Nátıjesinde ınfeksııalyq bólimdegi oryn sany 520 tósekten 250 tósekke deıin, al provızorlyq tósek sany 3560 orynnan 1407 orynǵa deıin qysqardy. Sońǵy málimet boıynsha aımaqta 645 adam stasıonarlyq em alýda eken. Onyń elý besi ınfeksııalyq bólimderde jatqan bolsa, 590 naýqas provızorlyq bólimdegi dárigerlerdiń baqylaýda. Jalpy juqpaly aýrýlar stasıonarynyń oblys boıynsha júktemesi 22 paıyzdy quraıdy. Árıne, aımaqtaǵy koronavırýs indetin juqtyrýshylar sanynyń azaıýy men ókpe qabynýynyń báseńdeýi qýanarlyq jaǵdaı. Alaıda, indetpen kúres jumysyna salǵyrt qaraýǵa bolmaıdy. Qazir barlyq múmkindik indettiń qaıtalanýynan týyndaıtyn qaterdiń aldyn alýǵa baǵyttalýda. Osy maqsatta medısına mekemeleriniń materıaldyq-tehnıkalyq bazasyn nyǵaıtýǵa jáne koronavırýstyń ekinshi tolqynymen kúresý úshin oblystyq bıýdjetten 6,6 mlrd teńge qarjy bólingen. Bul qarjynyń qomaqty bóligi kompıýterlik tomograf, pýlsoksımetr, vıbroakýstıkalyq apparat, rentgen apparaty, ókpeni jasandy jolmen jeldetý apparaty, aýa konsentratorlary sııaqty qural-jabdyqtar satyp alǵa jumsalýda. Sonymen qatar dertti emdeýmen aınalysatyn emhanalar men aýrýhanalardyń aýmaǵyna kıslorod stansalary qoıylýda.Turǵyndarǵa alǵashqy dárigerlik kómek kórsetýdiń sapasyn arttyrý úshin qosymsha 140 jedel járdem kóligine tapsyrys berilgen. Sondaı-aq, jumys istep turǵan 8 PTR zerthanasynyń aýqymyn 3500 adamdy qabyldaýǵa deıin ulǵaıtý kózdelgen. Qazir bul ortalyqtar kúnine 1500 adamǵa deıin qyzmet kórsete alady eken.
- Koronavırýstyń ekinshi tolqynyna daıyndyq qyzý júrip jatyr. Aımaqtyń ınfeksııalyq jáne provızorlyq stasıonarlarynda 250 myńnan astam qyzý túsiretin, vırýsqa qarsy preparattar men antıbıotıkter bar. Jergilikti bıýdjetten dárilik zattar rezervin qalyptastyrý úshin 550 mln teńge bólindi. Búginde medısınalyq uıymdar men dárihanalarda dári-dármek tapshylyǵy joq. Karantın kezinde naýqastardy emdeýge 3 455 medısına qyzmetkeri, onyń ishinde 851 dáriger jumyldyrylǵan bolatyn. Sonymen qatar medısnalyq oqý oryndarynyń 45 túlegi men 281 medkolledj bitirýshi de bizdiń qatarymyzdan tabyldy. Zeınetke shyqqan dárigerler de naýqastarǵa konsýltasııalyq kómek kórsetti. Osyndaı jumyla jumys isteýdiń nátıjesinde indettiń alǵashqy kezeńine toıtarys berdik. Qazir oblysta 165 jedel járdem brıgadasy jumys isteıdi. Shaqyrý boıynsha úıde ambýlatorııalyq kómek kórsetý úshin 391 mobıldi brıgada quryldy. Taǵy da 100 jedel járdem kóligi satyp alynady. «Jaman aıtpaı, jaqsy joq» degen, Jetisý dárigerleri bolýy yqtımal indet qaýpine tótep beredi degen senim bar, - deıdi oblystyq Densaýlyq saqtaý basqarmasynyń basshysy О́mirzaq Nııazbekov.
Aıtpaqshy, densaýlyq saqtaý salasyn sıfrlandyrý baǵytynda da biraz is atqarylǵan. Jalpy, medısınalyq qujattamany qaǵazsyz júrgizýge 53 medısınalyq mekeme qosylyp, elektrondy formatqa 224 nysan kóshirilgen eken. Onyń ishinde turǵyndardyń 98,1 paıyzynda elektrondy densaýlyq pasporty bar. Iаǵnı, 1 997 750 adamnyń naýqas tarıhyn sıfrly júıe arqyly zerdeleýge múmkindik bar. Al oblystyq, qalalyq jáne aýdandyq deńgeıdegi aýrýhanalardyń ınternetke qosylýy 100 paıyzǵa jetse, shalǵaı eldi mekenderdi ǵalamtormen qamtý 84 paıyzdyń shamasyna jetip otyr.
