Qaıbir jyldary Ýrýgvaıdyń maqtanyshyna aınalǵan 33 jastaǵy Edınson Kavanı jeti jyl óner kórsetken PSJ klýbynan ketip, erkin agent retinde aǵylshynnyń «Manchester Iýnaıted» komandasyn tolyqtyrdy. 2013 jyly «Napolıdan» PSJ-ǵa 64 mıllıonǵa aýysyp kelgen Kavanı birden birneshe rekordty jańartqan edi. Atap aıtar bolsaq, PSJ-nyń eń qymbatqa satyp alǵan, al «Napolıdiń» qymbatqa satqan eń birinshi fýtbolshysy atandy. Sonymen qatar Kavanı Fransııa fýtbolyndaǵy eń qymbat oıynshysy degen ataqqa ıe boldy.
Edınsondy «Manchester Iýnaıtedten» bólek, «Atletıko», «Roma» jáne «Chelsı» sekildi klýbtar da óz qatarynan kórgisi keletinderin aıtqan bolatyn. Biraq ýrýgvaılyq fýtbolshy «MIý-di» tańdady.
2014 jyly fýtboldan Brazılııada ótken álem chempıonatynyń eń úzdik surmergeni atanǵan kolýmbııalyq Hames Rodrıges Madrıdtiń «Real» klýbynan ketti. Kezinde Hamestiń Fransııadan Ispanııaǵa kelýine sebepshi bolǵan sol kezdegi «Realdyń» bas bapkeri, qazirgi «Evertonnyń» bas jattyqtyrýshysy Karlo Anchelottı endi ony Anglııaǵa shaqyrdy. «Realda» qańtarylyp qalǵan 29 jastaǵy fýtbolshy Anglııaǵa kele salyp, jaqsy oıynymen mamandardyń kózine túse bastady. Aǵylshyn Premer-lıgasynda Rodrıges 4 oıynda jasyl alańǵa shyǵyp, úsh ret mergendigimen kózge tústi.
Sondaı-aq «Real» keıingi jyldary bas bapker Zınedın Zıdanmen «áńgimesi» jaraspaı júrgen Ýels quramasynyń ańyzyna aınalǵan Garet Beıldi óziniń burynǵy klýby «Tottenhemge» jalǵa berdi. Jankúıerlerdiń esinde bolsa, 31 jastaǵy shabýylshy 2013 jyly «Real» klýbyna kelgen bolatyn. Jeti jyl ishinde ol Madrıd klýbynda 251 match ótkizip, 105 gol soqqan eken.
«Barselona» Messıdi komandadan jibermegenimen, basqa bir juldyzy, ıaǵnı osydan alty jyl buryn 80 mıllıon eýroǵa satyp alǵan ýrýgvaılyq shabýylshy Lýıs Sýaresti klýbtyń negizgi qarsylasy sanalǵan «Atletıko Madrıdke» tegin bere saldy. Sondaı-aq «Barselona» Havıdiń izbasary dep baǵalanǵan 24 jastaǵy brazılııalyq talantty jartylaı qorǵaýshy Artýrdy komanda basshylyǵy «Iýventýs» klýbyna 72 mıllıon eýroǵa satty. Esesine, «Barselona» Týrın komandasynan Mıral Pıanıchti 60 mıllıon eýroǵa satyp aldy. Osylaısha katalonııalyqtar transferden 12 mıllıon eýro tabys tapty. Alaıda jankúıerler 24 jastaǵy oıynshynyń ornyna 30 jastaǵy egde fýtbolshyny satyp alǵan basshylyqqa narazy ekenin bildirýde.
«Bavarııa» Germanııa quramasynyń oıynshylaryn bir komandaǵa toptastyrý josparynan áli de bas tartqan joq. Býndestım klýby osydan bir jyl buryn «Manchester Sıtı» men Germanııa quramasynyń oıynshysy sanalǵan Leroı Saneni satyp ala almaǵan-dy. Turaqtylyqqa jáne sózge berik nemister bıyl Saneni óz komandalaryna qosyp aldy. Anglııadan fýtbolshy aldyrtqan «Bavarııa» bir oıynshysyn fýtboldyń otanyna jiberdi. 29 jastaǵy Ispanııa azamaty Tıago Alkantarany byltyrǵy Anglııa chempıony «Lıverpýlge» 22 mıllıon eýroǵa satty.
Eýropadaǵy transfer bazarynyń sońǵy kúninde fýtbol jankúıerleri erekshe transfer saýdasyna kýá boldy. Londonnyń «Arsenal» klýby komandanyń maskoty – Gýnnerzavrmen qoshtasqanyn jarııalady. Súıkimdi dınozavr «kanonırlerdiń» jankúıerlerin klýb «Haıberı» stadıonynda oınap júrgen kezden beri qýantyp kelgen-di. Klýb osylaısha maskotty jumystan shyǵarý arqyly aqsha únemdeýdi josparlaǵan eken.
