Is-sharaǵa BUU Bas hatshysy Antonıý Gýterrısh, Syrtqy ister mınıstri Muhtar Tileýberdi, Syrtqy ister mınıstrliginiń Erekshe tapsyrmalar jónindegi Elshisi Aqmaral Arystanbekova jáne basqa da kóptegen dıplomatııalyq korpýstyń, azamattyq jáne isker qoǵamdastyqtardyń, BAQ pen mádenıet ókilderi qatysty.
BUU óziniń 75 jyldyq mereıtoıyn aýyr ekonomıkalyq jáne áleýmettik zardaptary bar, buryn-sońdy bolyp kórmegen jahandyq kúızelis kezinde atap ótýde. BUU kúni Uıym qyzmeti men jetistikterin belgili bir túrde qorytyndylaý jáne álem nazaryn Uıymnyń joǵary mıssııasyna aýdarý maqsatynda dúnıejúzinde kezdesýler, dóńgelek ústelder men kórmeler ótkiziledi.
Qazaqstan UN75 jahandyq saýalnamasynyń eń belsendi qatysýshylarynyń birine aınaldy. Saýalnamaǵa 35 myńnan astam qazaqstandyq qatysyp, respondentterdiń kópshiligi halyqaralyq yntymaqtastyqty nyǵaıtý, densaýlyq saqtaý salasy, kóshi-qon jáne klımattyń ózgerýine nazar aýdarý kerektigin atap ótti.
BUU-nyń Qazaqstandaǵy Turaqty úılestirýshisiniń mindetin atqarýshy Iаkýp Berısh uıymnyń elimizdegi jumysyna toqtaldy.
"BUU-nyń Qazaqstandaǵy ókildigi jumys isteı bastaǵannan beri Uıymnyń Eldik toby turaqty damý maqsattaryna jetý úshin Qazaqstan halqy men úkimetine aıtarlyqtaı qoldaý kórsetip keledi. Osyǵan baılanysty biz BUU-nyń turaqty damý jónindegi yntymaqtastyqtyń jańa Sheńberlik baǵdarlamasyna ulttyq seriktestikterdiń basym kúshterin shoǵyrlandyrý jáne resýrstardy jumyldyrý arqyly, sonyń ishinde, Úkimet, azamattyq qoǵam, ǵylymı qaýymdastyqtar, jeke sektor, buqaralyq aqparat quraldary, halyqaralyq qoǵamdastyq jáne Uıymnyń ózi qatysatyn 2030 jylǵy kún tártibin iske asyrý mindetin ári qaraı júzege asyrýdyń tetigi retinde qarastyramyz", dep atap ótti Iаkýp Berısh.
Tikeleı efır kezinde is-shara qatysýshylary BUU-nyń 75 jyldyǵyna arnalǵan beıneklıptiń tusaýkeserin tamashalady. Belgili mýzykant, Nur-Sultan qalasy fılarmonııasynyń sımfonııalyq orkestriniń dırıjeri Ernar Nurtazın "Nazqońyr" jáne "Balbyraýyn" shyǵarmalaryn oryndady.
Sonymen qatar UN75 jahandyq naýqanynyń aıasynda álem boıynsha 200-den astam ǵımarat, baǵdarlar men kópirler kók túske boıalady. Halyqaralyq naýqanǵa Qazaqstan da qosyldy. 23-24 qazan aralyǵynda Nur-Sultan, Almaty qalalary turǵyndary men qonaqtary "Báıterek" monýmenti, "Qazaqstan temir joly" ǵımaraty jáne "Qazaqstan" qonaq úıi sekildi kórikti jerlerdiń BUU-nyń kók túsine boıalǵanyn tamashalady.
