Ákimniń aıtýynsha, epıdemıologııalyq jaǵdaı turaqty bolǵan jaǵdaıda qalanyń medısınalyq uıymdarynda josparly túrde 1 380 tósek-oryn qarastyrylǵan. Indet órshigen jaǵdaıda qalanyń provızorlyq jáne ınfeksııalyq stasıonarlaryndaǵy oryndar sany 4 025 tósekke deıin ulǵaıtylatyn bolady.
Budan basqa, qalanyń medısınalyq uıymdarynda juqpaly aýrýlardyń órshýi kezinde aýrýlardy emdeýge arnalǵan tósek-oryn 5496 orynǵa deıin ulǵaıtý josparlanýda. Qazirgi ýaqytta Shymkent osy úsh kezeńge daıyn.
Bul jumysqa 36 medısınalyq uıym jumyldyrylady. Sonymen qatar koronavırýspen aýyratyn naýqastardy qabyldaýǵa arnalǵan 13 dıagnostıkalyq ortalyq daıyndaldy. Onda 13 kompıýterlik tomograf jáne 30 rentgen apparaty qarastyrylǵan. Sondaı-aq qalada 7 PTR zerthanasy bar, olar kúnine koronavırýsqa 3500 test ótkizedi. Olardyń úsheýi jańa.
Indetpen kúresý úshin qalada jańa call-center iske qosyldy. Qońyraýlardy qabyldaý jelileriniń sany 9-dan 28-ge deıin ósti, operatorlar sany úsh ese ósti. Táýligine call-center mamandary 3 500 qońyraý qabyldaı alady.
Qyrkúıek aıynda medısınalyq uıymdardyń ózara is-qımyl algorıtmi pysyqtaldy, naýqastardy sanattar boıynsha bólýdi úılestirý boıynsha úsh oqý-jattyǵý ótkizildi.
