M.Nárikbaev atyndaǵy KAZGUU ýnıversıtetiniń elimizdegi azamattardyń quqyqtyq saýattylyǵyn arttyrýdy kózdeıtin bul jobasy endi árbir qazaqstandyqqa úıden shyqpaı-aq zańgerdiń keńesin tegin alýǵa múmkindik beredi.
Joba aıasynda tegin keńes alý úshin ZOOM qosymshasyn ornatyp, https://clck.ru/Qjy2P siltemesine ótý qajet. Azamattardy qabyldaý vırtýaldy kabınette dúısenbiden jumaǵa deıin saǵat 10.00-18.00 aralyǵynda ótedi.
– Ár adamǵa sapaly quqyqtyq keńes qajet. El Prezıdenti Qasym-Jomart Toqaev: «Volonterlik qyzmettiń basym mindetteriniń biri – muqtaj jandarǵa zańgerlik kómek berý», degen bolatyn. Biraq quqyqtanýshy mamandar qyzmetiniń baǵasy barlyǵyna birdeı qoljetimdi emes. Saýatty zańgerlerdiń keńesi ýaqytynda berilse, biraz túıtkildiń túıinin tarqatýǵa bolady, – deıdi klınısıst-stýdent Ramazan Áziretqulov.
KAZGIýÝ Zań klınıkasynyń dırektory Ester Babadjanıan:
– Biz Qazaqstanda Volonterler jyly jarııalanǵanǵa deıin de quqyqtyq eriktiler retinde belsendi jumys atqardyq. Bıyl karantındik shekteýlerdi eskere otyryp, qashyqtan keńes berýdi qolǵa alyp otyrmyz. Arnaıy ázirlengen kz saıtynan basqa, ZOOM platformasynda vırtýaldy kabınet iske qosyldy. Zań klınıkasynda taǵylymdamadan ótip júrgen stýdentter azamattardyń mazalaǵan suraqtaryna onlaın rejimde jaýap berýge daıyn. Biz stýdentterimizdiń kúsh-jigeri arqyly quqyqtyq volonterlikti damytyp, halyqtyń quqyqtyq saýattylyǵyn arttyrýǵa úles qosyp qana qoımaı, bolashaq zańgerlerdi áleýmettik jaýapkershilikke tárbıeleımiz, – dedi.
Zań klınıkasy dırektorynyń aıtýynsha, keńes alýshylardyń azamattyq, otbasylyq nemese eńbek máseleleri boıynsha habarlasýyna bolady. Klınısıst-stýdentterdiń jaýaptary aldyn ala kásibı zańgerlerdiń sapa turǵysynan tekserýinen ótedi.
