Kóginde Táýelsizdik týy jelbiregen Qazaq eliniń Ońtústik Qazaqstan oblysy órkendegen mádenıetimen jáne óner oshaqtarymen erekshelenedi. Ońtústik Qazaqstan oblysynda 8 memlekettik teatr bar. Bul, árıne, Qazaqstannyń ózge oblystarynda kezdespeıtin jaǵdaı, qubylys. Keńes dáýirinde nebári 4 teatr: J.Shanın atyndaǵy oblystyq qazaq drama teatry, oblystyq orys drama teatry, Q.Jandarbekov atyndaǵy Jetisaı drama teatry, qýyrshaq teatry bolsa, elimiz táýelsizdik alǵan jyldary 4 teatr: Túrkistan qalalyq sazdy-drama teatry, opera jáne balet teatry, oblystyq ózbek teatry, ázil-syqaq jáne satıra teatry ashylyp, ońtústik óńiriniń mádenıet ajaryn asha tústi.
Kóginde Táýelsizdik týy jelbiregen Qazaq eliniń Ońtústik Qazaqstan oblysy órkendegen mádenıetimen jáne óner oshaqtarymen erekshelenedi. Ońtústik Qazaqstan oblysynda 8 memlekettik teatr bar. Bul, árıne, Qazaqstannyń ózge oblystarynda kezdespeıtin jaǵdaı, qubylys. Keńes dáýirinde nebári 4 teatr: J.Shanın atyndaǵy oblystyq qazaq drama teatry, oblystyq orys drama teatry, Q.Jandarbekov atyndaǵy Jetisaı drama teatry, qýyrshaq teatry bolsa, elimiz táýelsizdik alǵan jyldary 4 teatr: Túrkistan qalalyq sazdy-drama teatry, opera jáne balet teatry, oblystyq ózbek teatry, ázil-syqaq jáne satıra teatry ashylyp, ońtústik óńiriniń mádenıet ajaryn asha tústi.
«Oblystaǵy 8 kásibı teatrda aǵymdaǵy jyldyń 10 aıynda 37 jańa spektakl sahnalandy. Teatrlar Almaty, Aqtóbe, Qyzylorda, Qaraǵandy, Jambyl, Shyǵys Qazaqstan oblystary men Baıqońyr qalasyna jáne oblystyń aýdan, qalalaryna 73 gastroldik sapar uıymdastyrdy», dep Ońtústik Qazaqstan oblystyq mádenıet basqarmasynyń basshysy Kúlııa Aıdarbekova aǵynan jaryldy.
Sondaı-aq, Q.Jandarbekov atyndaǵy Jetisaı drama teatry men oblystyq opera jáne balet teatrlaryna aǵymdaǵy jóndeý jumystary júrgizilse, oblystyq qýyrshaq teatrynyń ǵımaraty kúrdeli jóndeýden ótkizildi. Oblystyq ázil-syqaq jáne satıra teatryna jeke ǵımarat berilip, oblystyq ózbek drama teatry jańa ǵımaratqa kóshirildi. J.Shanın atyndaǵy oblystyq qazaq drama teatrynyń ǵımaratyna kúrdeli jóndeý jumystary júrgizilýde. Oblystaǵy barlyq kásibı teatrlardyń materıaldyq-tehnıkalyq bazalary tolyq qamtamasyz etilgen. Sonymen qatar, Shymkent qalasynyń ákimshilik-iskerlik ortalyǵy aýmaǵynan oblystyq drama teatrynyń qurylysy qarqyndy júrgizilýde.
«Shaıanǵa barsań – ánshimin deme, Sozaqqa barsań – kúıshimin deme...», dep kezinde uly M.Áýezov aıtyp ketkendeı, Ońtústiktiń mádenıeti men óneri eńsesin bıik kótergen ólkege aınaldyrǵany shyndyq. «Qyz toqyǵan kestedeı bári sulý» dep aıtýdan aýlaqpyz. Sebebi, ónermen qabattasa júretin «tirshilik máselesi» ózindik qoldaýyn qajet etip turǵan kúrdeli jaıt. Ásirese, jalaqy máselesi. Bir janyn alyp, myń janyn sahnaǵa salatyn ártis pen aq qaǵazǵa túsken dramatýrgtiń oıyn kórermenge shashyratpaı jetkizemin dep jantalasqan rejısserdiń aılyq jalaqysy qaryn asharlyq jaǵdaıda. El basyna kún týǵan sonaý dúnıejúzilik soǵys kezinde ólermendikpen ónerin aıamaǵan kezderin túsinistikpen qarap, «erlik» dep qabyldasaq, búgingideı «terezemiz teń, aıbarly elge» aınalǵan tusta elimizdegi eń tómen jalaqymen kúneltýge májbúr bolyp otyrǵany óner sarbazdarynyń kókeıinde «Mádenıet mınıstrliginde bekitilgen shtat kestesin qaıta qarastyrsa» degen úmit otyn tutatady. Bul, árıne, Ońtústiktiń tórinde eldi ónerimen sýsyndatyp otyrǵan barlyq teatrǵa ortaq másele.
Áıtse de, «ónerge ózegin beretin» teatr qaýymynyń «bolmaı qaldy» dep qol qýsyryp otyrmaı «mádenıet maıdanyna» bilek sybana kirisetin sarbazdar ekeni kóńilge qýat beredi. Ońtústiktegi 8 teatrdyń búgingi tańda «ata teatry» bolyp otyrǵan J.Shanın atyndaǵy oblystyq qazaq drama teatry aldaǵy jyly 80 jyldyq mereıtoıyn toılamaqshy. Qazaq halqynyń basynan ótkizgen san-qıly zamanaýı kezeńderin, surapyl ótkelderin elmen birge bólisken teatrdyń 80 jyldyq óner qorjyny repertýarǵa baı. Toqyraýdyń tosqaýylynan turalamaı ótip, ujymy men qoıylymdaryn shashaý shyǵarmaı saqtaı bilgen teatrdyń «Akademııalyq teatr» atalýyna birden-bir sáti oraılasqan sekildi. Teatr ujymyna «Akademııalyq» mártebe berilse, ol teatr ujymyna ǵana emes, óner men mádenıettiń máıegi bolyp otyrǵan Ońtústik ólkesine degen qurmet bolar edi.
Saıa QASYMBEK,
J.Shanın atyndaǵy qazaq drama
teatry ádebıet bóliminiń meńgerýshisi.
Ońtústik Qazaqstan oblysy.
