Qaraqattaı qyzdyń qalyńmalyn syrttan synap turǵan abysyn-ajynnyń biz de sybaǵaly bolatyn shyǵarmyz degen mináıi minezi, kórshi-qolańnyń kúndesshe kúńkili men kúbiri, jaqyn-juraǵattyń kirpideı jıyryla qalýy óz aldyna bólek josyn. Árkim ár nárseden bir dámetip, toǵyshardaı toptalyp, tildep, timiskilep tisin batyrýda. Arany ashylǵan aǵaıynnyń ábestigin ańdaǵan sý jańa qudalardyń da sózi suıylǵan. Bolmashyǵa bordaı tozyp, balaǵattaı jónelgen jamaǵattyń aldynda belge soqqan jylandaı turyp qaldy. Jınap, syılap ákelgen dúnıeń jumyrymyzǵa juǵyn bolmady, shyǵyp keter jol áne degendeı, kerdeńdegen júzi sýyq kisilerdiń júreginiń qattylyǵyna qaıran. Burymdysynyń baǵy ashylyp, barǵan jerine tastaı batyp, sýdaı sińýine tilek bildirgenniń ornyna kıiz keýdelenip, kesim aıtyp, keshirimin almaı kústalanýy kóńilderine kóleńke uıalatty. Eki ortada bir-birin súıe qosylǵan eki jastyń sezimin tabalap, búginine búlik salǵany jandaryna batty-aý, sirá. Balasynyń baqytyn oılap olar únsiz. Eski joralǵyny aǵash atqa mingizbeı, az da bolsa kópteı kórýin ótingen jigit jaq iltıpatpen izet bildirip álek.
Kilem ústine jaıylǵan jańa qudalardyń jón-joralǵysy anaý aıtqandaı jaman da emes. Alystan baqylap turǵan biz sonshama taıaq astyna alardaı másele kórmedik, tipti. Tek adamdardyń nıetiniń buzylǵany men qanaǵatynyń qaǵanaǵynan qaǵynǵanyn uıattyń úlkenine balap turmyz. At-shapan aıybyna at mingizdi, sandyq toly syıyn berdi, altynmen aptady, kúmispen kúptedi. Odan artyq ne kerek?!
Álimsaqtan kele jatqan ata dástúrdi aıaqqa taptaǵan joq. Kórpesine qaraı kósildi. Ádet-ǵurpymyzdyń ádepki adymyn jasady. Aldyn kesip ótpedi. Aqıqatyn aıtty. Iilip jastyq, jaıylyp kórpe boldy. Tektilikten túren tartty. Jibek oramal japty. Aqmanar shapan kıgizdi. Aǵaıyndy bóle-jarmady. Alysyn ańdatty, jaqynyn jarylqady. Shetqaqpaılamaı, shama-sharqynsha úlkeniniń de, kishisiniń de kóńilin aýlap, qurqol qaldyrmady. «Bizdiń qyzdyń úsh dıplomy bar», dedi doldana, býyrqana sóılegen qatyn-qalash. – «Jumysynda bedeldi. Qyzyǵyp, úı torýyldap júrgender kóp. Jibi túzý jigit tabylady. Qalyńmalyn qatyryp ákelem degender de az emes. «Teń-teńimen, tezek qabymen» degen. Biz azsynyp otyrmyz», – dep shymshyp sóıledi.
Quda men qudaǵı qyzaraqtap, sasyp qaldy. Ne bolar eken dep biz de qobaljı bastadyq. Dostyq ráýishpen ymyraǵa júginýin tiledik. Qaıta qudaı ońdap, qarııa kılikti araǵa. Istiń nasyrǵa shaýyp bara jatqanyn ańdasa kerek. Aqsaqal aǵaıynǵa basý aıtyp, kórgensizdik kórsetpeýin surady. Eki jastyń ortasyna esi ketken túsedi dep eskertti elge. Arǵy elmen bergi buqaraǵa kópir bolǵan eki jastyń ystyq mahabbatyn sýytpaı, dúbára dúnıege qunyqpaı, erteńine elshi bolar ulaǵatty lebiz bildirýin, berekege basuıytqy bolýyn tiledi. Sodan keıin qyz jaqtaǵylar qyńyr minezin qysqartyp, sabyrǵa kelip, áńgimesin ary jalǵady. «Ýh» dep bir tynystadyq sol mezette. Dosymyzdyń mańdaıynan aqqan ashy ter endi qurǵaı bastaǵandaı boldy.
Qazaqtyń nıeti buzylǵany ma? Álde salt-dástúrdiń soraby ma bul? Osy eki suraq óz ıirimine tarta berdi sol sátte. Dástúrimizdiń dańqty dáýiri artta qalsa da, jamandyqqa qımaıdy ekensiń. О́z qazaǵyńa taǵy da oq ata almaısyń. Zaman qubylǵan saıyn, pendeniń párýaıym peıili de tarylyp bara jatqan sııaqty. Buǵan ne deısiz, aldııar oqyrman?
