Salynýy, kúrdeli jóndeýden ótýi tıis mektepterdiń bárine memleket tarapynan qarjy bólingenimen, jaýapsyz merdigerlerdiń kesirinen jaǵdaı ońbaı tur. Budan bólek, birqatar aýdan basshylarynyń da sol qurylys kompanııalarynan jumysty der kezinde talap etpeýi osyndaı kúrdeli jaǵdaıǵa ákelýde. Jýyrda ǵana oblys ákimi Berdibek Saparbaev Merki aýdanynyń ákimi Meıirhan О́mirbekovke, T.Rysqulov aýdanynyń ákimi Erbolat Sadyrqulovqa, Jýaly aýdanynyń ákimi Narbaı Ergebekovke jáne oblystyq bilim basqarmasynyń basshysy Gúlnar Hodjabergenovaǵa jumystyń nashar júrip jatqanyn aıtqan bolatyn. Osy úshin atalǵan basshylardyń birazyna sógis te jarııalanyp, eskertý de berildi.
Sondaı-aq ákimdik tarapynan keıbir jaýapsyz merdigerlerdi kelesi jyly tenderge qatysý quqyǵynan aıyrý týraly da aıtylǵan bolatyn. Sondaı sheshim qabyldansa da, Taraz qalasynan bastap birqatar aýdanda mektep qurylysyna qatysty jumys áli baıaý júrgizilýde.
Máselen, Merki aýdanyndaǵy 4 mektepte jóndeý jumystary áli kúnge deıin jalǵasýda. Búginde merdiger «KASÝB-Taraz» JShS Aqermen aýylyndaǵy A.Hasenov atyndaǵy №11 mektepke kúrdeli jóndeý jumystaryn júrgizýde. Munda negizi 439 oqýshy bilim alady. Alaıda jóndeý jumystaryna baılanysty kezekshi synyptardaǵy 43 oqýshy aýyldaǵy Mádenıet úıinde oqýǵa májbúr bolyp otyr. Atalǵan kompanııa jumysty bıylǵy jylǵy 25 qyrkúıekke deıin aıaqtaý kerek bolǵan. Biraq jumys bitpegendikten, balalar osy kúnge deıin yńǵaısyz jaǵdaıda bilim alýda. Merki aýdany ákiminiń orynbasary Ashat Medetbekovtiń aıtýynsha, merdiger «KASÝB-Taraz» seriktestiginen árbir keshikken kúni úshin turaqsyzdyq aıyppuly óndiriledi eken. Sondaı-aq ol qurylys qarqynyn jedeldetý maqsatynda da tıisti jumys atqarylyp jatqanyn jetkizdi. Degenmen, atalǵan kompanııa qansha jerden aıyppul tólese de, qazirgideı kúzdiń qara sýyǵynda balalardyń Mádenıet úıinde oqýy quptarlyq jaǵdaı emes. Granıtogor aýylynda da 120 oqýshyǵa arnalǵan jańa mektep salynýda. Bilim nysanynyń qurylysyn «Temir-Stroı Servıs ı Ko» kompanııasy júrgizýde. Jańa ǵımarat aǵymdaǵy jyldyń sońynda paıdalanýǵa beriledi dep josparlanǵan. Al ótken ǵasyrdyń elýinshi jyldary salynǵan eski ǵımaratta búginde barlyǵy 228 oqýshy dástúrli formatta bilim alýda. Sonymen qatar Oıtal aýylyndaǵy №48 mektepte jóndeý jumystary aıaqtalýǵa jaqyn eken. Qazirgi kezde qurylysshylar sport jáne akt zaldarynyń qurylys jumystarymen aınalysýda. Oqý ǵımaratynda kezekshi synyptarda 100-den astam oqýshy bilim alýda. Atalǵan bilim nysanyn «QazMunaıGaz» JShS bıylǵy tamyz aıynyń sońynda tapsyrýy kerek bolǵan. Al shilde aıynda osy aýyldaǵy №12 mektep daıyn bolýy tıis edi. Biraq «Dos jáne K Servıs» merdigerlik kompanııasy nysandy endi ǵana paıdalanýǵa berýdi josparlap otyr. Sondaı-aq Jambyl aýyldyq okrýginiń quramyndaǵy Jemis-jıdek eldi mekeninde №44 orta mektepte 1 105 oqýshy oqıdy. Biraq búginde kezekshi synyptardaǵy 100-den astam oqýshy da balabaqshada bilim alýǵa májbúr. Sebebi atalǵan mekteptegi jóndeý jumystaryn júrgizip jatqan merdiger «Erk-Astana» kompanııasy bilim nysanyn qazan aıynyń basynda ǵana aıaqtaýǵa ýáde beripti.
Mundaı másele aýdandarda ǵana emes, oblys ortalyǵynda da bar. О́ńirde jumys júrgizip jatqan merdigerlerdiń deni óndiristik kesteden keshigip keledi. Tehnıkalary men jumysshylarynyń sany da jetkiliksiz. Sol sııaqty qurylysqa qajetti materıaldardyń ýaqytynda jetkizilmeýi de máseleni qıyndata túsýde. Osy ýaqytqa deıin oblys ákimdiginiń tarapynan qala jáne aýdan basshylaryna, sonymen qatar merdiger kompanııalarǵa tapsyrma berilgenimen áli nátıje bolmaı otyr. Máselen keıbir jańa mektepterdiń qurylysy, basqa da bilim oshaqtarynda júrgizilip jatqan kúrdeli jáne aǵymdaǵy jóndeý men sanıtarlyq toraptardyń jumysy kelisimshart boıynsha qyrkúıek aıynyń alǵashqy kúnine deıin aıaqtalýy tıis bolǵan. Biraq qazan aıy kelse de nátıjeli kórsetkish bolmaı tur. Jalpy, qazirgi tańda oblys boıynsha jańadan salynyp jatqan 9 mekteptiń qurylysy bitpegen. Tipti keıbir jumystyń 50 paıyzy da aıaqtalmaǵan. Odan bólek taǵy 9 mekteptiń sanıtarlyq toraby áli daıyn emes. Al 13 mekteptiń kúrdeli jóndeý jumystarynyń ázirge bitetin túri joq. Oblystyq bilim basqarmasynyń basshysy Gúlnar Hodjabergenovanyń aıtýynsha, Taraz qalasyndaǵy №1 mektep-gımnazııanyń 300 oryndyq qosymsha ǵımaratynyń qurylysy bıylǵy shilde aıynyń sońynda aıaqtalýy tıis bolǵan. Biraq qaýqarsyz qurylystyń saldarynan qazir mundaǵy jumystyń jartysy ǵana oryndalǵan. Sondaı-aq Taraz qalasyndaǵy sańyraý jáne nashar estıtin balalarǵa arnalǵan «Meıirim» mektep-ınternatyna tıesili 80 oryndyq qosymsha ǵımarattyń qurylysy da óndiristik kesteden qalyp keledi. Munyń bári de oqýshylardyń sapaly bilim alýyna kedergi keltirip otyr.
О́ńirde mektep qurylystaryn júrgizip jatqan merdiger kompanııalardyń ókilderi jumystyń kesheýildep jatýynyń sebebin adam kúshiniń jetispeýimen baılanystyrýda. Biraq oblys basshylyǵy tarapynan máseleniń atalǵan merdigerlerdiń bir mezgilde bir emes, birneshe nysandy ózderiniń shamasyna, tehnıkasynyń sanyna qaramaı alyp alýynan týyndaǵany aıtylýda. Sonyń saldarynan qurylys nysandarynyń jumysy ýaqytynan keshigýde. Sonymen qatar qurylys jumysyn kórsetilgen merzimde aıaqtamaǵan merdigerlerge ákimderdiń shara qoldanbaıtyny da osyndaı jaǵdaıǵa jetkizgen. Sondaı-aq tehnıkalyq qadaǵalaýshylardyń da óz jumysyna salǵyrt qaraıtyny aıtylyp keledi. О́ńirdegi mektep qurylysynyń keshigýi bir emes, birneshe máselege baılanysty bolyp tur. Búginde balalar birinshi toqsandy qashyqtan oqyp júr. Eger oqýshylar dástúrli oqytýǵa kóshetin bolsa, onda bárin Mádenıet úıine de, balabaqshaǵa da syıǵyzý múmkin emes. Kúrdeli másele sonda týyndaıdy.
Jambyl oblysy
