– Bizdiń Terekti aýdany aýyl sharýashylyǵyn damytýǵa óte qolaıly óńir. Aýdannyń barlyq jer kóleminiń 63 paıyzy, ıaǵnı 501 992 gektary aýyl sharýashylyǵy maqsatyndaǵy jerler sanatyna jatady. Biz osy alqaptardy barynsha tıimdi paıdalaný máselesine kóńil bólip otyrmyz, – deıdi Terekti aýdanynyń ákimi Arman О́teǵulov.
Iá, aýdanda 238 948 ga alqap egistikke qolaıly sanatqa jatady. 2020 jyly óńdelgen egistik alqabynyń kólemi 146 myń gektarǵa jýyq. Súr jer 18,4 myń ga degende, aýdan dıqandary úshin áli paıdalanylmaǵan múmkindik bar ekendigi kórinip tur. Jalpy bosalqy jer qory – 137 788 gektar. Sonyń ishinde jaıylym – 105 568 ga, óńdelmegen egistik jerler – 5 451 ga, shabyndyq – 16 422 ga, kópjyldyq ekpe aǵashtar – 116 ga, baqsha – 32 ga jáne basqa jerler – 10 199 gektardy quraıdy eken.
Memleket basshysy Qasym-Jomart Toqaev «Kim jumys istese, jer sonyń ıeliginde bolýy kerek» degen bolatyn. Igerilmeı jatqan jáne ıgerilýi maqsatqa saı emes jerlerdi keri qaıtarý máselesi Terekti aýdanynda qatań baqylaýǵa alyndy. Jerdi ıgere almaǵan jáne jaldaý merzimi aıaqtalǵan kásipkerlerden jalpy kólemi 11 myń ga bolatyn 16 jer ýchaskesi memlekettik qorǵa qaıtaryldy.
Qaıtarylǵan alqaptar eńbek etýshi sharýalarǵa ádil, ashyq konkýrs negizinde berilýde. Jyl basynan beri osyndaı 4 konkýrs ótip, jalpy kólemi 23 357 ga jer telimi usynyldy.
Bıznesti damytý maqsatynda byltyr ótken 5 aýksıonda bıýdjetke 2 mln teńge tússe, bıyl ótkizilgen 5 aýksıon nátıjesinde bıýdjetke 15 mln teńgege jýyq qarjy túsken eken.
