Qylyshyn súıretken qys ta qyr astyna kelip qaldy. Oblysta qysqa daıyndyq pysyqtalyp, sońǵy tekserister júrip jatyr. Eń aldymen áleýmettik nysandardyń, kópqabatty turǵyn úılerdiń, sondaı-aq kommýnaldyq jeliler men qurylǵylardyń jylytý maýsymyna daıyndyǵy óte mańyzdy.
Oral qalasynyń ákimi Abat Shynybekovtiń habarlaýynsha, oblys ortalyǵynda josparlanǵan jańartý, jóndeý jumystarynyń bári tolyǵymen atqarylǵan, qalaishilik jylý jelileri 100% daıyn. Bıyl Oral qalasynda jylý jyldaǵydaı 15 qazannan emes, odan bir apta buryn berildi.
О́ńirdegi ekinshi iri eldi meken – Aqsaı qalasynda da daıyndyq josparǵa saı júrgizilgen. Jylý júıeleri ýaqtyly synaqtan ótip, tekserilgen.
Oblysty elektr qýatymen qamtıtyn «Batys Qazaqstan REK» aksıonerlik qoǵamy bıyl josparlanǵan 2510,6 km jeliniń 93%-y jóndelgenin málimdedi. Jaqyn kúnderi bul jumystar tolyq aıaqtalmaq. Kúrdeli jóndeý úshin SV-105 markaly temirbeton baǵananyń 656 danasy, SV-95 markaly temirbeton baǵananyń 215 danasy satyp alynǵan.
Árıne, qysqa daıyndyq degende aldymen áleýmettik nysandardyń ázirligi sóz bolady. Dál qazir óńirdegi densaýlyq saqtaý nysandary saqadaı saı. Bilim berý nysandarynyń daıyndyǵy 97%-dy quraǵan. Bul jerde 19 nysanda kúrdeli jóndeý júrip jatqanyn eskerý kerek. Mádenıet nysandarynyń daıyndyǵy 99% bolǵan. Bul salada da 4 nysanda kúrdeli jóndeý júrip jatyr.
Oral qalasynda – 1196 úı, Aqsaı qalasynda 113 kópqabatty turǵyn úı ortalyqtandyrylǵan jylý jelisine qosylǵan.
Batys Qazaqstan oblysy tabıǵı gazben barynsha tolyq qamtylǵan óńir sanalady. Kómir nemese mazýt jaǵatyn áleýmettik nysandar saýsaqpen sanarlyq. Degenmen shalǵaı aýyldarda qalǵan mundaı nysandar úshin 2,8 myń tonna kómir, 175 tonna suıyq otyn qajettigi eskerilip, tolyq jetkizilgen. Kógildir otyn qubyryna qosylmaǵan turǵyndarǵa qajet bolsa, «Talap» aksıonerlik qoǵamynyń qoımasynda 700 tonnadaı kómir saqtaýly tur.
– Batys Qazaqstan oblysynda bilim salasynda 627 memlekettik nysan bar. Sonyń 520-sy kógildir otynǵa qosylǵan. Al 12 nysan suıyq otynmen, 71 ǵımarat kómirmen, 15-i elektr qýatymen jylytylady. 2020-2021 jylytý maýsymyna tolyq daıynbyz, – deıdi oblystyq bilim basqarmasynyń basshysy Aıgúl Myńbaeva.
Qazirgi tańda oblys turǵyndarynyń 96,1%-y tabıǵı gazben qamtylǵan. Bıyl eldi mekenderdi gazdandyrý úshin bıýdjetten bólingen 910 mln teńgege Terekti aýdanynyń 10 aýylyna, Aqjaıyq aýdanynyń 11 eldi mekenine gaz qubyry tartylyp jatyr. Bul aýyldarda barlyǵy 6 myńdaı adam turady. Bul jumys máresine jetkende oblys turǵyndaryn tabıǵı gazben qamtý kórsetkishi 96,7%-ǵa jetpek.
Batys Qazaqstan oblystyq energetıka jáne turǵyn úı-kommýnaldyq sharýashylyq basqarmasynyń basshysy Asqar Ǵabıdýllın «Eldi mekenderdi gazdandyrý» jobasy boıynsha 2020 jyly respýblıka bıýdjetinen 176 mln 211 myń teńge, oblys bıýdjetinen 783 mln 518 myń teńge bólingenin, bul qarjy bıylǵy 1 qarashaǵa deıin tolyq ıgeriletinin jetkizdi.
Batys Qazaqstan oblysy
