Sheteldik kásiporyndar sharapaty­

Osyǵan baılanysty jergilikti bı­lik oblystyq aýrýhananyń, Atyraý qalasy men aýdandardaǵy ózge de emdeý oryndarynyń janynan qosymsha stasıonarlar ashýǵa májbúr boldy.

Mine, osy sebepten, taǵy bir ın­fek­sııalyq aýrýhananyń qajettigi týyn­dady. Árıne, aldyn ala bıýdjetten qarjy qarastyrylmaǵandyqtan, qapelimde mundaı emdeý ornynyń qurylysyna qarjy tabý da ońaı emes. Degenmen oblys ákimi Mahambet Dos­muhambetov óńirdegi munaı-gaz ónerkásibinde jobasy bar kompanııalardy demeýshilikke tartty. Sóıtip, Kaspıı teńiziniń qazaqstandyq sekto­ryndaǵy «Qashaǵan» jobasynyń ope­ra­tory – NCOC kompanııasynyń qa­rjylaı qoldaýymen tamyzda Atyraý qalasynda modýldi aýrýha­nanyń qurylysy bas­taldy. Ob­lystyq densaýlyq saqtaý basqarma­synyń basshysy Nurlybek Qabdyqaparovtyń málimetine súıensek, qazanda paıdalanýǵa beriletin jańa aýrýhananyń burynǵy emdeý oryndarynan ózgesheligi kóp bolmaq. Máselen, medısınalyq blokta zerthana, KT, rentgen apparattary, bronhoskopıkalyq qural-jabdyqtar, ÝZI, elektrokar­dıo­graftar ornalastyrylady.

– Bul óńirdegi ekinshi juqpaly aýrýlar aýrýhanasy bolǵandyqtan, mun­daǵy oryn sany 200 kereýetke arnalyp otyr. Mundaı aýrýhanada ju­mys isteýge irikteletin jergilikti medı­sı­na qyzmetkerlerine talap kúsheıti­ledi. Sol sebepten, olardy qaıta oqy­tý ar­qyly qabyldaýdy oılastyryp otyr­myz, – deıdi N.Qabdyqaparov. Qa­zir jańa nysannyń qurylysyn «BI Industrial» kompanııasy júrgizip jatyr. Aýrýhana ǵımaraty jyldam qurastyrylatyn modýldi bloktardan turǵyzylýda. Medısına qyzmetkerleri men em alýshylardyń qaýipsizdigin qamtamasyz etetin zamanaýı dıagnos­tıkalyq qural-jabdyqtarmen jab­dyqtalady. Medısınalyq nysanda eki orynǵa arnalǵan 56 palata, úsh oryndyq 16 palata, bir oryndyq 6, sondaı-aq arnaıy eki oryndyq 7 boks aýlaǵa shyǵatyn arnaıy esigimen salynýda. Al qarqyndy terapııa bóliminde 20 kere­ýet, qabyldaý-dıagnostıkalyq bóliminde bes boks jasaqtalady.

Taǵy bir sheteldik kompanııanyń demeýshiligimen aýrýhananyń qu­ry­­lysy Jylyoı aýdanynda jú­rip jatyr. Aýdan ortalyǵy – Qul­sary qalasyndaǵy bul nysannyń qury­ly­syna «Teńizshevroıl» JShS-nyń «Igi­lik» baǵdarlamasymen 7175,4 mln teńge bólindi. Bıylǵy mamyrda bastaý alǵan qurylys jumystary kelesi jyly paıdalanýǵa tapsyrylmaq.

Jobaǵa sáıkes, alǵashqyda aýrýha­nanyń negizgi korpýsynda 55 oryn bo­latyny josparlanypty. Balalar bólimshesine 10, ınfeksııalyq bólimshege 10 oryn arnalyp otyr. Alaıda oblys ákimi Mahambet Dosmuhambetov elimizde alǵash qurylyp, «Teńiz» kenishin ıgerip jatqan «Teńizshevroıl» JShS-nyń basshylaryna aýrýhanadaǵy oryndy kóbeıtýdi usyndy. Bul árıne bekitilgen qosymsha ózgeriske ushyraıtyny daýsyz. Desek te, sheteldik ınvestorlarmen birlese qurylǵan kompanııa basshylary bul usynysqa túsinistikpen qarap, aýrýhana jobasyna qosymsha naqtylaýlar engizdi. Sóıtip qurylys jumystary endi qarqyn alǵan jańa aýrýhanadaǵy kereýet sany 200 orynǵa kóbeıetin boldy.

Jobalaýshylardyń túsindirýinshe, aýdanda boı kóterip jatqan aýrýhananyń úlken qalalardaǵy nysandardan kemdigi joq. Osy zamanǵy jabdyqtarmen qamtylatyn kir jýatyn bólmeler, kólik garajy, baqylaý-tekserý beketteri, órt sóndirý jabdyqtary da jańa nysannyń ereksheligin aıqyndaı túsedi. Tipti munda 65 tekshe metr taza sý jınaıtyn sısterna, septık, pasıentter úshin avtoturaq qarastyrylypty. Qurylys jumysyna jergilikti turǵyndar tartyldy.

Taǵy bir másele – derbes ottegi je­lisiniń joqtyǵy. Tek oblystyq aýrýha­nadaǵy ottegi tasymalyn júzege asyratyn 60 núkte epıdemııalyq ahýal ýshyqqan kezde azdyq etti. Sondyqtan bul aýrýhanada ottegi jelisin 300 núk­tege deıin kóbeıtý qolǵa alyndy. Onyń 260 núktesi aýrýhananyń jańa ǵımaratyna tartyldy. Derbes seh ózdiginen ottegi óndiredi.

Oblystyq densaýlyq saqtaý bas­qarmasynyń basshysy N.Qabdy­qa­pa­rovtyń aqparatyna súıensek, buǵan qosa oblystyq kardıologııalyq ortalyq pen №2 oblystyq ınfeksııalyq aýrýhanada da ottegi sehyn jasaqtaý jos­parlanypty.

– Budan buryn Mahambet aýdanyn­daǵy 100 kereýettik ınfeksııalyq stasıonarda 12 ottegi núktesi tartylǵan bolatyn. Aldaǵy ýaqytta onyń sanyn kóbeıtýdi josparlap otyrmyz. So­nymen qatar Qurmanǵazy aýdanynda jańadan salynyp jatqan aýrýhanaǵa da ottegi jelisiniń núktesi tolyqtaı tartylady. Odan keıin Qyzylqoǵa, Ma­qat, basqa da aýdandarǵa ottegi jeli­lerin tartýdy josparladyq, – deıdi N.Qabdyqaparov.

Atyraýdyń tabıǵı baılyǵynan ta­bys tabýǵa kelgen sheteldik kásip­oryndardyń sharapaty aýrýhanalar qurylysyn júrgizýge tıip otyr.

Atyraý oblysy