Atalǵan formattaǵy ant qabyldaý rásimi sanıtarlyq-gıgıenalyq talaptardy saqtaý maqsatynda uıymdastyrylǵan. Saltanatty shara áskerı ınstıtýttyń resmı saıtynda jáne ınstagram akkaýntynda kórsetildi. Áskerı ómirge jańadan qadam basqan perzentteri úshin mańyzdy sátti ata-analary onlaın-kórsetilim arqyly tamashalady.
Radıoelektronıka jáne baılanys áskerı-ınjenerlik ınstıtýtynyń bastyǵy general-maıor Asqar Mustabekov áskerı anttyń áskerı qyzmetshiler úshin qanshalyqty mańyzdy ekenine toqtala kele, aldaǵy oqý jylyna sáttilik tiledi.
"Áskerı qyzmetshiniń saıası-moraldyq, jaýyngerlik qasıetteri – áskerı antqa adal bolýy, erjúrektigi men qyraǵylyǵy. Ant qabyldaǵan kezde jaýynger batyl bolýǵa ant beredi. Batyldyq, erlik degenimiz – jaýyngerdiń eń qıyn, qaýipti jaǵdaılarda da óz ómiri úshin qorqynysh sezimin jeńip, óz Otanyn qorǵaý úshin erlik jasaýǵa barǵany", dedi áskerı oqý mekemesiniń basshysy.
Áskerı ınstıtýttyń tizimine qabyldanǵannan keıin kýrsanttar bir aı boıy bastapqy áskerı daıyndyqtan ótip, atý, saptyq jáne dene daıyndyǵyn jetildirdi, jalpyáskerı jarǵylardy meńgerdi. Kýrsanttar alǵashqy kúnnen-aq áskerı ómirge beıimdelip, sabaqqa degen erekshe yqylas pen ynta-jigerlerin kórsete bastady, dep habarlaıdy REjBÁII baspasóz qyzmeti.
"Búgin biz úshin erekshe qýanyshty jáne saltanatty kún! Áskerı ant qabyldap, Otan qorǵaýshy degen mártebege ıe boldyq. «Kýrsant» degen abyroıly atqa laıyq, antyma adal bolatynyma senimdimin", dedi óz qýanyshymen bólisken 1 kýrs kýrsanty Janádil Qambarov.
Ant qabyldaǵan sátten bastap jas kýrsanttar QR Qarýly Kúshteriniń qataryna enip, olarǵa Otan qorǵaý jaýapkershiligi júkteledi. Jas kýrsanttar Qazaqstannyń ár aımaǵynan jáne TMD memleketterinen bilim alýǵa kelgen.
