"Almatynyń kásipkerlerimen shaǵyn jáne orta bıznesti qoldaý sharalaryn talqyladyq. Qazirgi jaǵdaıda salyqty jeńildetý, sýbsıdııa berý, aınalymdaǵy qarjyny tolyqtyrý jáne taǵy basqa arqyly bızneske kómektese beremiz. Elge paıdaly kásipkerlikti damytýǵa kedergi jasaýǵa eshkimniń quqyǵy joq", dep jazdy Memleket basshysy.
Aldyńǵy aqparattarda habarlaǵanymyzdaı, búgin Memleket basshysy Almatyǵa jumys sapary aıasynda qazaqstandyq Hyundai Trans Kazakhstan zaýytynyń iske qosylýǵa daıyndyq barysyn teksergen edi.
Q.Toqaev nysandy aralap kórgennen keıin ındýstrııalyq aımaq rezıdentterimen jeke kásipkerlikti qoldaý jáne kásiporynnyń basym salalaryn damytý máselelerin talqylady.
"Men óz Joldaýymda elimizdegi kásipkerlikti damytýǵa erekshe mán berdim. Ásirese bıznestiń, kásipkerliktiń damýyna memlekettik organdar tarapynan keltiriletin kez kelgen kedergi elimizge qarsy jasalǵan qylmys retinde qaralatynyna arnaıy toqtaldym. Iаǵnı basqasha aıtqanda, Úkimet, jergilikti atqarýshy organdar kásipkerlikti damytýǵa jan-jaqty qoldaý kórsetýge tıis. Bul – ekonomıkalyq saıasatymyzdaǵy negizgi baǵyt", deıdi Prezıdent.
Memleket basshysynyń aıtýynsha, elimizdiń ekonomıkasyndaǵy ahýal pandemııa saldarynan áli de kúrdeli jáne bul daǵdarystan memleket pen bıznestiń birlesken kúsh-jigeriniń arqasynda ǵana shyǵýǵa bolatynyn alǵa tartty. Sondaı-aq naryqty monopolısterden tazalaý kerektigin jáne barlyq laıyqty kásipkerlerdiń bizdiń naryqqa enip, erkin jumys isteýine múmkindik berý qajettigin atap ótti.
"Sonda ǵana ekonomıka erkin damı alady. Munyń bári jańa uıymdastyrý sharalaryn qabyldaýdy talap etetini sózsiz. Bul sharalardyń bári tıimdi bolady dep úmittenemin", dedi Memleket basshysy.
Budan bólek, Prezıdent Qasym-Jomart Toqaev Almatyǵa saparyn I.Jekenova atyndaǵy qalalyq klınıkalyq juqpaly aýrýlar aýrýhanasynyń jańa fılıalyn aralap kórýden bastady. Sondaı-aq Indýstrııalyq aımaqta bolyp, Respýblıka alańyndaǵy qaıta jóndeýden ótken "Almaly" demalys aýmaǵynda boldy.
