2018-2019 oqý jylynda elimizdegi oqý oryndary arasyndaǵy básekege qabilettilik boıynsha Jetisý ýnıversıteti 10-orynnan kórinse, 2019-2020 oqý jylynda bul kórsetkish oń baǵytta ózgerip, bir satyǵa joǵarylaǵan eken. Iаǵnı IQAA-Ranking táýelsiz zertteýler agenttiginiń deregi boıynsha jetisýlyq bilim ordasy otandyq 18 ýnıversıtettiń arasynda segizinshi orynda tur. Sonymen qatar Jetisý ýnıversıteti Academic Ranking of World Universities – European Standard halyqaralyq joǵary oqý oryndary reıtıngine de qatysyp, oqytý sapasy boıynsha «A» kategorııasyn ıelengen. Iаǵnı dál osy ólshem boıynsha Qazaqstandaǵy 94 joǵary oqý orny qatysqan halyqaralyq básekede Taldyqorǵandaǵy ýnıversıtettiń 7-orynǵa kóterilgenin aıta ketken jón. Jalpy, ýnıversıtet túlekteriniń jumyspen qamtylýy da jolǵa qoıylǵan. Máselen, ótken jyldary ýnıversıtetti bitirgen 781 túlektiń 78 paıyzy turaqty jumysqa ornalasqan.
Jaqynda I.Jansúgirov atyndaǵy Jetisý ýnıversıteti oqý prosesin jetildirý jolynda oqytýshylar men stýdentterge qolaıly jaǵdaı jasaý úshin Almaty oblysyndaǵy iri kásiporyndarmen tórt tarapty konsorsıaldy kelisim jasady. Qol qoıylǵan kelisimniń negizinde Almaty oblysynyń óńirlik kásipkerler palatasy ýnıversıtet qyzmetkerleriniń jalpy bilimi men biliktilik deńgeıin arttyrýǵa arnalǵan teorııalyq jáne praktıkalyq sheberlik synyptaryn, semınar, trenıngterdi birlesip uıymdastyrýdy iske asyratyn bolady.
Sondaı-aq ýnıversıtettiń jas ǵalymdary men stýdentteriniń startaptar men ǵylymı jobalaryn qoldaý úshin ınvestorlardy, ıaǵnı demeýshilerdi izdeıdi. Munan bólek, Almaty oblysynyń óńirlik damytý ortalyǵy ǵylymı is-sharalardy uıymdastyrýǵa kómektesip, ǵylymı-zertteý jumystaryn júrgizýde keńes beredi. Al «Alataý» tehnoparki JShS – «Innovasııalyq tehnologııalar parki» arnaıy ekonomıkalyq aımaǵynyń basqarýshy kompanııasy» kelisimge qatysýshy mamandardy daıarlaýdy, qaıta daıarlaýdy jáne olardyń biliktiligin arttyrýdy uıymdastyrýǵa járdemdesýge, mamandardy ártúrli formatta oqytýǵa kómektesýdi mindetine alyp otyr.
– Jalpy, bilim sapasyn arttyrý men túlekterdi jumyspen qamtý maqsatynda I.Jansúgirov atyndaǵy Jetisý memlekettik ýnıversıteti keshendi jumys atqaryp keledi. Almaty oblysy agrarlyq aımaq bolǵandyqtan, óńirge qajetti mamandyqtardy zerdelep, aldaǵy 4 jylda qandaı mamandar daıarlaý qajet, qandaı bilim baǵdarlamalaryna basymdyq berý kerek ekenin anyqtap, sol boıynsha oqý baǵdarlamasyn jasaýdy qolǵa aldyq. Sonymen qatar jyl boıy oblystaǵy barlyq mekememen tyǵyz baılanys jasap, bos oryndardy anyqtaımyz. Bul boıynsha túlekterge maǵlumat berip, mekeme basshylarymen kezdesý uıymdastyramyz. О́z bilimgerlerin turaqty jumyspen qamtý maqsatynda Jetisý ýnıversıteti jańa bastamany qolǵa aldy. Bul bastama boıynsha, eger stýdent óndiristik tájirıbeden ótýge barǵan mekemede óziniń bilimi men qabiletin dáleldep, jumysqa ornalasýǵa múmkindik týsa, bilimgerge sońǵy kýrsty qashyqtan oqýǵa múmkindik beremiz. Bul ádis óz kezeginde, túlekti jumyspen qamtyp qana qoımaı, óz kásibi boıynsha tájirıbe jınaýyna jol ashady, – deıdi I.Jansúgirov atyndaǵy Jetisý ýnıversıtetiniń rektory Qýat Baımyrzaev.
Almaty oblysy
