Aımaqtar • 16 Tamyz, 2020

Aqtóbelik júrgizýshi SQO polıseılerine alǵys bildirdi

28 ret kórsetildi

Jýyrda Jezqazǵan-Petropavl tas jolynyń 739 shaqyrymynda SQO PD patrýldik polısııa batalony komandıriniń orynbasary Ýálıhan Orazalın men SQO PD PPB Birinshi vzvody komandıriniń mindetin atqarýshy Dmıtrıı Beloýsov joldyń jıeginde toqtap turǵan júk kóligin baıqaıdy. Bul  Aqtóbe qalasynyń turǵyny Iýrıı Ismagýlovtyń 20 tonna kebek tıelgen júk kóligi eken. Aýyr salmaqty eski dóńgelek kótere almaı jalba-julbasy shyǵyp, jarylǵan.

Kombattyń orynbasary qyzmet kórsetetin ekıpajdy shaqyryp, PPB qyzmet ınspektorlary Narasan Álimjanov pen Ernar Muqanov kómekke keldi. Júrgizýshi men polıseıler kólikti bir saǵattan asa ýaqyt birlese jóndedi. «Olar basynan aıaǵyna deıin birge bolyp, maǵan kómektesti,- dep esine aldy Iýrıı Ismagýlov. – «Shyny kerek, tórt ofıserdiń maǵan kómektesip, «qara jumyspen» aınalysyp jatqandaryna ózim yńǵaısyzdanyp edim olar: «Bizdiń jumysymyz – joldaǵy tártip. Sen ornyńnan qozǵalmaıynsha, biz eshqaıda ketpeımiz» -dedi. Men 2000 jyldan kólik tizgindep kelemin, jol ústinde kópti kórdim, biraq búgingi kúnge deıin mynandaı kóńil bólýdi kezdestirmeppin. Bular senýge bolatyn naǵyz azamattar eken»...

Birshama ýaqyt ótken soń jolda kele jatqan aýyr júk kóliginiń júrgizýshisi patrýldik polıseılerge habarlasqan. Polıseılerge razy bolǵan júrgizýshi alǵysyn jaýdyryp: «Aqtóbede bolsańyzdar, esigim árdaıym ashyq, meniń nómirimdi bilesizder, qonaqqa kelińizder...» - degen eken.

«Jolaýshynyń qaýipten aman bolýy – biz úshin basty alǵys. Alǵys sózderi qýanysh syılap, qyzmettiń qıyn sátterinde tózimdi bolýǵa kómektesedi. SQO-da júrgizýshiler de kómek kórsetip turady, polıseılerdiń turǵanyn kórse de, ótip ketpeı kómekterin usynyp jatady. Bul qýantady, sebebi jol qozǵalysy qatysýshylarynyń bir-birine qurmet kórsetýi- joldaǵy tártiptiń mańyzdy sharttarynyń biri», deıdi Ý.Orazalın.

Sońǵy jańalyqtar

Uqsas jańalyqtar