelesi monıtorıngti iri jetkizýshilerge, olardyń dárihanalarǵa satý kezindegi kóterme baǵalaryn shekti baǵalarmen salystyra otyryp júrgizemiz. Osyǵan baılanysty keıbir dárihanalar qazirgi ýaqytta suranysqa ıe dári-dármekterdi satyp alýdan bas tartýda", – deıdi qalalyq máslıhat depýtaty Mıras Shekenov.
"Biz tórt dárihanany araladyq, olardyń ekeýinde antıbıotıkterdi reseptsiz satý faktisin anyqtadyq. Taǵy bir dárihanada shekti baǵadan qymbastqa satý faktisi tirkeldi: "Geparın" preparaty bir ampýla úshin úsh myń teńgeden satylǵan, óz baǵasy – 500 teńge", – dedi Nur-Sultan ákimdiginiń "Astana - adaldyq alańy" jobalyq keńsesiniń úılestirýshisi Sáýle Bısembaeva.
Materıaldar qalalyq taýarlar men kórsetiletin qyzmetterdiń sapasy men qaýipsizdigin baqylaý departamentine, sondaı-aq odan ári tekserý úshin polısııa departamentine jiberiledi. S.Bısembaevanyń aıtýynsha, qazirgi ýaqytta elorda turǵyndarynan dári-dármekterdiń qymbattaýyna qatysty 40-tan astam ótinish túsken. Habarlanǵandaı, Nur-Sultanda dári-dármek baǵasyn negizsiz kótergendermen kúres kúsheıdi. Dári-dármektiń baǵasy qymbattaǵany anyqtalsa, azamattar iKOMEK 109 biryńǵaı baılanys ortalyǵyna, sondaı-aq +7 775 160 55 32 WhatsApp nómirine habarlama jiberýine bolady.
Sonymen qatar dári-dármekterdiń shekti baǵasyn dari.kz qosymshasy arqyly, ndda.kz resmı saıtynan nemese adilet.zan.kz siltemesi arqyly QR Densaýlyq saqtaý mınıstriniń buıryǵymen tekserýge bolady. Úkimet pen elorda ákimdigi dári-dármekterdi satyp alý men ákelý rásimderin jeńildetý, logıstıka boıynsha qoldaý kórsetýde. Sonymen birge, qalalyq prokýratýra, polısııa departamentteri, memlekettik kirister, ekonomıkalyq tergeý, farmasevtıkalyq baqylaý qyzmetkerlerinen turatyn mobıldi top dári-dármekpen alypsatarlyq faktilerin boldyrmaý úshin kúndelikti jumys isteıdi. Atap aıtqanda, I-teka qosymshasyn qoldana otyryp, áleýmettik jelilerdegi (Instagram, Facebook, telegram, WhatsApp) habarlamalardy zerdeleý arqyly baǵalar únemi qadaǵalanady.
