Úzdikter kóshin Muhammed Álı men Djordj Formen arasyndaǵy «jan alysyp, jan berisken» báseke bastap tur. Asa aýyr salmaqta kúsh synasqan amerıkalyq qos sańlaq 1974 jyldyń 30 qazanynda qazirgi Kongonyń astanasy – Kınshasada eki birdeı altyn belbeýdi sarapqa saldy. Segizinshi raýndta Álıdiń aıqyn jeńisimen aıaqtalǵan bul jekpe-jekten qazirgi aqshaǵa aýdarsaq, 510 mıllıon AQSh dollary kóleminde tabys túsken eken.
Ekinshi jáne úshinshi oryn eshkimnen jeńilip kórmegen amerıkalyq arlan Floıd Meıvezerge buıyrdy. 2015 jyldyń 2 mamyrynda ol fılıppındik Mennı Pakıao jáne 2017 jyldyń 26 tamyzynda ırlandııalyq Konor Makgregormen aıqasyp, ekeýinen de basym tústi. Bul básekelerdiń árqaısysy 500 mıllıon dollar paıda ákeldi.
Sondaı-aq, tabysy mol úzdik ondyqtyń qataryna myna kezdesýler endi: Muhammed Álı men Djo Frezer (01.10.1975) – $500 mln., Muhammed Álı men Djo Frezer (08.03.1971) – $300 mln., Maık Taıson men Evander Holıfıld (28.06.1997) – $281 mln., Floıd Meıvezer men Oskar De La Hoııa (05.05.2007) – $200 mln., Maık Taıson men Pıter Maknılı (19.08.1995) – $177 mln., Floıd Meıvezer men Rıkkı Hetton (08.12.2007) – $160 mln. jáne Floıd Meıvezer men Saýl Alvares (14.09.2013) – $160 mln.
2017 jáne 2018 jyldardyń qyrkúıek aıynda qazaqstandyq Gennadıı Golovkın men meksıkalyq Saýl Alvarestiń eki ret jekpe-jekke shyqqany belgili. Bul básekelerden de mol tabys tústi. Alǵashqy kezdesý 100 mıllıon, qarymta aıqas 117 mıllıon dollar kiris ákeldi. Joǵarydaǵy tizimde bul sáıkesinshe 24 jáne 18 oryndar.
