Oqıǵa • 27 Qazan, 2020

Almatydaǵy Jýrnalıster alleıasy

13 ret kórsetildi

«Bir tal kesseń, on tal ek» degen ustanym almatylyqtar úshin aınymas qaǵıdaǵa aınalǵandaı. Jasyl jelekke oranǵan jazıra qalanyń turǵyndary ár aptanyń demalys kúnderi aǵash egip, saýapty iske kenelip júr. Qolyna qalam ustaǵan tilshiler qaýymy da bul ıgi bastamadan syrt qalǵan joq. Almatynyń eń bir shuraıly jerinde jýrnalıster alleıasy paıda boldy.

Demalys kúni qalamyn kúrekke aıyr­bastaǵan tórtinshi bılik ókilderi Abaı dań­ǵylynyń boıyna 200 úıeńki aǵashynyń kóshetin otyrǵyzdy. Igilikti bastamaǵa ún qosqan jýrnalıster qaýymy búgin ekken talshybyǵymyz saıaly báıterekke aınalsa degen tilekte. «Almatybasjospar» mekemesi ǵımaratynyń aldyndaǵy bul oryn budan bylaı jýrnalıster alańqaıy dep atalmaq. Alleıa Abaı dańǵylynyń bo­ıymen, Gagarın dańǵylynan Jarokov kóshesine deıin sozylyp jatyr. Buqaralyq aqparat quraldarynyń redaksııalary ózderiniń kóshetterine mańdaıshalar ornatyp, esimderin jazyp qaldyrýdy da umytpady.

– Qalamyzda aǵash egý maýsymy qyzý júrip jatyr. BAQ ókilderi de bul iske óz úlesterin qosty. Bıyl bir maýsymda 250 myń aǵash egemiz. Bul – sońǵy 20 jyldaǵy rekordtyq kórsetkish. Byltyr jáne aldyńǵy jyldary bir maýsymda eń kóp degende 40 myń kóshet otyrǵyzǵan edik. Biz basa nazarǵa alyp otyrǵan bir nárse – aǵashty egip qana qoımaı, ony kútip baptaý. Buryn aǵash egilse, ol týraly umytylyp ketetin. Eń birinshi jyl – jaýapty kezeń. Sebebi, dál sol kezde ósimdik jaqsy kútimdi talap etedi. Aǵash ta adam balasy sııaqty, ony únemi baptap otyrý kerek. Búgin úıeńki kóshetterin otyrǵyzdyq. Bul aǵash baıaý ósedi. Tamyry tereń boılamaıdy. Aǵash egiletin kezde birneshe faktor eskeriledi. Máselen, ınjenerlik jeliler, sý, elektr, telefon jelileri. Biz qa­lany osyǵan baılanysty birneshe aımaqqa bóldik. Ár aımaqqa tán aǵashtar bar. Búgingi alleıaǵa dendrologtardyń pikirin eskere otyryp úıeńki tańdaldy, – deıdi Almaty qalalyq Jasyl ekonomıka basqarmasynyń basshysy Natalıa Lıvınskaıa.

Basqarmanyń mamandary BAQ qyz­metkerlerine aǵashtardy kútý men baptaý erejelerin sıpattaıtyn paraqshalar taratty. Talap boıynsha, ár aǵash jylyna 72 ret sýǵarylýy kerek.

 

ALMATY

 

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar