Oqıǵa búgin, 16 qazan kúni tańǵy saǵat 08.40. shamasynda bolǵan. Ábilqaıyr han dańǵyly boıyndaǵy Sıolkovskıı aıaldamasynda №22 jáne №1 avtobýstar soqtyǵysqan. Oqıǵa ornyna «jedel járdem» shaqyrylyp, dárigerler 5 adamdy shuǵyl túrde aýrýhanaǵa alyp ketti. Ertemen halyq jumysqa asyǵatyn qarbalas shaqta bolǵan jol oqıǵasynan jeńil avtokólik te zardap shegipti. О́ıtkeni qaqtyǵystan qashyp, baǵytyn kilt burǵan №22 avtobýs «Volkswagen» markaly kóliktiń janyn syryp ótken.
- «Jedel járdem» qyzmetine qońyraý túsken soń 5 mınýt ótkende dárigerler oqıǵa ornyna jetti. Zardap shekken 5 adamnyń biri – 16 jastaǵy jasóspirim. Oǵan aldyn ala qoıylǵan dıagnoz – jabyq bas-mı jaraqaty, mıy shaıqalý, keýdeniń aldyńǵy jaǵy zaqymdanǵan. 50 jastaǵy áıel men 37 jastaǵy eki er adam da basynan jaraqattanǵan, «mıy shaıqalǵan» degen qaýip boldy. Jigittiń biri keýde tusynan omyrtqasy zaqymdanǵan. Al 30 jastaǵy bir áıeldiń aıaǵy aýyr eken, dárigerler túsik qaýpinen alańdady, - deıdi oblystyq densaýlyq saqtaý basqarmasy baspasóz hatshysy Sáýle Zaǵıdýllına.
Jaraqat alǵandardyń bári de oblystyq kópbeıindi aýrýhanaǵa jetkizilip, dıagnozy naqtylandy. Bir táýiri, zardap shekkenderdiń eshqaısysynyń mıy shaıqalmaǵan bolyp shyqty. Kóbinde bastyń jumsaq quıqasy jaraqattanǵan. 1983 jyly týǵan jigittiń arqasynda syrylǵan jaraqat bar. Al 1989 jyly týǵan kelinshektiń júktiligi 13-14 apta eken. Oǵan «Ishtiń aldyńǵy jaǵyn uryp alý» degen dıagnoz qoıyldy. Jaraqat alǵandardyń bárine de alǵashqy medısınalyq kómek kórsetilip, ambýlatorııalyq em taǵaıyndalǵan.
Aıta keteıik, qalanyń bul aımaǵynda Oral «Servıs» tehnologııalyq kolledji, «Jaıyq» bazary sııaqty nysandar ornalasqan.
Batys Qazaqstan oblysy
