Batys Qazaqstan oblysy boıynsha ekonomıkalyq tergeý departamenti Qylmystyq kodekstiń 217-baby - "qarjylyq pıramıda qurý" faktisi boıynsha birneshe qylmystyq isti tirkep, tergeý júrgizýde.
Sonyń biri "Lıder" jáne "Altyn Tumar" qarjylyq pıramıdalaryn uıymdastyrǵan azamatsha Ch.-ǵa qatysty is. Bul alaıaq áıel "tez arada baıyp ketesiz" dep ýáde berip, aqshany eki ese kóbeıtip qaıtaratynyna sendirip, sengish azamattardan 68 567 056 teńgeni jınap alǵan. Bul "qarjylyq pıramıdaǵa" 2 myńnan astam adam qatysqan.
"Jaqynda Qylmystyq kodekstiń 217-baby boıynsha sotqa deıingi tergeý aıaqtaldy. Bul azamatsha istegen isi úshin sot aldynda jaýap beredi" delingen ekonomıkalyq tergeý departamenti taratqan baspasóz paraǵynda.
Bıyl aqpan aıynda Memleket basshysy Qasym-Jomart Toqaev quqyq qorǵaý organdary men qarjy qurylymdarynyń basshylarymen kezdesýinde «qarjy pıramıdasyn» uıymdastyrǵan keıbir qarjy uıymdarynyń zańsyz áreketterine nazar aýdarǵan bolatyn.
"Quqyq qorǵaý organdary bolǵan jaǵdaıdy egjeı-tegjeıli tekserip, azamattardyń quqyǵy buzylýyna jol bermeý úshin tıimdi sharalar qabyldaýy tıis" degen edi Prezıdent.
Memleket basshysynyń osy tapsyrmasyn oryndaý úshin Qazaqstan Respýblıkasy Qarjy mınıstrliginiń Qarjy monıtorıngi komıteti "qarjylyq pıramıdalarǵa" qarsy is-qımyl boıynsha aýmaqtyq ekonomıkalyq tergeý departamentteriniń jumysyn erekshe baqylaýǵa alǵan.
