Balalar saýlyǵy – basty nazarda

Salalyq basqarmanyń baspa­sóz qyzmeti taratqan aqparatqa súıensek, №2 oblystyq ınfek­sııalyq aýrýhanadaǵy juqpaly aýrýlarmen aýyratyn balalar bólimshesi ózge emdeý ornyna kóshirilgen edi. Sóıtip, ob­lys­tyq balalar aýrýhanasynda epıdemııalyq stasıonar retinde juqpaly aýrýmen aýyrǵan balalardy qabyldady. Atalǵan aýrýhananyń bas dárigeri Nur­qabyl Aıtmuhanbetovtyń aıtýynsha, bıylǵy 1 tamyzdan 4 qyrkúıekke deıingi aralyqta 62 naýqas emdelip shyqqan.

– Byltyr dál osy kezeńde juqpaly aýrýmen 208 naýqas qabyldanǵan edi. Bıyl naýqas­tardyń qatary 146-ǵa tómendedi. Áleýmettik jelide balalar arasynda dıareıa tarady degen aq­parat jalǵan ekeni daýsyz, – dedi N. Aıtmuhanbetov.

Degenmen, №2 oblystyq ın­feksııalyq aýrýhananyń ın­feksıonıst-dárigeri Aınur Sapa­rovanyń aıtýyna qaraǵanda, kún sýytqan kezde jedel ishek ınfeksııalary rotovırýstyq juqpalarmen qatarlasa júredi. Sonyń saldarynan ishek aýrýlary balalar arasynda aýyr jaǵdaıda ótýi múmkin. Jalpy jedel ishek ınfeksııasy aýyr, ortasha, jeńil túrde ótedi. Bul aýrý aýyz qýysy arqyly ishek joldaryn zaqymdaıdy. Naýqasta qusý, dene qyzýynyń kóterilýi, álsizdik sımptomdary arqyly bilinedi. Ásirese, kúz aılarynda rotovırýsty ınfeksııamen qatar júretindikten, ishek ınfeksııasy órshı túsedi.

– Sol sebepten, jazda bastalyp kúzge taman órshıtin ishek ınfeksııasyn koronavırýspen nemese Kavasakı sındromymen baılanystyrýǵa esh negiz joq. Kerisinshe, ótken jyldary ishek aýrýymen aýyrǵan balalar sany artqan bolsa, bıyl olardyń sa­ny azaıdy. Muny biz pandemııa kezindegi karantındik shekteý sharalarymen baılanystyryp otyrmyz. Ata-analar jaz aılarynda burynǵydaı balalarymen qydyryp shyqpaı, bári úıinde boldy, – deıdi ınfeksıonıst-dáriger A.Saparova.

Dárigerdiń aıtýynsha, bul aýrýdy kóbinese bir jasqa deıin­gi balalar men jasy alpys­tan asqan eresekter óte aýyr jaǵ­daıda ótkizedi. Al jedel ishek ınfeksııasy – vırýstarmen, bakterııalarmen qozdyrylatyn jedel ıntoksıkasııamen, dene temperatýrasynyń kóterilýimen, dıareıalyq belgilermen sıpattalatyn ınfeksııa túri. Bul aýrý jemis-jıdekterdi jýmaı jep, qol jýý erejesin durys saq­tamaý, qaınamaǵan sý ishýden boı kóteredi.

Oblystyq densaýlyq saq­taý­ basqarmasynyń sońǵy máli­metine súıensek, balalar arasynda jedel respıratorlyq vırýs­tyq juqpanyń órshýi tirkelip otyrǵan joq. Qazir №2 oblystyq ınfeksııalyq aýrýhanada jedel respıratorlyq vırýstyq juq­pamen 30-ǵa jýyq bala em alyp jatyr.

– Jedel respıratorlyq vı­rýstyq juqpaǵa qatysty maý­symdyq ahýal turaqty kúıinde saqtalyp otyr. Bizdiń aýrýhana vırýstyq juqpaly aýrýlarǵa shaldyqqandardy emdeý úshin dári-dármektermen tolyqtaı qamtyldy, – deıdi №2 oblystyq ınfeksııalyq aýrhananyń bólim meńgerýshisi Ásııa Sıdeshova.

Onyń aıtýynsha, bıylǵy naýryzdan beri atalǵan aýrýha­nada koronavırýs ınfeksııasyn juqtyrǵan 30 bala emdelip, sa­­ýy­ǵyp shyǵypty. Balalar ko­ro­navırýsty jeńil jaǵdaıda ótkerip, klınıkalyq belgileri asa qatty bilinbepti. Osylaısha, qaýipti indettiń qaqpanyna tús­ken balalardyń bári otbasyna aman-saý oralyp, ata-anasymen qaýyshty.

Atyraý oblysy