Búgingi tańda barlyǵy 4 326 adam naýqasqa shaldyqqan. Sonyń ishinde sońǵy táýlikterde ǵana 9 adamnyń boıynan vırýs tabylypty. Reseı Federasııasynan kelip jatqandar arasynan vırýs tasýshylar kóptep tabylýda. Osy 9 adamnyń 3-eýi sol elden kelgender. Eń soraqysy sol, sońǵy eki aptada jaman indetke ushyraǵandar sany 1,5 ese artqan. Iаǵnı 103-ten 157-ge jetken. Sonyń 37 paıyzy, ıaǵnı 58-i syrttan kelgenderden shyqqan.
Medısına qyzmetkerleri indetti anyqtaý jolyndaǵy jumystaryn jetildire túsken. Búgingi tańda oblystyń 117 myń turǵyny testileýden ótkizilgen. Bul barlyq turǵyndardyń 21 paıyzy degen sóz. Sońǵy aptada aldyńǵyǵa qaraǵanda testileýden ótkender sany 1,6 ese artyq bolǵan nemese aldyńǵy aptada 4 541 adam ótse, sońǵyda 7 414 adam testileýden ótipti. Sonyń nátıjesinde boıynan indettiń belgileri tabylǵan adamdar sany 17 paıyzǵa artqan.
Jaman indettiń bir ereksheligi – ol ımmýnıteti álsiregen, qartań adamdar arasynda kóp kezdesedi. Soltústikte de barlyq naýqastardyń arasynda 60-tan asqandardyń úlesi 26%, al 50 men 59 jas arasyndaǵylar 20%, 30 ben 39 jas arasyndaǵylar 18% bolyp otyr. Al 15 pen 18 jas aralyǵyndaǵylardyń úlesi – 2%.
Indettiń jumys isteıtinder, zeınetkerler, jumys istemeıtinder arasyndaǵy taralymy da nazar aýdartady. Aýrýǵa ushyraǵandardyń eń kóbi jumys isteıtinder eken. Bulardyń jumys pen úı máseleleri arasyndaǵy alańdaýshylyqtary ımmýnıtetti álsiretetin bolsa kerek. Sondyqtan da olardyń barlyq naýqastardyń arasyndaǵy úlesi 30%-dy qurap otyr. Al jumys istemeıtinderdiń úlesi – 19%. Zeınetkerler 21 paıyzdyq úlesti qamtyǵan. Medısına qyzmetkerleri arasyndaǵy taralym – 9%, al mektep oqýshylary arasyndaǵy úles – 4%. Osynyń bári indettiń qalaı qozdanýyn, kimderge aıryqsha áser etýin anyqtaý úshin kerek deıdi mamandar.
Qazir oblysqa syrttan keletinder muqııat tekserýden óte bastady. Ásirese, Reseı Federasııasynan kelgender yjdahatty tekseriledi. Memlekettik shekaranyń boıynda 3 beket ashylǵan, onda karantındik stasıonarlar bar. Sońǵy aptada memlekettik shekaradan barlyq úsh beketten 4 509 adam ótken. Kúdik keltirilip, karantındik stasıonarlarǵa ornalastyrylǵan 352 adamnyń 20-synyń boıynan indet tabyldy. Bular Qazaqstan azamattary bolsa, kúdikti delingen 8 sheteldik azamattyń shekaradan beri ótýine ruqsat berilmegen.
Indetke ushyraǵan oblys turǵyndarynyń 56 paıyzy Petropavl qalasynyń turǵyndary bolyp otyr. 3 aýdannyń turǵyndary bes paıyzdyq úlesten asty. Sonyń ishinde Qyzyljar aýdanynda – 7 paıyz, ıaǵnı – 321, M.Jumabaev aýdanynda – 6 paıyz, ıaǵnı – 276, Taıynsha aýdanynda – 5 paıyz, ıaǵnı – 233 adam.
Oblys ákiminiń janyndaǵy aımaqtyq komıssııanyń otyrysynda jaman indetke ushyraǵandar sany 7 adamnan assa, aýdan ortalyqtary men eldi mekenderdi jabý týraly sheshim qabyldanǵan. Osy talapqa sáıkes alty aýdandaǵy 10 eldi meken jabyldy. Sonyń ishinde Býlaev, Mamlıýt, Iаvlenka sııaqty aýdan ortalyqtary bar. Onda epıdemııalyq jaǵdaı jaqsarǵansha karantın alynbaıdy.
Jaman indetke baılanysty shekteýlerdiń oryndalýyn tekserý jónindegi monıtorıngtik top búginge deıin 969 hattama toltyrdy. Onyń 884-i jeke adamdarǵa jasaldy. Al sharýashylyq sýbektileriniń 83-i osyndaı jaza tartty. Sonyń ishinde eki laýazymdyq tulǵa bar. Barlyq salynǵan aıyppul kólemi 53 mln teńge bolyp otyr.
Indettiń balalar arasyndaǵy taralymy da az emes. Oqý jyly bastalǵannan beri 30 oqýshynyń indetke ushyraǵany anyqtaldy. Onyń jartysy mektepte oqıtyndar bolsa, qalǵan jartysy qashyqtan oqıtyndar. Mektepterdiń karantın talabyn oryndaýyn tekserý barysynda 10 mektepte oqýdy toqtatý jóninde qaýly qabyldanǵan. Onda talaptardy buzýshylyqqa jol berilgen. Alaıda jýyrda ondaǵy shekteý sharalary alynyp, mektepter qaıta ashyldy. Barlyǵy 126 mektepke monıtorıng jasaldy.
Oblystaǵy jaman indettiń ahýaly ázirge osyndaı.
Soltústik Qazaqstan oblysy
