Konstıtýsııa kúni qarsańynda Taraz qalasyndaǵy "Araı-2" yqshamaýdanynda shahar turǵyndaryna páter kiltteri tabystaldy. Atalǵan 90 páterli kópqabatty turǵyn úı "Nurly jer" baǵdarlamasy aıasynda boı kótergen.
Al atalǵan turǵyn úıdiń qurylysyn merdiger kompanııa "Bınom" jaýapkershiligi shekteýli seriktestigi júrgizgen. Baspanaly bolǵandardyń qatarynda az qamtylǵan, tolyq emes otbasylar, jetim balalar jáne áleýmettik osal toptaǵy basqa da azamattar bar. Jambyl oblysynyń ákimi Berdibek Saparbaev baspana ıelerine páter kiltterin arnaıy tabystap, turǵyndardy qonys toılarymen quttyqtady.
"Memleket basshysynyń tapsyrmasymen júzege asyrylyp jatqan memlekettik baǵdarlamalar qazaqstandyqtardyń jaıly ómir súrýine, árkimniń baspana jáne jumyspen qamtylýyna baǵyttalǵan. Búgingi qonys toıy – sonyń aıǵaǵy. Qurylys qarqyny jyl saıyn artyp keledi. Aǵymdaǵy jyldyń 7 aıynda 270 myń sharshy metrden astam turǵyn úı salyndy. Jańa baspanalarǵa birinshi kezekte halyqtyń áleýmettik osal toptaryndaǵy otbasylar qol jetkizýde. Barshańyzdy qos mereke – Konstıtýsııa kúni jáne qonys toılaryńyzben quttyqtap, baq-bereke, yrys-yntymaq tileımin", dedi Berdibek Saparbaev.
Bul kúni birqatar tarazdyq jańa páterge ıe boldy. Máselen, osy kúni baspanaly bolǵan Jamılıa Nıkoshenko osy kúndi 11 jyl boıy kútipti. Ol otbasymen uzaq jyldar boıy jaldamaly páterlerde turyp kelgen. Jamılıa Nıkoshenko úsh balany jalǵyz tárbıelep otyrǵan ana. Balalarynyń úlkeni 12 jasta bolsa, qyzy 6 jasta eken.
"Búgin men úshin óte erekshe kún. Baspanaly bolǵanymyzǵa qýanyshtymyn. Balalarǵa da jańa aýdan óte unady. Úsheýi de endi úıimizge jaqyn ornalasqan №3 mektep-gımnazııasyna barady. Bul men úshin de yńǵaıly", deıdi ol.
Sol sııaqty, baspanaly bolǵan jalǵyzbasty ana Ardaq Qaıkıeva da 10 jyl boıy páter kezeginde turǵan eken.
"Páterimiz jaıly, bólmeleri keń, jaryq ári jyly. Barlyq jaǵdaı jasalǵan. Bizdiń óz kúshimizben mundaı baspanaǵa qol jetkizýimiz ekitalaı edi. Osyndaı qoldaý úshin memleketke alǵysymyz sheksiz", deıdi Ardaq Qaıkıeva. Páter kiltin alǵan turǵyndardyń biri Jánibek Baıtursynov ta óz qýanyshymen bólisti. Oǵan eki bólmeli páterdiń kilti tabystalǵan. Onyń balalar úıiniń túlegi retinde páter kezeginde turǵanyna birneshe jyl bolypty. Ol da joldasy ekeýi kishkentaı bala tárbıelep otyrǵan jas otbasy ekenin aıta kelip, baspanaly bolǵanyna qýanyshty ekenin jetkizdi.
Búginde Taraz qalasy boıynsha baspana kezeginde barlyǵy 18 myń 887 adam tur eken. Aǵymdaǵy jyl basynan beri oblys ortalyǵyndaǵy 15-shaǵyn aýdanda 80 páterlik 4 úı, al Araı-2 turǵyn alabynda 90 páterlik bir úı boı kótergen. Endi jyl sońyna deıin 22 turǵyn úıdiń qurylysyn aıaqtaý josparlanýda.
