Belgııa koroldiginiń azamattary úshin 25 shildeden bastap betti tumshalaý mindetteldi. Turǵyndar betperdeni qoǵamdyq oryndarda, 1,5 metrlik ara qashyqtyqty saqtaý múmkindigi joq jerlerdiń barlyǵynda taǵyp júrýi tıis. Sonymen qatar dúkenderdi saǵat 22.00-de jabý mindetteldi. Osyǵan deıin túngi 1-ge deıin jabylmaıtyn oryndar baǵynýǵa májbúr, áıtpese aıyppul tóleý qarastyrylǵan.
* * *
Al Malaızııa úkimeti barlyq azamattarǵa birdeı tumsha taǵý vırýstan saqtanýdyń tıimdi joly dep, ony buzǵandardy túrmege otyrǵyzbaq. Densaýlyq saqtaý mınıstrliginiń bas dırektory Hısham Abdýllanyń «Turǵyndardyń bárine tumsha taǵý mindetteledi. Ásirese halyq kóp júretin oryndarda taqpaı júrý 235 dollar aıyp tóleýge nemese túrmege otyrýǵa alyp keledi», degen sózin The Straits Times jazady.
* * *
Kanada jurtyna da COVID-19 biraz salmaq saldy. Eldiń densaýlyq saqtaý mınıstrliginiń málimetine qaraǵanda, 116,5 myń aýrý juqtyrý tirkelgen.
SARS-CoV-2 Kanadanyń barlyq shtatyna jaıylyp, 8941 adamnyń tirshilik tynysyn toqtatqan. Ásirese Kvebek, Ontarıo shtattary aýrý qıyndyǵyn aıqyn sezinip jatqan kórinedi. Máselen, Kvebekte 59 458 adam KVI juqtyrsa, Ontarıoda 39 333 azamat aýrýǵa shaldyqqan.
* * *
Latyn Amerıkasy memleketterin COVID-19-dyń sharpyǵan jalyny basylar emes. Argentına, Brazılııa, Kolýmbııa turǵyndary aýrý zardabyn aıtarlyqtaı tartýda.
Argentınada sońǵy táýlikte 53 adam dúnıe salyp, al pandemııa bastalǵannan beri 5241 adam qurban bolǵan. Azamattardy aman saqtaý jolynda Argentına úkimeti shekteý sharalaryn tamyzdyń 16-syna deıin uzartyp otyr. Onyń ishinde kóp mólsherde aıyp tóleý qarastyrylǵanymen, vırýs juqtyrý báseńder emes.
Brazılııa densaýlyq saqtaý mınıstrliginiń málimetine qaraǵanda, indet taraǵaly elde aýrý juqtyrǵandardyń sany 2 707 877 adamǵa jetken. Onyń 1 865 729-y jazylyp shyqqanymen, sońǵy bir kún ishinde 1088 naýqas ómirmen qosh aıtysypty.
Kolýmbııa pandemııa patshalyq qurǵaly 10 330 azamatynan aırylǵan. Keshegi kúnniń ózinde 225 pasıent SARS-CoV-2 salǵan qursaýdan shyǵa almaǵanyn habarlaǵan Kolýmbııa densaýlyq saqtaý mınıstrligi elde 1,6 mln adamnyń vırýsqa qarsy test tapsyrǵanyn jetkizdi.
* * *
Ulybrıtanııa Premer-mınıstri Borıs Djonson COVID-19-ǵa qatysty shekteýlerdiń ázirge alynbaıtynyn qynjyla otyryp jetkizdi, dep habarlaıdy Reuters.
«Tamyzdyń basynda shekteýlerdi alyp tastaımyz dep josparlaǵanymyzben, jaǵdaıǵa baılanysty ony qaldyrýdy uıǵardyq. Bul kóptegen adam úshin aýyr soqqy ekenin bilemiz, biraq amandyq bárinen qymbat. Sondyqtan ondaı táýekelge bara almadyq», deıdi Borıs Djonson.
Osylaısha, tumandy Albıonda 1 tamyzdan bastap kópshilik kóńil kóteretin oryndar ashylady. Teatrlarda spektaklder qoıylyp, ártister kórermenmen qaýyshyp, 30 adam jınalýǵa ruqsat beretin túrli qabyldaýlar men úılený toılary ótkizilip, boýlıng klýbtary men kazınolar ashylady dep alaqandaryn ysqylap kútip otyrǵandardyń úmitterine sý sepkendeı. Úkimet basshysynyń aıtýynsha, shekteýler eki aptadan kem bolmaıdy jáne tamyzdyń 8-inen bastap tumsha taǵyp júrý rejimi kúsheıtiledi.
* * *
Afrıkanyń OAR, Nıgerııa, Gana, Aljır, Kenııa, Kamerýn, Kot-d'Ivýar, Efıopııa memleketterine de COVID-19 indeti aýyr tıdi.
Dúnıejúzilik densaýlyq saqtaý uıymy qara qurlyqtaǵy jaǵdaıǵa alańdap otyr. DDU-nyń Afrıkadaǵy ókildigi keshegi kúni 908 344 adamnyń aýrý juqtyryp, pandemııadan 19 308 jannyń o dúnıelik bolǵanyn aıtty. Al tamyz aıynyń alǵashqy kúni SARS-CoV-2 shyrmaýyna 910 395 afrıkalyq ilinip, 19 331 adamnyń kóz jumǵanyn «Africa CDC» habarlady.
* * *
Japondyq «Kyodo agenttiginiń» habarlaýynsha, sońǵy kúnderi Japon araldarynda vırýs juqtyrǵandardyń rekordtyq kórsetkishi tirkelýde.
Máselen, 30 shilde kúni 1305 japondyq vırýs juqtyrsa, 31 shildede SARS-Cov-2 1578 adamnan anyqtalǵan. Al pandemııa bastalǵaly el kóleminde 37 myń adam onyń tyrnaǵyna ilingen eken. Bul statıstıkaǵa «Diamond Princess» laınerinde vırýs juqtyryp, Japonııaǵa kelgen týrısterdiń de engenin aıta ketken jón.
* * *
Robert Koh atyndaǵy Berlın ınstıtýty ótken táýlikte 955 adamnyń vırýs juqtyrǵanyn jazady.
Germanııa jurty da SARS-CoV-2 indetimen kúreske mán berip otyr. Germanııa syrtqy ister mınıstrligi azamattaryna Ispanııanyń Katalonııa, Navarra jáne Aragon aımaqtaryna týrıstik saparǵa barmaýǵa keńes berdi. 31 shildedegi málimetke qaraǵanda, Germanııa boıynsha vırýs juqtyrǵandar sany 209 653 bolyp, 7 pasıent kóz jumǵan. Al pandemııa bastalǵaly 9148 adam ómirmen qosh aıtysqan.
* * *
Nıý-Iorktegi Kolýmbııa ýnıversıtetiniń ǵalymdary antıdeneden jasalǵan kokteıl shyǵarǵandaryn aıtty.
COVID-19-dy tıimdi joıady degen bul kokteıldi ázirge janýarlarda synap kórgen ǵalymdar, qazan aıynda klınıkalyq tájirıbelerdi adamdar arasynda júrgizgileri keletinin málimdedi. Zertteýshiler preparattyń vaksınany almastyra alýymen qatar, onyń emge de paıdalanýǵa bolatyn ámbebap kokteıl ekenin jetkizdi.
Sondaı-aq AQSh bıligi COVID-19-ben kúreste vaksına shyǵaryp, ony jetkizip beretin «Pfizer» kompanııasyna 1, 95 mlrd dollar tóleýge daıyn ekenin aıtty. Ázirge vaksına klınıkalyq testileýden ótýde.
Toptamany daıyndaǵan
Anar TО́LEÝHANQYZY,
«Egemen Qazaqstan»
