Prezıdent Qasym-Jomart Toqaev tanymal qoǵam qaıratkeri, ekolog, ekonomıka ǵylymdarynyń doktory Saltanat Temirqulqyzy Rahymbekovanyń dúnıeden ótýine baılanysty onyń jubaıy, "Ulttyq agrarlyq ǵylymı-bilim berý ortalyǵy" kommersııalyq emes aksıonerlik qoǵamynyń basqarma tóraǵasy Tóleýtaı Rahymbekovke jáne otbasy men jaqyndaryna kóńil aıtyp, jedelhat joldady.
"Saltanat Temirqulqyzy ár jyldary qorshaǵan ortany qorǵaý, turǵyn úı-kommýnaldyq sharýashylyǵy salasyn jetildirý, sondaı-aq, "Jasyl" ekonomıkany damytý baǵytynda kóp is atqardy. Qazaqstannyń kásipker áıelderi odaǵynyń teń tóraıymy, Qazaqstan Azamattyq alıansynyń prezıdenti bolyp, elimizdegi saıası-qoǵamdyq jumystarǵa belsendi atsalysty. Marqumnyń jany jánnatta, ımany salamat bolsyn", delingen jedelhatta.
