10 qazan kúni saǵat 16.30. shamasynda Oral qalasynyń Zashaǵan kentinde Ekstremızge qarsy is-qımyl jáne krımınaldyq polısııa qyzmetkerleri kúdikti kóringen «Nissan Maxima» avtokóligin toqtatqan. Kólik ıesi – 1989jyly týǵan Qaztalov aýdanynyń turǵyny eken. Salonda aýzyn shymshyp baılaǵan úsh qapshyqtyń ishi tekshelep jınaǵan kıik múıizi bolyp shyqty. Sanap kórgende, bul qapshyqtarda 632 dana múıiz bar ekeni anyqtaldy.
«Osy fakti boıynsha Qazaqstan RespýblıkasyQylmystyq Kodeksiniń 339-1 baby boıynsha sotqa deıingi tergep, tekserý bastaldy. Kúdiktige «janýarlardyń sırek kezdesetin jáne quryp ketý qaýpi tóngen túrlerin, olardyń bólikterin nemese derıvattaryn zańsyz qolǵa túsirý, ıemdený, saqtaý, ótkizý, ákelý, áketý, jóneltý, tasymaldaý nemese joıý» degen aıyp taǵylyp, ýaqytsha ustapý ızolıatoryna qamaldy» delingen Batys Qazaqstan oblystyq Polısııa departamentiniń baspasóz qyzmeti taratqan habarlamada.
Bizge jetken derekke qaraǵanda, ustalǵan adam 2019 jyly «zańsyz ańshylyqpen aınalysqany úshin» jaýapqa tartylǵan eken. Osy jolǵy qylmysy dáleldense, ol 7 jyldan 12 jylǵa deıin bas bostandyǵynan aıyrylýy múmkin.
Jyl basynan beri Batys Qazaqstan oblysynda Qylmystyq kodekstiń 339-1 baby boıynsha 39 fakti tirkelgen. Al ótken jyldyń 9 aıynda mundaı qylmystyń sany 11 bolǵan.
Batys Qazaqstan oblysy
