Jer jánnaty Jetisý óńirinen túrki áleminiń besigi Túrkistan shaharyna jetken «Bizdiń Beısen» barlyq kitaphana tórinen oryn almaq. Jańa kitapty oqyrmandar rýhanı ordadan alyp, oqı alady.
Elbasy Nursultan Nazarbaev pen Prezıdent Qasym-Jomart Toqaevtyń kóńil aıtýynan bastalǵan jınaqta tanymal el aǵalarynyń esteligi, zamandastarynyń tolǵanystary, aqyndardyń arnaý jyrlary, qarapaıyp kórermenderdiń ystyq yqylasy men saǵynyshy toptastyrylǵan.
Qarapaıymdylyǵymen qalyń qazaqtyń esinde qalǵan qoǵam qaıratkerine arnalǵan týyndynyń tusaýkeseri dara tulǵanyń Túrkistan oblysyndaǵy áriptes, dos, zamandastarynyń basyn qosty. Halqynyń janyna jalaý bolǵan Beısenniń bolmysyn tanytatyn oqıǵalardy eske alyp, áserli estelikterdiń tıegin aǵytty. Ahmet Iаsaýı atyndaǵy halyqaralyq qazaq-túrik ýnıversıtetiniń ǵylymı kitaphanasynda ótken rýhanı jıynǵa ýnıversıtettiń jýrnalıstıka kafedrasynyń belsendi jastary qatysty.
Erkin formatta ótken kezdesýde sóz alǵan Beısen Quranbektiń kýrstasy, Jýrnalıster odaǵynyń Túrkistan oblystyq fılıalynyń tóraǵasy Ǵalymjan Elshibaı Iаsaýı atyndaǵy halyqaralyq qazaq-túrik ýnıversıtetiniń jýrnalıstıka kafedrasynyń stýdentterine Beısen Quranbek atyndaǵy 3 stıpendııa taǵaıyndalatynyn jetkizdi.
Kezdesý sońynda «Bizdiń Beısen» estelik kitaby ýnıversıtet kitaphanasyna jáne jýrnalıstıka kafedrasyna syıǵa berildi. Jınaq qazaq eliniń birtýar perzenti, telejýrnalıstıka tarlany – Beısen Abaıuly Quranbekti qurmetpen eske alýshy qalyń kópshilikke arnalǵan.
