«Máselen, azyq-túlik taýarlary kóleminiń 64 paıyzy, azyq-túlik emes taýarlar kóleminiń 73 paıyzy, tehnıkaǵa qajetti bólshekterdiń 81 paıyzy jáne qurylys materıaldarynyń 85 paıyzy bazarlardan satyp alynady», deıdi ol.
Biraq, oblys ákimi Berdibek Saparbaev bazar ıelerimen bolǵan kezdesýde óńirdegi bazarlardyń jumysyn synǵa aldy. «Birde-bir bazar belgilengen talaptarǵa tolyq sáıkes kelmeıdi. Qabyldanǵan sharalar satyp alýshylardyń da, saýdagerlerdiń de qaýipsizdigin qamtamasyz etý úshin jetkiliksiz», dedi. О́z sózinde Berdibek Saparbaev barlyq bazarlar órtke qarsy, sáýlettik, sanıtarlyq, ekologııalyq jáne basqa da talaptarǵa saı bolýy tıis ekenin, biraq birde-bir bazar ıesi buǵan naqty jaýap bere almaıtynyn aıtty. «Saýda ashyq jerde júrgizilýde, órt gıdranttary kórinbeıdi, órt sóndirý mashınalary erkin óte almaıdy. Bazar ıeleri satyp alýshylar men saýdagerlerge de jaıly jáne qaýipsiz jaǵdaı jasaýdy oıǵa da almaıdy. Al, memlekettik organdar eshqandaı másele joq sekildi beıqam, tipti, bul jaǵdaıdaǵy tártipti retteýge tyryspaıdy», dedi Berdibek Saparbaev. Sońǵy eki jylda «Nurly», «Ysty», «Saltanat», «Qaıqarmet», «Arzan», «Aýyl Bereke» jáne «Jibek Joly» sııaqty jeti bazar jańǵyrtylyp, jabyq pavılondar ornatylyp, qaqpalar qoıylǵan. Alaıda ákim bul sharalarmen toqtap qalýǵa bolmaıtyndyǵyn aıtyp, jańǵyrtý jumystaryn sońyna deıin jetkizýdi tapsyrdy. Osyndaı jumystar basqa da bazarlarda júrgizilýde eken. Biraq, olardyń ıeleri ýaqytty sozyp, áli kúnge deıin jańa saýda qatarlarynyń eskızderin usynbaǵan. Kóptegen kásipkerler qarajattyń joqtyǵyna shaǵymdanyp, modernızasııalaý jumystary eki-úsh jylda aıaqtalatyndyǵyn jetkizdi. Bul rette Berdibek Saparbaev eshqandaı syltaýdyń qabyldanbaıtynyn, barlyq bazarlar tezirek retke keltirilýi kerek ekenin aıtty.
Ákimniń aıtýynsha, oblystaǵy tótenshe jaǵdaılar jáne memlekettik kirister departamentteri bul jaǵdaılarǵa bas aýyrtpaıdy. Oblys ákiminiń tapsyrmalarynyń oryndalýyn arnaıy mobıldi top qadaǵalap otyrýy tıis. Top quramyna joǵaryda atalǵan departamentter men salalyq basqarma ókilderinen bólek, polısııa qyzmetkerleri, sanıtarlyq dárigerler men sáýletshiler enedi. Jıynǵa beınebaılanys rejıminde qatysqan Taraz qalasy men aýdandardyń ákimderine de osy máselelerdi sheshý boıynsha jumys júrgizý tapsyryldy. Sonymen qatar, basqosýda ákim azyq-túlik qaýipsizdigi máselesin de atap ótti. «Turaqtandyrý qorynyń qoımalarynda ónimdi saqtaýǵa qatysty barlyq máselelerdi kóktemde sheshý qajet edi. Sonda tıisti vedomstvo búgingi baǵalardyń ósýin boldyrmaý úshin birneshe myń tonna aýylsharýashylyq ónimderin satyp alar edi. Dıqandar mol ónim jınady. Biraq olardy saqtaıtyn oryn joq. Sondyqtan ónimder qazir basqa aımaqtarǵa arzan baǵada satylýda. Al, ishki naryq tolyǵymen qamtyldy dep aıta almaımyz. Aýyl sharýashylyǵy basqarmasy jaǵdaıdy baqylaı almaı otyr», dedi ákim. Sondaı-aq, ol baǵanyń turaqtylyǵyn baqylaýmen qatar, deldaldarǵa qatysty máseleni de sheshýdi tapsyrdy.
Jambyl oblysy
