Bul týraly onlaın baspasóz qyzmetinde Pavlodar oblysy boıynsha taýarlar men qyzmetterdiń sapasyn baqylaý departamentiniń basshysy Batyrbek Álıev málim etti.
"3 qazan kúni Pavlodar qalasyndaǵy mektepterdiń birinde 2-synyp oqýshysynan KVI anyqtaldy. Ol sońǵy ret 30 qyrkúıek kúni sabaqqa barǵan. Dárigerlerge ózi júgindi. Ol balamen 17 adam baılanysta bolǵan. Onyń ishinde synyptaǵy 14 oqýshy bar. Qalǵany – sabaq bergen muǵalimderi. Qazir bári tekserilýde. Baılanysta bolǵandar úı karantıninde. Atalǵan synyp qashyqtyqtan oqýǵa aýysty", dedi Batyrbek Álıev.
Oqý jyly bastalǵannan beri óńirde 12 oqýshydan koronavırýs anyqtalǵan. Sharbaqty aýdanynda – 5, Aqsýda – 1, Pavlodar qalasynda – 6 oqýshy indetti juqtyrǵan.
"Oblysymyzda 356 mektep bar. 110 mektep monıtorıng boıynsha tekserildi. 2 mektep talaptardy buzǵan. Qalǵan mektepterge tekserilý júrgizilýde", dedi departament basshysy.
Al, oblystyq densaýlyq saqtaý basqarmasy basshysynyń orynbasary Sáýle Arystanova óńirdegi barlyq aýrýhanalardyń indettiń 2-tolqynyna daıyndyǵy tekserilip jatqanyn atap ótti.
"Búginde oblysymyzda 210 ókpeni jasandy jeldetý qurylǵysy bar. Taǵy 142 qurylǵyny satyp alýdamyz. Jalpy bundaı 352 qurylǵy bolady. Naýryz aıynda budan 2 ese az bolǵan edi. Sondaı-aq 535 ottegi beretin, 749 ottegi konsentraty bar. Qazirgi ýaqytta 1334 tósekti ottekpen qamtý josparlanǵan. Indettiń 2-tolqynyna daıyndyq barysynda 166 mobıldi toptar jasaqtaldy. Top quramyna qajetti mamandar kiredi", dedi Sáýle Arystanova.
Basqarma basshysynyń aıtýynsha, Pavlodarda boı kóterip jatqan jyldam áreket etýge arnalǵan jańa modýldi ınfeksııalyq gospıtal qarasha-jeltoqsan aılarynda daıyn bolýy tıis.
Aıta keteıik, osy ýaqytqa deıin Pavlodar oblysynda 3955 adamnan koronavırýs anyqtalǵan. 3777 adam indetten jazylyp shyqty. Búginde 282 adam stasıonarlarda jatyr. 12 adamnan naqty koronavırýs anyqtalsa, 229 adam kúdikpen jatqyzylǵan. Al, 41 adam tynys alý organdaryndaǵy aýrýǵa qatysty jatyr.
