Shveısarııamen iskerlik belsendilik jandanady

15 qazanda Saýda kelisimderi jónindegi Federaldy keńestiń ýákiletti ókilderi Ervın Bollınger jáne Markýs Shlagenhofpen eki eldiń saýda-ekonomıkalyq qatynastaryn damytý jáne olardyń kópjaqty plat­formalardaǵy ózara is-qımyldaryna qatysty kezdesý ótti.

B.Sultanov pen E.Bollınger Saýda-eko­no­mıkalyq yntymaqtastyq jónindegi Qazaq­stan-Shveısarııa úkimetaralyq komıs­sııasynyń teń tóraǵalary bola otyryp, qol jetkizilgen ýaǵdalastyqtardy iske asyrý boıynsha jumystardyń barysyn talqylap, olardy is júzinde júzege asyrýdyń aldaǵy josparlaryn belgiledi. Pandemııanyń saldary Qazaqstan men Shveısarııa arasyndaǵy saýda-ekonomıkalyq qatynastarda da kórinis taýyp, iskerlik belsendiliktiń tómendeýine sebep bolǵany atap ótildi. Qazirgi ýaqytta eki taraptyń kúsh-jigeri shıkizattyq emes taýarlardyń ekijaqty saýdany sapaly keńeıtýge jáne birlesken jobalardy jasaýǵa baǵyttalǵan.

Kópjaqty taqyryptar boıynsha belsendi pikir almasý kezinde shveı­sarııalyq tarap halyqaralyq uıymdar sheńberinde Qazaq­stanmen ózara árekettesý deńgeıin joǵary baǵalady. Atap aıtqanda, kópjaqty saýdaǵa jaýap beretin M.Shlager­hofpen qazaqstandyq mınıstr DSU-nyń damý tendensııalaryn jáne pandemııanyń saldary men proteksıonıstik sezimderdiń ósýimen qıyndatylǵan qazirgi jaǵdaı­daǵy uıymnyń jahandyq platforma retin­degi rólin talqylady. 2021 jyly DSU elderiniń 12-shi Mınıstrlik konferensııasyn ótkizýge Qazaqstannyń daıyndyǵyn rastaı otyryp, B.Sultanov Nur-Sultanda Federaldyq prezıdent bastaǵan shveısarııalyq delegasııa­ny qabyldaýǵa qýanatynyn atap ótti.

B.Sultanov Bucher Industries hol­dınginiń keńesin qosa basqaratyn, economiesuisse Shveısarııa kásipkerler qaýym­­dastyǵy Syrtqy ekonomıkalyq komıs­­sııasynyń prezıdenti Fılıpp Mozı­mannǵa Qazaqstan ekonomıkasynyń basym sek­torlarynyń damýyna saraptamalyq taldaý jasaý negizinde iskerlik baılanystardy damytýdy usyndy. Shveısarııalyq ónerkásipshi bul ıdeıany qoldap, yntymaq­tastyqqa daıyn ekenin rastady.

16 qazanda shveısarııalyq Militzer & Münch International logıstıkalyq holdıngi­niń basshylyǵymen kelissózder ótti. Atalǵan kompanııanyń negizgi naryqtary – Eýrazııa men Taıaý Shyǵys elderi. Is júzinde kompanııa «Bir beldeý – bir jol» transkontınentaldyq kólik jobasynyń aýqymdy áleýetin iske asyrady. Shveısarııa bıznesi osy jobanyń kele­shegin kórip, ony júzege asyrýǵa qaty­sýǵa úlken qyzyǵýshylyq tanytyp otyr. Noý-haý men ınnovasııanyń nátıjesinde Shveısarııa kásiporyndary mańyzdy ról atqarsa, Qazaqstan bul turǵyda jan-jaqty qoldaý men ońtaıly jaǵdaı usynýǵa daıyn.

Sapar sońynda B.Sultanov porshendi kom­pressorlar óndirisi boıynsha álemdegi kósh­basshy Burckhardt Compression kásip­ornynda boldy. Kompanııanyń bas dırektory Marsel Pavlıchek «Shveısarııa-TMD» bir­les­ken saýda palatasynyń da prezıdenti ekenin aıta ketken jón. Ol kompanııa úshin qazaq­s­tandyq naryqtyń, ásirese Qazaqstannyń EAEO-ǵa qatysýy jaǵdaıyndaǵy mańyzdy­lyǵyn atap ótti. Sondaı-aq taraptar sarap­shyl­ardyń tujy­rymdaryn basshylyqqa alyp, qazaq­stan­dyq ekonomıkanyń basym sektor­lary­nyń áleýetin is júzinde júzege asyrýǵa nazar aýdarýǵa kelisti.