Onlaın formatta uıymdastyrylǵan basqosýǵa tarıhshylar, saıasatkerler men azamattyq qoǵam belsendileri qatysyp, taqyryp tóńireginde keleli oılarymen bólisti. Konstıtýsııanyń el ómirindegi máni men mańyzy týrasyndaǵy paıymdy pikirlerin bildirdi.
"1993 jyly qabyldanǵan Qazaqstan Respýblıkasynyń alǵashqy Ata zańy egemendik tarıhyndaǵy demokratııaǵa negizdelgen qujat bolyp tabyldy. Táýelsizdiktiń eleń-alań jyldarynda kópshiliktiń talqysyna usynylyp baryp qabyldanǵan bul qujat Elbasynyń atap kórsetken maqsaty boıynsha tórt basty máselege jaýap berýi tıis edi. Onyń birinshisi – memlekettik bılikti basqarýdyń barlyq júıesin nyǵaıtý, ekinshisi – ekonomıkalyq reformany júrgize otyryp, eldi sol kezdegi daǵdarystan shyǵarý, úshinshisi – jas memlekettiń syrtqy saıasatyn qalyptastyrý jáne tórtinshisi – ishki saıası turaqtylyqty qamtamasyz etý. Shırek ǵasyr boıy el Konstıtýsııasy bul mindetterdi oryndap kele jatqanyna búginde kýá bolyp otyrmyz", – dedi Qyzdar ýnıversıtetiniń Áleýmettik damý jónindegi prorektory Jańagúl Sultanova jıynnyń ashylýynda.
Basqosýda sóz alǵandar Qazaq eliniń Ata zańy ýaqyt synynan súrinbeı ótip, tarıhı damýymyzdyń jalpyulttyq baǵdaryn aıqyndaýda basty mánge ıe bolyp otyrǵanyn atap ótti.
"Konstıtýsııa memlekettiligimizdiń berik irgetasyn qalaı otyryp, ishki saıası turaqtylyqty qamtamasyz etýge jáne Qazaqstan qoǵamyn biriktirýge zor úles qosty. Osy jyldar aralyǵynda ol ultaralyq tatýlyqtyń altyn dińgegine aınaldy. Búkil halyqtyń ıgiligin kózdeıtin Ata zań qoǵam men bıliktiń turaqtylyǵyn qamtamasyz etip qana qoımaı, Qazaqstannyń álem tanyǵan memleketke aınalýyna oń yqpal etti. Elimiz – zaıyrly memleket. Aıqara ashylǵan qushaǵyna, keń qoltyǵyna san taǵdyrly myńdaǵan ultty biriktirip jatyr. «Bereke bastaý birlik, el ishi tatý tirlik» demekshi, el basyna kún týyp, er etigimen sý keshken qıyn-qystaý zamandarda kıiz týyrlyqty qazaq ultyn ult retinde saqtap qalǵan birligi men yntymaǵy desek, artyq aıtqanymyz emes", – dedi jıynǵa qatysýshylar.
