Rýhanııat • 14 Qazan, 2020

Kindigimdi kesken jurt

909 ret kórsetildi

Qarlyǵash qadamymdy basqanda da, top-top balamen túz tozańyn tóbege kóterip, asyr salǵanda da, qııa ketip qıyr shette júrgende de júrekke uly esimdeı uıalap, kóńilden bir ýaqyt ketken emes. Qýanyshty súıinshilep, shattyqty eselep jetkizetin, ańqa bir keýip alaburtqan shaqta shóldi basatyn sýsar meken. Kepıetin kókiregime quıyp, kesirden saqtaǵan, keń álemge jol ashyp, danalyqqa baptaǵan kindigimdi kesken jurt. Bul – babamnyń ıisi sińgen topyraq, kindik qanym tamǵan jer.

Kindigimdi kesken jurt – Otan sóziniń bir balamasyndaı. Osy bir aıaýly ataýdyń astaryna úńilseńiz alyp maǵyna jatyr. Shyr etip dúnıe esigin ashqanda alǵash jutqan aýań men mańdaıyńnan súıgen kúnniń shuǵylasy sol uly uǵymnan bastaý alatyndaı. Otan – kindik qany tamǵan topyraq. Sol topyraqqa tabanyń tıgen sátten bastap ol kindik jurtyńa aınalady. Kesilgen kindik – el-ananyń qursaǵynan shyqqan soń Jer-anaǵa baılanatyn altyn tamyryń, ósip-órbýdiń, otanyńda oshaq otyn jaǵyp, tútin tútetýdiń túpki negizi, asyl arqaýy.

Kindik kesken jurt arman kenishińniń baspaldaǵy ispetti. Baıyrǵy babatanym yrymdap, jańa týǵan náresteniń kindigin eshkim baspaıtyn jerge kómgen eken. Onysy adam men topyraq arasyndaǵy baılanysty nyǵaıtý. Jer baýyrlap eńbektegen sábı eńkish tartqan qarııaǵa aınalǵansha jer kindikten qýat alatynyna kámil sengen. Ata-babamyz qany tamǵan topyraqty solaısha qadir tutyp, ultaraqtaı jer úshin urysqa túskeni kópke belgili. Sondyqtan qazaq balasy shyr etip ómirge kelisimen alyp atamekeni, babadan jetken baıtaq dalasyna qasıetti bir syrly uǵymmen, úzilmeıtin názik bir qasterli qubylyspen máńgi baılanyp ómir súredi.

О́mirge kóz ashyp kelisimen osylaısha tý­ǵan jeri, atajurtymen tamyrymen berik baılanǵan ordaly eldiń ár ulany týǵan to­pyraǵyn qasyq qany qalǵansha qorǵap, synyq súıem jerin jatqa bermeıtin qaharman bolýynyń syry osynda. Qazaq kindik she­sheni tańdaýǵa da erekshe mán beretini, onyń boıyndaǵy asyl qasıetter náresteni jerden kóterip alyp, kindigin kesken sátten bóbekke juǵysty bolady dep ılanýynda da tereń mán bar. Ata-anaǵa qamqor bolsyn dep qyzdyń kindigin úıdiń ishine, uldyń kindigin óristi bolsyn dep dalaǵa kómetini de tegin emes. Sharanada toǵyz aı shaıqalǵanda anamen jalǵastyryp turǵan jalqy tamyr endi perzentin Jer-anamen ushtastyryp, Otannan nár alýyna jalǵastyq tabý úshin ata-baba osylaısha kádeli salt jasaıdy. Halqymyzdyń «kir jýyp, kindik kesken týǵan jerim» degen bir aýyz sózine osyndaı keń maǵyna, shalqar uǵym qalaı syıyp ketkenine tańdanasyń?!

Qundylyqtar qunsyzdanyp, álemniń aralas-quralastyǵy tyǵyz bola bastaǵan jahandaný zamany kóptegen qasterli uǵym­darymyzǵa, qasıetti salt-dástúrimizge orasan ózgerister engizip jatyr. Sonyń biri – kindik keser salty. Osy uǵymnyń arqaýy setineýmen birge týǵan jer, Otan-ana uǵymyna da selkeý túspeı me?

Iá, adamdy týǵan jerimen baılanys­tyra­tyn kıeli uǵymdar jeterlik. Búginde biz sol tálimdi túsinikterden ajyrap bara jat­qanymyz jasyryn emes. Máselen, jaǵdaıy barlar muhıt asyp, sábıin shetelde ómirge ákeledi. Sol arqyly psıhologııalyq turǵydan balanyń jaryq dúnıege kelmeı jatyp, óziniń jumyr jerinen alystatady. Sóıtip sábıiniń kindigi ózge eldiń otyna kúıip, kúline aınalady. Al endi osy perishte-perzenttiń túısiginde týǵan jer degen uǵym, atajurt degen bolmys qalaı qalyptasa alady? Ol sábı qursaqta jatqan kezinen-aq óz jerin qor, ózge ólkeni zor tutqan ata-ananyń kemshin túsinigin boıyna sińirip týmasyna kim kepil? Demek, ulttyq kod, qasıetti uǵym-tańbalar ómirge kelmeı jatyp-aq náresteniń qalaýynsyz kúlparsha ózgeriske túsip jatyr emes pe?

Árıne, taý men taýdyń, jer men jerdiń aıyrmasy joq. Sol baıaǵy bir aspan, sol tap-tastaı kók ózen. Ony qasıetti, kıeli etip turǵan – babańnyń tógilgen qany, balańnyń kesilgen kindigi. Qursaqty jaryp shyqqan shaqalaqtyń kindigi týǵan jerde kesilmeı, óskende ózge elge alańdap otyrsa, «kindik kes­ken jurt» uǵymy da kómeski tartpaıdy ma?!

Biz jat jerde jaý qolynan sheıit bolaryn sezgende bir saýsaǵyn kesip berip, «týǵan jer topyraǵyna men dep jerleńder» dep amanat etken keshegi kózsiz erlerdiń urpaǵy emes pe edik? О́ıtkeni qoıanjon qyraty da, tomsaryp turǵan tóbesi de, shúıkesin shúkirimen jalǵaı ıirip otyratyn baýyry bulaq baıaǵynyń adamdary da sol kindik qany tamǵan topyraqtan bir eli ajyraǵan emes edi. Ajyramaıdy da dep senemiz. Sebebi kez kelgen adam kindik kesken topyraǵymen bıik...

 

Sońǵy jańalyqtar

Altyn shynjyrdyń sońǵy shyǵyrshyǵy...

Rýhanııat • Búgin, 23:01

Tergeýshilerdiń ustazy ulyqtaldy

Aımaqtar • Búgin, 19:35

Reseı ınvestorlary Atyraýǵa bet burdy

Aımaqtar • Búgin, 16:56

Erteń Úkimet otyrysy ótedi

Úkimet • Búgin, 15:17

Qýatty qurylymnyń shýaqty merekesi

Qazaqstan • Búgin, 14:15

Naýryz aıynda aýa raıy qandaı bolady?

Aýa raıy • Búgin, 13:30

Uqsas jańalyqtar