Beldikterge túsetin salmaqtyń saqtalýy zańmen bekitilgen. Biraq soǵan qaramaı aýyr júk tasıtyn aýdarǵysh mashınalar shamadan tys júkterdi ala beredi. Joldar negizinen osy sebepterden búline bastaıdy. Ásirese, oblystaǵy karerlerden ınertti materıaldardy tasymaldaıtyn aýyr salmaqty kólikter joldy tez buzady. Sondyqtan elimizdegi Kólikti baqylaý ınspeksııasy degen arnaıy qyzmet olardyń jolǵa shamadan tys salmaq túsirmeýin qatań baqylaýy kerek.
Jýyrda Soltústik Qazaqstan oblysynyń Kólikti baqylaý ınspeksııasynyń bastyǵy Rýslan Seıtalın men Indýstrııa jáne ınfraqurylymdyq damý mınıstrliginiń Kólik komıtetiniń ahýaldyq sarapshysy Sultan Musaǵalıev jýrnalısterge brıfıng berip, osy máselelerdiń oblysta baqylanýy barysy týraly aıtyp berdi. R.Seıtalın óziniń baıandamasynda 2020 jyldyń 7 aıynda oblysta barlyǵy 2893 avtokólik quraly tekserilip, olarda anyqtalǵan zań buzýshylyqtar faktileri boıynsha ınspeksııa qyzmetkerleri 31,0 mln. teńge aıyppul salý týraly 413 ákimshilik materıal toltyrǵanyn jetkizdi.
«Kólik zańnamasyn buzý boıynsha tamyz aıynda ǵana 55 ákimshilik materıal jazylǵan. Negizgi buzýshylyqtar – tasymaldaýshylar men júk jóneltýshilerdiń júkterdi ruqsat etilgen salmaqtyq parametrlerden asyryp jiberýi bolyp tabylady, dedi ol.
Sonymen qatar R.Seıtalın óziniń sózinde júk avtokólikteriniń júrýin baqylaýdy kúsheıtý jáne tájirıbe almasý maqsatynda Soltústik Qazaqstan oblysyna Kólik komıteti ahýaldyq ortalyǵynyń mobıldi tobynyń quramynan sarapshy Sultan Musaǵalıev kelgenin jáne onyń qatysýymen bolǵan reıdtik is-sharalar týraly aıtty. Osy reıd kezinde bir tasymaldaýshy tarazyǵa turýdan bas tartqan. Bul oqıǵa aǵymdaǵy jyldyń 10 tamyzynda saǵat keshki alty shamasynda Beskól aýylynyń mańaıynda bolǵan. Inspeksııa qyzmetkerleriniń talabyna baǵynbaǵan júrgizýshi Reseı Federasııasynda tirkelgen eken. Al ol tasyǵan ınertti materıal – qıyrshyq tastyń jalpy salmaǵy 20 tonnadan asqan. Inspeksııa mamandary toqtatqannan keıin AKQ-nyń júrgizýshisi MAZ júk kóligin tastap, jeńil avtokólikpen belgisiz baǵytqa ketip qalǵan. Bul týraly ınspeksııa mamandary SQO PD kezekshi bólimine jedel aqparat beredi. Shamamen 1 saǵattan keıin MAZ avtokóliginiń júrgizýshisi qaıtyp kelip, manevr jasap, jol tóseminiń bir bóligin basyp alyp, jol jıegine qıyrshyq tasty túsiredi. Tekserý úshin toqtatylǵan avtokólik quralynyń júrgizýshisiniń jáne laýazymdy tulǵalardyń is-áreketteri qyzmettik beınejetonǵa tirkelgen. Qazir oǵan buzýshylyq qylyqtary úshin ákimshilik materıaldar jınalyp, 143,1 myń teńge somasynda aıyppul salynypty.
Bul qıyrshyq-tas tasıtyn aýyr salmaqty kólikter júrgizýshileriniń ospadarlyq qylyǵynyń bir kórinisi ǵana. Osynyń ózi ondaılarǵa baqylaýdy jıi jasaýdyń qajettigin kórsetedi.
Kólik komıtetiniń ahýaldyq sarapshysy Sultan Musaǵalıev óziniń sózinde kóliktik baqylaý organdary aǵymdaǵy jyldyń alǵashqy jartyjyldyǵynda elimiz boıynsha barlyǵy 11543 ákimshilik quqyq buzýshylyqty anyqtaǵanyn, onyń ishinde 1744-i salmaqtyq parametrlerdiń shamadan tys asyp ketkeni ekenin, solardyń 800-den astamynda is karerlik aýdarǵyshtardyń tasymaldaýshylaryna qatysty qozǵalǵanyn jetkizdi. «Qazir kóliktik baqylaýdy júzege asyrýdyń, atap aıtqanda, avtokólik quraldaryn ólsheýdi júrgizýdiń ashyqtyǵyn qamtamasyz etý maqsatynda kóliktik baqylaý beketteri ólsheý nátıjeleri týraly derekterdi Kólik komıtetiniń ahýaldyq ortalyǵyna avtomatty túrde berý fýnksııasy bar tarazy jabdyqtarymen qamtamasyz etilgen. Sondaı-aq, 2019 jyldyń 14 shildesinen bastap qyzmetkerlerdiń avtomobıl kóligi salasyndaǵy kóliktik baqylaýdy júzege asyrý kezinde Ahýaldyq ortalyqqa onlaın-rejimde beıne derekterdi berý fýnksııasy bar 102 birlik beınejetondardy qoldanýy engizildi», dedi ol óziniń sózinde.
Kólik baqylaý ınspeksııasynyń mindeti zor. Eger osy qyzmet ózderiniń mindetin tıimdilikpen atqaratyn bolsa joldardyń buzylýy da azaıar edi. Al ol mıllıardtaǵan teńge bıýdjet qarajatyn únemdeýge jol ashady.
Soltústik Qazaqstan oblysy
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
