Jol salýdyń «túpqaraǵandyq úlgisi»

Bul aýyl ishine jol salýdy kópten kútken atashtyqtardyń zamanǵa saı jańaryp jatqan ekinshi joly bolatyn. Mamandardyń aıtýynsha, jol salýdyń ózindik tártip-talabyna saı tóselip bastalǵan joldy kósheniń qaq ortasynda kezdesken gaz qubyrlarynyń ótkeli týra joldan taıdyrypty. Jol tóseýshiler aldynan kóldeneń shyqqan gaz qubyryn kózge ilmesten kókteı basyp ótip, qubyrlardyń túbin tep-tegis etip shegendep tastady. Merdiger mekeme basshylyǵy men jol tóseýshiler qu­byry qaq ortada qalǵan jolda qozǵalys qalaı bolatynyn qandaı ushqyrlyqpen oılastyrǵanyn ózderi biledi. Al qalyń jurt ájýaǵa aınaldyryp ala jóneldi.

Artynsha Atash aýylyndaǵy B.Aq­sambaev kóshesine jol tóseý bary­syn­daǵy oryn alǵan keleńsizdikke baılanys­ty Túpqaraǵan aýdandyq ákimdigi «2020 jyldyń 23 qyrkúıeginde saǵat 18:30 shamasynda aýylishilik jol quryly­symen aınalysýshy merdiger mekeme «Bek-AqtaýGazSnab» JShS tarapy­nan jumys aıaǵynda baqylaýshy jaýap­ty tulǵanyń bolmaýyna baılanysty aldaǵy ýaqytta aýystyrylýǵa jatatyn gaz qubyrynyń ústinen asfalt tósep ketken.

Aýdandyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy A.Jetkizgenovtiń gaz qubyrynyń qorǵaý aımaǵyna jatatyn 5 metr (eki jaǵynan 10 metr) jerdi qaldyryp ketý týraly aldyn ala eskertýine qaramastan, merdiger mekeme tarapynan óreskel qatelikke jol berilgen. Osyǵan baılanysty merdiger mekeme sol túni tóselgen asfalt jabyndysyn alyp tastady. Merdiger mekeme ketken qatelikteri úshin jaýapkershilikti tolyǵymen óz moıyndaryna aldy. Atalǵan jumystardy qalpyna keltirý merdiger mekeme tarapynan júrgiziledi. Sondaı-aq «QazTransGazAımaq» AQ qabyldanǵan tehnıkalyq shart talaptaryna sáıkes gaz qubyry aýystyrylady. Aýylishilik joldyń atalǵan bóligin asfalttaý gaz qubyryn aýystyrǵannan keıin júrgiziledi», degen túsinik berdi.

Túsinik berý ońaı, áli keppegen joldy tas-talqan etip buzý da ońaı. Biraq bıýdjetten bólingen qarjyny jelge ushyryp, joldyń kópe-kórineý qubyrlardy basa-kóktep tóselýine ne sebep? Jurtshylyq jol boıyn­daǵy mun­daı óreskel qatelikterdiń ózge aýyl­dardan da kezdesetinin aıtyp jatyr. Tipti osy aýdannyń Saıyn aýylynda bir kezderi jaıaý júrginshiler jolyna attap óterlikteı bıiktikte kóldeneń gaz qubyrlary tartylǵan. Turǵyndardyń biri onyń astynan erinbeı eńkeıip ótse, ekinshisi attap ótem dep aýnap túsken kezderi bolǵan eken. Biraq kópshiliktiń talabymen keıin jóndelgen. Sonda turǵyndar shý kótermese, quzyrly organdar «sen tımeseń, men tımen» dep otyra bere me? Nege jol salynatyn jer aldyn ala daıyndalyp, ólshenip-pishilip, jolyndaǵy kedergiler aldyn ala alynbaıdy degen saýal týyndaıdy. Gaz qubyrlaryn alý ońaı jumys emes, tipti birneshe aıǵa sozylýy múmkin. Qalaı bolǵanda da tap búgingi «túpqaraǵandyq úlgide» jol salynbaıtyny anyq qoı...

Sondaı-aq máseleniń mán-jaıyn bilý úshin «Jol aktıvteriniń ulttyq sapa ortalyǵy» respýblıkalyq memle­kettik kásipornynyń qyzmet­kerleri jumys saparymen Atashqa bardy. «QazGazTransAımaq» AQ-na tıesili gaz qubyry báz-baıaǵysha kólik jolynyń qaq ortasynda tur. B.Aqsambaev kóshe­sine jańadan jol tóseýdi moınyna alǵan merdiger «Bek-AktaýGazSnab» seriktestiginiń jumysshylary qubyr mańyndaǵy asfaltty kúrep tastap, joldyń eki betine arnaıy belgiler qoıǵan. Bul jerde jol belgileriniń túsi zań boıynsha sary tústes bolýy kerek. О́z kezeginde merdiger mekeme bas­shy­lyǵynyń taǵy bir qateligi baıqaldy.

«Jol aktıvteriniń ulttyq sapa orta­lyǵy» respýblıkalyq memlekettik kásip­­ornynyń qyzmetkerleri Túp­qara­ǵan aýdandyq turǵyn úı-kom­mýnaldyq sharýashylyq, jolaýshylar kóligi jáne avtomobıl joldary bólimi mem­­lekettik mekemesi, tehnıkalyq qada­ǵalaý bólimi, sondaı-aq merdiger serik­testik ókilderi kelisimimen jol mate­rıalynyń qalyńdyǵyna kóz jet­kizý maqsatynda asfalt joldyń uzyn­dyǵyn ólshep, bir synama (kern) a­lǵan. Tehnıkalyq reglament talaptary­na sáıkes asfalt jabyndynyń sýyp, qatýyna 2-3 táýlik ýaqyt kerek bol­ǵan­dyq­tan, kelesi aptada jol sapasyn ba­qy­laý­shylar Atash aýylyna taǵy kelip, synamalar alýdy josparlap otyr.

«Bul jerde kemshilik kóp. Árqaısy­syna jeke-dara toqsalsaq, joldy salmas buryn jobalaý kezinde kóshe boıynsha tómen qysymdy gaz qubyry turǵany múldem eskerilmegen. Aýyldy kógildir otynmen jabdyqtaýshy mekemege ony jyljytý týraly tehnıkalyq talaptar jiberilmegen. Jobalaý jumystarymen «CASPIY & DIFA» seriktestigi shuǵyl­danǵan. Olar jibergen olqylyq gaz qubyryn montajdaý jumystaryna qajet qarjynyń smetalyq qujattarǵa qosylmaı qalýyna ákep soqqanyn kórip turmyz», deıdi «Jol aktıvteriniń ulttyq sapa ortalyǵy» RMK Mańǵystaý fılıalynyń dırektory Eltaı Taıalıev.

B.Aqsambaev kóshesine asfalt tóseýge tapsyrys berýshi Túpqaraǵan aýdan­dyq jolaýshylar kóligi jáne avto­­mobıl joldary bóliminiń qyzmet­ker­­leri óz qatelikterin keıin túsinip, tómen qysymdy gaz qubyrymen túıise­tin jolǵa tıisti talaptardy alý úshin teh­nı­kalyq qadaǵalaý bólimine hat joldapty.

Jaýapsyzdyqqa boı aldyrǵan tulǵa­lardyń daýly jobany bekitip ári qarjy­landyrýy, ony maqsatty ıgerýdi zań júzinde qanshalyqty durys atqarǵanyn quzyrly organdardyń anyqtary sózsiz.

Maqala núktesi qoıylar sátte Túp­qaraǵan aýdany ákiminiń orynbasary J.Qaınarbaevtan aýdandyq turǵyn úı-kommýnaldyq sharýashylyǵy, jolaý­shylar kóligi jáne avtomobıl joldary bóliminiń basshysy A.Jetkizgenovtiń qyzmetten bosatylǵanyn jáne atalǵan jaǵdaıǵa baılanysty quzyrly organdar tarapynan tekserý jumystary bastalǵanyn bildik.

Mańǵystaý oblysy