Osy másele boıynsha jýrnalısterge túsinik bergen oblystyq veterınarııa basqarmasynyń basshysy Berik Áljanov qustardyń qyrylýynyń naqty sebebin aıta almaıtynyn, bári tek 3-4 kúnnen keıin belgili bolatyn zerthanalyq saraptan keıin ǵana anyqtalatynyn jetkizdi.
"Osy tektesqyrylý eki jyl buryn Aıyrtaý aýdanynda da bolǵan. Qustardyń moıyndary salbyrap, kógerip, qyljııa ketýleri pasterellez, salmonellez nemese qus tumaýy sııaqty aýrýlardyń belgisin kórsetetedi. Bizge Nur Sultan qalasyndaǵy veterınarııa ortalyǵynan maman kelgeli jatyr. Oǵan deıin alǵashqy saraptar da daıyn bolatyn shyǵar. Sol kezde qustyń qyrylý sebepteri neden bolǵanyn aıtatyn bolamyz", dedi ol.
Qazir ólgen qustar órttelip, joıylǵan kórinedi. Al aýrý shyqqan eldimekenderge karantın jarııalaý týraly aıtýǵa áli erte. Joǵaryda atalǵan aýyldar ártúrli aýdandarǵa baǵynysty bolǵanymen bir óńirde, jaqyn jatyr.
Sondyqtan bul jerdegi qustar qandaı da bir ınfeksııalyq aýrýǵa tap bolǵany sózsiz. Maman da osyny aıtty. Aýrý qustar ýaqtyly joıylsa ınfeksııanyń jaıylyp ketpesi anyq, sondyqtan odan dańǵaza jasaýdyń keregi joq sııaqty.
Soltústik Qazaqstan oblysy
