"Kóp balaly, az qamtylǵan, múgedek balalardy tárbıelep otyrǵan otbasylarǵa keshendi konsýltasııalyq qyzmetter usynylady. Ortalyqta júrgizilip jatqan barlyq jumystar otbasy ınstıtýtyn nyǵaıtýǵa yqpal etýi kerek. 2020 jyldyń basynan bastap 25 063 adam 46 163 másele boıynsha Nur-Sultan ákimdiginiń "Januıa" otbasy ınstıtýtyn qoldaý ortalyǵy kómegine júgingen", – dep habarlady elordalyq jumyspen qamtý jáne áleýmettik qorǵaý basqarmasy.
Ortalyqta elorda turǵyndaryna AÁK-ge ótinim berý, baspana kezegine turý jáne medısınalyq kómek alý boıynsha keńes beriledi. Turǵyndar munda zańgerlik jáne psıhologııalyq kómek ala alady. "Januıa" ortalyǵy ómirlik qıyn jaǵdaıǵa tap bolǵan otbasylarǵa áleýmettik qoldaý kórsetedi. Ortalyq alańynda "Kásipker ana" ortalyǵy jumys isteıdi. Onda mamandar óz isin ashýǵa kómek kórsetip, kásipkerler motıvasııalyq bıznes-trenıngter ótkizedi.
Sonymen birge ortalyq bazasynda Nur-Sultan ákiminiń ashyq qoǵamdyq qabyldaýy jumys isteıdi. Al aýdan ákimderiniń, basqarma jáne basqa uıymdar basshylarynyń azamattardy qabyldaýy kestege sáıkes júzege asyrylady.
Mekemede kedergisiz orta jasalǵan. Erekshe qajettilikteri bar adamdarǵa arnalǵan lıftiler bar. Arnaıy oıyn alańy ashylǵan, onda ortalyq qyzmetkerleri balalarǵa qaraıdy.
