Bıylǵy aýa raıy dándi daqyldyń oıdaǵydaı ósip-jetilýine qolaıly bola qoımady. Jaz maýsymynda aptalap aptap ystyq turyp aldy. О́tkinshi nóserdiń órekpip kelip anda-sanda bir búrkip ótken bolmasa, mandytyp jańbyr da jaýmaı qoıdy.
"Soǵan qaramastan, salany sıfrlandyrý arqyly jáne jetilgen jer ıgerý tehnologııasynyń nátıjesinde jer qyrtysynda astyqqa jetkilikti mólsherde ylǵal saqtalyp, oblystyń aýylsharýashylyq qurylymdary 4,1 mln tonna astyq bastyryp aldy. Bıylǵy ónim shyǵymy ortasha eseppen gektaryna 10,2 sentnerden keledi. Jalpy ónimniń kólemi byltyrǵy kórsetkishten 1 mln tonna artyq", dep málimdedi aýyl sharýashylyǵy basqarmasy.
Búginge deıin oblys aýmaǵyna ornalasqan astyq qabyldaý mekemelerine 871 myń tonna bıdaı kelip túsken. Onyń 82%-y 3-surypty bıdaı. Elevatorlarǵa jınalǵan bıdaıdyń 60%-dan astamynyń qamyrlylyǵy 28% jáne odan joǵary.
Oblysta óndiristi sıfrlandyrý men tehnologııalyq úderisterdi avtomattandyrý arqyly aýyl sharýashylyǵy ónimderin óńdeý kásiporyndary jańǵyrtylyp, iri zamanaýı jańa óńdeý keshenderi iske qosylýda. Osyǵan baılanysty bıyl orylǵan 4,1 mln tonna astyqtyń 60%-dan astamy, ıaǵnı 2,5 mln tonna bıdaı óńdeýge jiberilip, shetelge 1,2 mln tonna un eksporttaý josparlanyp otyr.
Aýyl sharýashylyǵy basqarmasynyń málimetinshe, qazir sharýashylyqtar "Azyq-túlik korporasııasy" AQ-na forvardyq satyp alý boıynsha bıdaı tapsyryp jatyr. Aldaǵy kóktemgi egis naýqanyna qajetti 530 myń tonna bıdaı tuqymy daıyn. Dıqandar endi kúzdigin qamdaýǵa kirisip, qazirdiń ózinde 1 mln gektardan astam kúzdik alqapqa óńdeý júrgizgen.
