Tujyrymdama boıynsha parkte zamanaýı 3 vızıt-ortalyq, glempıngter, kempıngter etno-aýyldar salyp, karavanıngke arnalǵan oryndar daıyndaý kózdeledi. Bul rette týrıstik marshrýttar men soqpaqtardy damytýǵa basty nazar aýdarylady. Kúrdeli qurylys bolmaıdy. Jeńil konstrýksııalar qoldanylady.
"Kólsaı-kólderi" memlekettik ulttyq tabıǵı parki dırektory Danııar Turǵanbaev parktegi ekotýrızmge arnalǵan ınfraqurylym qorshaǵan ortaǵa zııan keltirmes úshin negizgi kólderden alys bolatynyn aıtty.
“Qaıyńdy, Kólsaı kólderine birde-bir nysan jaqyn salynbaıdy. Ǵımarattardyń bári tómen ornalasady. Shatqaldyń ishine kirmeıdi. Bul – tabıǵattyń suranysyn, qajettiligin eskerilip jasalǵan tujyrymdama. Konsepsııanyń basty maqsaty – ekojúıeni buzbaý. Adamdar jaıaý nemese velosıpedpen júrip, tabıǵatqa zııan tıgizbeı demalatyn jaǵdaıǵa kelýimiz kerek. Taǵy bir maqsatymyz - eldi-meken turǵyndaryn jumyspen qamtý. Tek iri bıznes ókilderi emes, jergilikti halyq týrızmniń paıdasyn kórýi tıis”- dedi ol jıynda.
Týrızmdi damytýdyń memlekettik baǵdarlamasyna sáıkes, ekotýrızm jobalary da 2020 jyly nátıjesin bere bastaýy tıis.
"Aldyn ala esepteýler boıynsha týrıstik marshrýttardyń sany artady, jergilikti turǵyndar úshin jańa jumys oryndary paıda bolady, qonaq úı qory keńeıedi jáne shatyrlar men lagerler úshin kóbirek oryn bolady. Bul rette tabys jylyna 150 mlnteńgege deıin ósedi", - dedi - “Kólsaı Kólderi” Ulttyq memlekettik tabıǵı parkiniń Bas dırektory Danııar Turǵanbaev.
Aıta keteıik, 2019 jyly “Kólsaı kólderi” ulttyq parkine 87 myń týrıst kelip, 30 mln teńge paıda túsken.
Aldaǵy ýaqytta "Kólsaı kólderi" ulttyq parkinde ekotýrızmdi damytý boıynsha qoǵamdyq keńes qurý josparlanýda.
“Damý konsepsııasyn parktiń janynan qurylatyn Qoǵamdyq keńeske shyǵaramyz. Sol keńes jan-jaqty qarap, talqylap bolǵan soń ári qaraı zańǵa sáıkes áreket jasaımyz. Úlken ınvestısııalyq joba arqyly nysandar paıda bolady. Tujyrymdamany erteń bıznes ókilderi ınvestısııalyq jobamen kelgende bizdiń talaptardy tolyq túsinsin dep jasap jatyrmyz. Baıqaýǵa qatysqan kásipker bizdiń tujyrymdamadaǵy ıdeıa bolǵan jaǵdaıda ǵana jumys isteýge múmkindik alady", - dep eskertti ekologııa, geologııa jáne tabıǵı resýrstar vıse-mınıstri Erlan Nysanbaev.
Jıynǵa qatysqan týrıstik qaýymdastyqtar, ǵalymdar, sarapshylar jáne qoǵam qaıratkerleri ulttyq parkti aralap, bolashaqta ınfraqurylym salynatyn oryndarmen tanysty. Potensıaldy ınvestorlar óz jobalaryn kórsetti.
