Tyıymǵa qaramastan bul jerde qala turǵyndary eki jaldamaly úıde demalǵan. Saǵattap jalǵa usynatyn eki jeke monshanyń ıesi de engizilgen shekteý sharalaryn elemegen. Osylarǵa qatysty Ákimshilik quqyq buzýshylyq kodeksiniń 425-baby boıynsha ákimshilik materıal jınaldy.
Bulardan basqa shekteý sharalary engizilgen 3 kúnde SQO polıseıleri karantındi buzǵany úshin 74 materıal rásimdedi. Bul kúnderi shekteýlerdiń saqtalýyn tekserý boıynsha arnaıy qurylǵan jumys toptary jumys istedi. Qyzyljar aýdanynda prokýratýra, polısııa, TJ jáne jergilikti atqarýshy bılik ókilderinen turatyn jumys toby júrgizgen monıtorıng barysynda demalys aýmaqtarynyń taǵy birinde karantındi buzý faktisi anyqtaldy.
Jalpy ótken aptada ýchaskelik polısııa ınspektorlarymen karantındi buzý faktileri boıynsha 150-den astam materıal jınalǵan. Indet juqtyrǵan kezde úıde oqshaýlaný, betperde taǵý rejimin saqtamaǵandary, májbúr bolmas da júrgenderi úshin qala turǵyndary ákimshilik jaýapkershilikke tartylatyn bolady. Keıbir dúkenderde satýshylardyń betperde taqpaı, qolǵapsyz júrgeni anyqtaldy. Sanıtarlyq normalardy saqtamaǵan taksı júrgizýshilerine de qatysty materıaldar jınaldy. Kásipkerler de karantındi buzǵan.
Azyq-túlik emes taýarlardy satatyn saýda oryndarynyń jumysyn toqtatpaǵandarǵa qatysty ákimshilik materıaldar jınastyrylyp, Taýarlar men kórsetiletin qyzmetterdiń sapasyn baqylaý departamentine jiberildi.
"Barlyq jınalǵan materıal boıynsha sot sheshimi qabyldanatyn bolady. Qazirgi ýaqytta biz oblystyń Bas memlekettik sanıtarlyq dárigeriniń qaýlysyn saqtaýǵa baǵyttalǵan kúsheıtilgen túsindirý jumysyn júrgizýdemiz", deıdi Polısııa departamenti Jergilikti polısııa qyzmeti basqarmasy bastyǵynyń mindetin atqarýshy, polısııa podpolkovnıgi Grıgorıı Tysh.
